இங்கிலாந்தின் ஆட்டமுறை ஆபத்தானது - அஸ்வின்!

இங்கிலாந்து அணி கையில் எடுத்திருக்கும் புதிய ஆட்ட முறை நிறைய வெற்றிகளை தந்து வரும் நிலையில் ரவிச்சந்திரன் அஸ்வின், அது ஆபத்தானது என கூறியுள்ளார்.

'England want to play a certain style of cricket': Ashwin's honest criticism of Bazball (Image Source: Google)

கிரிக்கெட் உலகில் தற்போது பெரும் எதிர்பார்ப்பை ஏற்படுத்தியிருப்பது டெஸ்ட் சாம்பியன்ஷிப் தொடர் தான். இறுதிப்போட்டிக்கு செல்வதற்காக ஆஸ்திரேலியா, இந்தியா, இலங்கை அணிகள் போட்டியிட்டு வருகின்றன. குறிப்பாக ஆஸ்திரேலியாவுக்கு எதிராக இன்னும் ஒரு வெற்றியை பெற்றால் கூட இந்திய அணி டெஸ்ட் சாம்பியன்ஷிப் இறுதி சுற்றுக்குள் நுழைந்துவிடும். இதனால் பெரும் எதிர்பார்ப்பு எழுந்துள்ளது.

இது ஒருபுறம் இருக்க இங்கிலாந்து அணி தனியாக கலக்கி வருகிறது. இங்கிலாந்து அணியில் புதிதாக கூட்டணி அமைத்துள்ள பயிற்சியாளர் பிரெண்டன் மெக்கலம் மற்றும் கேப்டன் பென் ஸ்டோக்ஸ் ஆகியோர் பேஸ்பால் என்ற புதிய முறையை கையாண்டு வருகின்றனர். அதாவது டெஸ்ட் கிரிக்கெட்டை அதிரடியாக விளையாடுவது தான். முதல் ஓவரில் இருந்தே டி20 கிரிக்கெட் போல அதிரடியாக ரன் குவிக்கின்றனர்.

இங்கிலாந்தின் அதிரடியை சமாளிக்க முடியாத எதிரணிகள் ரன்களை வாரி வழங்கிவிடுகின்றனர். ஆனால் எதிரணி வழக்கமான டெஸ்ட் அணுகுமுறையை காட்டும் போது அடுத்தடுத்து விக்கெட்டுகளை இழந்துவிடுகின்றனர். இதே போன்ற செயல்பாட்டை இந்திய அணியிலும் அவ்வபோது காட்டுவோம் என ரோஹித் சர்மா முன்பு கூறியிருந்தார்.

இந்நிலையில் இதுகுறித்து அஸ்வின் கருத்து தெரிவித்துள்ளார். அதில், “டி20 கிரிக்கெட்டில் செய்வதை அப்படியே டெஸ்ட் கிரிக்கெட்டில் செய்துவிட முடியாது. அவர்கள் அதுபோன்ற குறிப்பிட்ட ஸ்டைலில் கிரிக்கெட் ஆடுகின்றனர். ஆனால் அனைத்து களங்களிலும் இது செல்லாது. குறிப்பிட்ட களங்களில் அதிரடியாக ஆட நினைத்தால், மொத்தமாக விக்கெட்கள் சரிந்துவிடும்.

விளையடும் பிட்ச்-களுக்கு மதிப்பு கொடுக்க வேண்டியது அவசியம். ஒருமுறை டபள்யூவி ராமன்  என்னிடம் பேசினார். அப்போது, ஹலோ மிஸ்டர் எப்போதும் பிட்ச்-களுக்கு சவால் கொடுத்து பார்க்க வேண்டும். நீச்சல் குளத்தில் நீந்துவது போல கடலில் நீந்திவிட முடியாது. அந்தந்த இடத்திற்கு மரியாதை கொடுத்தால் மட்டுமே சரியாக செய்ய முடியும். இங்கிலாந்து அணி இன்னும் அவர்களின் அதிரடியை இந்திய களங்களில் காட்டவில்லை” என தெரிவித்துள்ளார்.