எம்எல்சி 2025: ஃபின் ஆலன் அதிரடியில் ஃப்ரிடமை பந்தாடியது யூனிகார்ன்ஸ்!
எம்எல்சி தொடரில் இன்று நடைபெற்ற முதல் லீக் போட்டியில் சான் ஃபிரான்சிஸ்கோ யூனிகார்ன்ஸ் அணி 123 ரன்கள் வித்தியாசத்தில் வாஷிங்டன் ஃப்ரீடம் அணியை வீழ்த்தி அபார வெற்றியைப் பதிவுசெய்துள்ளது.
எம்எல்சி என்றழைக்கப்படும் மேஜர் லீக் கிரிக்கெட் தொடரின் இரண்டாவது சீசன் இன்று கோலாகலமாக தொடங்கியது. இதில் நடைபெற்ற முதல் லீக் போட்டியில் கிளென் மேக்ஸ்வெல் தலைமையிலான வாஷிங்டன் ஃப்ரீடம் மற்றும் கோரி ஆண்டர்சன் தலைமையிலான சான் ஃபிரான்சிஸ்கோ யூனிகார்ன்ஸ் அணிகள் பலப்பரீட்சை நடத்தின. கலிஃபோர்னியாவில் நடைபெற்ற இப்போட்டியில் டாஸ் வென்ற வாஷிங்டன் ஃப்ரீடம் அணி முதலில் பந்துவீசுவதாக அறிவித்தது. இதையடுத்து களமிறங்கிய யூனிகார்ன்ஸ் அணிக்கு டிம் செய்ஃபெர்ட் மற்றும் ஃபின் ஆலன் இணை தொடக்கம் கொடுத்தனர்.
இதில் டிம் செய்ஃபெர்ட் 18 ரன்களுக்கு விக்கெட்டை இழக்க அடுத்து களமிறங்கிய ஃபிரேசர் மெக்குர்கும் 6 ரன்களுடன் நடையைக் கட்டினார். அதேசமயம் இப்போட்டியில் ஆரம்பம் முதலே சிக்ஸர் மழை பொழிந்த ஃபின் ஆலன் 34 பந்துகளில் தனது சதத்தைப் பூர்த்தி செய்து மிரட்டினார். அவருடன் இணைந்து சஞ்சய் கிருஷ்ணமூர்த்தியும் தனது பங்கிற்கு ஒரு பவுண்டரி, 4 சிக்ஸர்கள் என 36 ரன்களை சேர்த்து ஆட்டமிழக்க, மறுமுனையில் அபாரமாக விளையாடி வந்த ஃபின் ஆலனும் 5 பவுண்டரிகள், 19 சிக்ஸர்களுடன் 151 ரன்களை எடுத்த கையோடு விக்கெட்டை இழந்தார்.
பின்னர் களமிறங்கிய வீரர்கள் ஹசன் கான் 3 பவுண்டரி, 3 சிக்ஸர்கள் என 38 ரன்களைச் சேர்க்க, சான் ஃபிரான்சிஸ்கோ யூனிகார்ன்ஸ் அணி 20 ஓவர்கள் முடிவில் 5 விக்கெட்டுகள் இழப்பிற்கு 269 ரன்களைக் குவித்தது. வாஷிங்டன் அணி தரப்பில் ஜேக் எட்வர்ட்ஸ் 2 விக்கெட்டுகளை கைப்பற்றினார். பின்னர் இலக்கை நோக்கி களமிறங்கிய ஃப்ரீடம் அணிக்கு மிட்செல் ஓவன் மற்றும் ரச்சின் ரவீந்திரா இணை அதிரடியான தொடக்கத்தைக் கொடுத்தனர். இருவரும் இணைந்து முதல் விக்கெட்டிற்கு 80 ரன்கள் சேர்த்த நிலையில் 2 பவுண்டரி, 5 சிக்ஸர்களுடன் 42 ரன்களில் விக்கெட்டை இழந்தார்.
Also Read: LIVE Cricket Score
மேற்கொண்டு 4 பவுண்டரி, 3 சிக்ஸர்களுடன் 39 ரன்களை எடுத்திருந்த மிட்செல் ஓவனும், 3 சிக்ஸர்களுடன் 21 ரன்களைச் சேர்த்திருந்த ஜேக் எட்வர்ட்ஸும் ஆட்டமிழக்க, அடுத்து களமிறங்கிய வீரர்களும் சொற்ப ரன்களில் விக்கெட்டை இழந்தனர். இதனால் அந்த அணி 13.1 ஓவர்களிலேயே அனைத்து விக்கெட்டுகளையும் இழந்து 146 ரன்களில் ஆல் அவுட்டானது. யூனிகார்ன்ஸ் அணி தரப்பில் ஹாரிஸ் ராவுஃப், ஹசன் கான் தலா 3 விக்கெட்டுகளை கைப்பற்றினர். இதன்மூலம் சான் ஃபிரான்சிஸ்கோ யூனிகார்ன்ஸ் அணி 123 ரன்கள் வித்தியாசத்தில் வாஷிங்டன் ஃப்ரீடம் அணியை வீழ்த்தி அபார வெற்றியைப் பதிவுசெய்துள்ளது.
Win Big, Make Your Cricket Tales Now
