ஐசிசி உலகக்கோப்பை 2023: இலங்கையை 240 ரன்னில் சுருட்டியது ஆஃப்கானிஸ்தான்!

ஆஃப்கானிஸ்தானுக்கு எதிரான ஒருநாள் உலகக்கோப்பை லீக் போட்டியில் முதலில் பேட்டிங் செய்த இலங்கை அணி 240 ரன்களுக்கு ஆல் அவுட்டானது.

ஐசிசி உலகக்கோப்பை 2023: இலங்கையை 240 ரன்னில் சுருட்டியது ஆஃப்கானிஸ்தான்! (Image Source: Google)

ஐசிசி ஒருநாள் உலகக்கோப்பை கிரிக்கெட் தொடர் விறுவிறுப்பாக நடைபெற்றுவருகிறது. இதில் இன்று நடைபெற்ற 30ஆவது லீக் போட்டியில் இலங்கை மற்றும் ஆஃப்கானிஸ்தான் அணிகள் பலப்பரீட்சை நடத்திவருகின்றன. இந்நிலையில் புனேவில் நடைபெறும் இப்போட்டியில் டாஸ் வென்ற ஆஃப்கானிஸ்தான் அணி முதலில் பந்துவீசுவதாக அறிவித்தது.

அதன்படி களமிறங்கிய இலங்கை அணிக்கு திமுத் கருணரத்னே - பதும் நிஷங்கா இணை தொடக்கம் கொடுத்தனர். இதில் கருணரத்னே 15 ரன்களில் ஆட்டமிழந்து ஏமாற்றமளித்தார். பின்னர் நிஷங்காவுடன் இணைந்த கேப்டன் குசால் மெண்டீஸும் சிறப்பான அட்டத்தை வெளிப்படுத்தி அணியின் ஸ்கோரை மளமளவென உயர்த்தினர்.

இதில் இருவரும் அரைசதம் அடிப்பார்கள் என எதிர்பார்க்கப்பட்ட நிலையில் பதும் நிஷங்கா 46 ரன்களுக்கு விக்கெட்டை இழக்க, மறுபக்கம் கேப்டன் குசால் மெண்டிஸும் 39 ரன்களுக்கு  ஆட்டமிழந்தார். பின்னர் களமிறங்கிய சதீரா சமரவிக்ரமா 36, சரித் அசலங்கா 22, தனஞ்செயா டி சில்வா 14 ரன்கள் என அடுத்தடுத்து விக்கெட்டை இழந்தனர். 

அதன்பின் ஜோடி சேர்ந்த ஏஞ்சலோ மேத்யூஸ் - மஹீஷ் தீக்‌ஷனா இணை ஓரளவு தாக்குப்பிடித்தனர். இதில் அதிரடியாக விளையாடிய தீக்‌ஷனா 3 பவுண்டரி, ஒரு சிக்சர் என 29 ரன்கள் எடுத்த நிலையில் விக்கெட்டை இழந்தார்.  அவரைத்தொடர்ந்து அணியின் நம்பிக்கையாக பார்க்கப்பட்ட ஏஞ்சலோ மேத்யூஸும் 23 ரன்களுக்கு ஆட்டமிழந்தார். 

பின்னார் களமிறங்கிய வீரர்களாலும் பெரிதளவில் சோபிக்க முடியாததால், இலங்கை அணி 49.3 ஓவர்களில் அனைத்து விக்கெட்டுகளையும் இழந்து 240 ரன்களுக்கு ஆல் அவுட்டானது. ஆஃப்கானிஸ்தான் அணி தரப்பில் அபாரமாக பந்துவீசிய ஃபசல்ஹக் ஃபரூக்கி 4 விக்கெட்டுகளையும், முஜீப் உர் ரஹ்மான் 2 விக்கெட்டுகளையும் கைப்பற்றினர். 

Win Big, Make Your Cricket Tales Now