ஐக்கிய அரபு அமீரகத்தில் நடைபெற்றுவரும் ஐஎல்டி20 தொடரின் முதல் சீசன் இறுதிக்கட்டத்தை எட்டியுள்ளது. இதில் நேற்று நடைபெற்ற குவாலிஃபையர் ஆட்டத்தில் டெஸர்ட் வைப்பர்ஸ் - கல்ஃப் ஜெயண்ட்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற கல்ஃப் ஜெயண்ட்ஸ் அணி பந்துவீச்சை தேர்வு செய்தது.
அதன்படி களமிறங்கிய டெஸர்ட் வைப்பர்ஸ் அணிக்கு தொடக்கம் சிறப்பாக அமையவில்லை. நட்சத்திர வீரர்கள் அலெக்ஸ் ஹேல்ஸ், காலின் முன்ரோ ஆகியோர் அடுத்தடுத்து சொற்ப ரன்களுக்கு ஆட்டமிழக்க, மற்றொரு தொடக்க வீரரான முஸ்தஃபா 23 ரன்களில் விக்கெட்டை இழந்தார்.
பின்னர் ஜோடி சேர்ந்த சாம் பில்லிங்ஸ் - வநிந்து ஹசரங்கா ஆகியோர் சிறப்பாக விளையாடி தலா 31 ரன்களில் ஆட்டமிழந்தனர். அதன்பின் வந்த ரூதர்ஃபோர்ட் அதிகபட்சமாக 37 ரன்களைச் சேர்க்க, டாம் கரன் தனது பங்கிற்கு 29 ரன்களைச் சேர்த்தார். இதன்மூலம் 20 ஓவர்கள் முடிவில் டெஸர்ட் வைப்பர்ஸ் அணி 7 விக்கெட் இழப்பிற்கு 178 ரன்களைச் சேர்த்தது. கல்ஃப் தரப்பில் கிறிஸ் ஜோர்டன் 3 விக்கெட்டுகளைக் கைப்பற்றினார்.
