ஐஎல்டி20 2024 எலிமினேட்டர்: அபுதாபி நைட் ரைடர்ஸை வீழ்த்தி துபாய் கேப்பிட்டல்ஸ் அபார வெற்றி!

அபுதாபி நைட் ரைடர்ஸ் அணிக்கெதிரான ஐஎல்டி20 எலிமினேட்டர் சுற்றில் துபாய் கேப்பிட்டல்ஸ் அணி 85 ரன்கள் வித்தியாசத்தில் வெற்றிபெற்று இரண்டாவது குவாலிஃபையர் சுற்றுக்கு முன்னேறி அசத்தியுள்ளது.

ஐஎல்டி20 2024 எலிமினேட்டர்: அபுதாபி நைட் ரைடர்ஸை வீழ்த்தி துபாய் கேப்பிட்டல்ஸ் அபார வெற்றி! (Image Source: Google)

ஐஎல்டி20 என்றழைக்கப்படும் இன்டர்நேஷனல் லீக் டி20 தொடரின் இரண்டாவது சீசன் தற்போது இறுதிக்கட்டத்தை நெருங்கியுள்ளது. இத்தொடரின் எலிமினேட்டர் சுற்று ஆட்டம் நேற்று நடைபெற்றது. அபுதாபியில் நடைபெற்ற இப்போட்டியில் புள்ளிப்பட்டியளின் 3ஆம் இடத்தை பிடித்த அபுதாபி நைட் ரைடர்ஸ் அணியை எதிர்த்து, நான்காம் இடத்தை பிடித்துள்ள துபாய் கேப்பிட்டல்ஸ் அணி விளையாடின. இந்நிலையில் இப்போட்டியில் டாஸ் வென்றுள்ள அபுதாபி நைட் ரைடர்ஸ் அணி முதலில் பந்துவீசுவதாக அறிவித்தது.

அதன்படி களமிறங்கிய துபாய் கேப்பிட்டல்ஸ் அணிக்கு டாம் பாண்டன் - மேக்ஸ் ஹோல்டன் இணை தொடக்கம் கொடுத்தனர். இதில் பாண்டன் அதிரடியாக தொடங்க, மறுபக்கம் மேக்ஸ் ஹோல்டன் ஒரு ரன்னிலும், லுயிஸ் டு ப்ளூய் 9 ரன்களிலும் என விக்கெட்டை இழந்து எமாற்றமளித்தனர். அவர்களைத் தொடர்ந்து அரைசதம் அடிப்பார் என பெரிதும் எதிர்பார்க்கப்பட்ட டாம் பாண்டனும் 44 ரன்கள் சேர்த்த நிலையில் ஆட்டமிழந்து அரைசதம் அடிக்கும் வாய்ப்பை தவறவிட்டார்.

பின்னர் ஜோடி சேர்ந்த டாம் அபேல் - கேப்டன் சாம் பில்லிங்ஸ் இணை பொறுப்பான ஆட்டத்தை வெளிப்படுத்தியதுடன் விக்கெட் இழப்பையும் தடுத்தனர். இருவரும் இணைந்து அதிரடியாக விளையாடி வந்த டாம் அபேல் 41 ரன்களில் ஆட்டமிழந்து பெவிலியனுக்கு திரும்பினார். பின்னர் பில்லிங்ஸுடன் இணைந்த சிக்கந்தர் ரஸா வழக்கம் போல் தனது அதிரடியான ஆட்டத்தை வெளிப்படுத்தி பவுண்டரிகளை விளாசினார். 

அதன்பின் 5 பவுண்டரி, ஒரு சிக்சர் என 40 ரன்கள் எடுத்த நிலையில் சிக்கந்தர் ரஸா விக்கெட்டை இழக்க, இப்போட்டியில் இறுதிவரை ஆட்டமிழக்காமல் இருந்த சாம் பில்லிங்ஸ் 2 பவுண்டரி, 2 சிக்சர்கள் என 46 ரன்களைச் சேர்த்தார். இதன்மூலம் 20 ஓவர்கள் முடிவில் துபாய் கேப்பிட்டல்ஸ் அணி 5 விக்கெட்டுகள் இழப்பிற்கு 188 ரன்களைச் சேர்த்தது. அபுதாபி அணி தரப்பில் சபிர் அலி ராவ் 2 விக்கெட்டுகளைக் கைப்பற்றினார். 

இதையடுத்து இலக்கை நோக்கி விளையாடிய அபுதாபி நைட் ரைடர்ஸ் அணியில் ஜேசன் ராய் ரன்கள் ஏதுமின்றி விக்கெட்டை இழந்து ஏமாற்றமளித்தார். அவரைத்தொடர்ந்து மைக்கேல் பெப்பர் 5 ரன்களுக்கும், ஜோ கிளர்க் 13 ரன்களுக்கும், அலிஷான் ஷரஃபு ரன்கள் ஏதுமின்றியும், லௌரி எவான்ஸ் 7 ரன்களுக்கும் என விக்கெட்டை இழந்து பெவிலியனுக்கு நடையைக் கட்டினர். 

பின்னர் இணைந்த சாம் ஹைன் - டேவிட் வில்லி இணை அதிரடியாக விளையாடி ஸ்கோரை உயர்த்தினர். இதில் ஹைன் 29 ரன்களில் ஆட்டமிழக்க, அடுத்து வந்த ரவி போபாரா, ஃபேபியன் ஆலன், கேப்டன் சுனில் நரைன் ஆகியோருடன் 36 ரன்களைச் சேர்த்த டேவிட் வில்லியும் விக்கெட்டை இழந்தார். இதனால் அபுதாபி நைட் ரைடர்ஸ் அணி 16.5 ஓவர்களில் அனைத்து விக்கெட்டுகளையும் இழந்து 103 ரன்களுக்கு ஆட்டமிழந்தனர். 

துபாய் கேப்பிட்டல்ஸ் அணி தரப்பில் சிறப்பாக பந்துவீசிய ஸ்காட் குகெலிஜ்ன் 4 விக்கெட்டுகளையும், ஸஹிர் கான், சிக்கந்தர் ரஸா ஆகியோர் தலா 2 விக்கெட்டுகளை வீழ்த்தினர். இதன்மூலம் துபாய் கேப்பிட்டல்ஸ் அணி 85 ரன்கள் வித்தியாசத்தில் அபுதாபி நைட் ரைடர்ஸ் அணியை வீழ்த்தி வெற்றிபெற்றதுடன், இரண்டாவது குவாலிஃபையர் சுற்றுக்கும் முன்னேறி அசத்தியுள்ளது. 

Win Big, Make Your Cricket Tales Now