ஐஎல்டி20: ஹேல்ஸ், ருதர்ஃபோர்ட் அதிரடியில் டெஸர்ட் வைப்பர்ஸ் அசத்தல் வெற்றி!

எம்ஐ எமிரேட்ஸுக்கு எதிரான ஐஎல்டி20 கிரிக்கெட் போட்டியில் டெஸர்ட் வைப்பர்ஸ் அணி 7 விக்கெட் வித்தியாசத்தில் வெற்றிபெற்று அசத்தியது.

ILT20: Unbeaten Fifties By Alex Hales, Sherfane Rutherford Carry Desert Vipers Past MI Emirates (Image Source: Google)

ஐக்கிய அரபு அமீரகத்தில் தொடங்கப்பட்டுள்ள ஐஎல்டி20 கிரிக்கெட் தொடர் விறுவிறுப்பாக நடைபெற்று வருகிறது. இதில் நேற்று நடைபெற்ற 15ஆவது லீக் ஆட்டத்தில் டெஸர்ட் வைப்பர்ஸ் - எம்ஐ எமிரேட்ஸ் அணிகள் பலப்பரீட்சை நடத்தின. இதில் டாஸ் வென்ற டெஸர்ட் வைப்பர்ஸ் அணி பந்துவீச தீர்மானித்தது.

அதன்படி களமிறங்கிய முகமது வாசீம், அரவிந்த், ஆண்ட்ரே ஃபிளெட்சர் என அடுத்தடுத்து விக்கெட்டுகளை இழந்து பெவிலியன் திரும்பினார். பின்னர் ஜோடி சேர்ந்த நிக்கோலஸ் பூரன் - கீரென் பொல்லார்ட் ஆகியோர் அதிரடியாக விளையாடி அணியின் ஸ்கோரை மளமளவென உயர்த்தினர்.

இதில் அபார ஆட்டத்தை வெளிப்படுத்திய இருவரும் அரைசதம் கடந்து அசத்தினர். பின்னர் 57 ரன்கள் எடுத்திருந்த நிக்கோலஸ் பூரன் ஆட்டமிழக்க, மறுமுனையில் இறுதிவரை ஆட்டமிழக்காமல் 39 பந்துகளில் 6 சிக்சர்கள், ஒரு பவுண்டரி என 67 ரன்களைச் சேர்த்தார் பொல்லார்ட். இதன்மூலம் 20 ஓவர்கள் முடிவில் எம்ஐ எமீரேட்ஸ் அணி 5 விக்கெட் இழப்பிற்கு 169 ரன்களைச் சேர்த்தது. 

இதையடுத்து இலக்கை நோக்கி களமிறங்கிய டெஸர்ட் வைப்பர்ஸ் அணியில் ரோஹன் முஸ்தபா ஒரு ரன்னில் ஆட்டமிழந்து பெவிலியன் திரும்பினார். பின் ஜோடி சேர்ந்த அலெக்ஸ் ஹேல்ஸ் - காலின் முன்ரோ இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். 

இதில் அதிரடியாக விளையாடிய அலெக்ஸ் ஹேல்ஸ் இப்போட்டியிலும் அரைசதம் கடந்தார். அதன்பின் 41 ரன்காளில் முன்ரோ விக்கெட்டை இழக்க, அடுத்து களமிறங்கிய சாம் பில்லிங்ஸும் ஒரு ரன்னுடன் நடையைக் கட்டினார். இதையடுத்து அலெக்ஸ் ஹேல்ஸுடன் இணைந்த ரூதர்ஃபோர்ட் அதிரடியாக விளையாடி 29 பந்துகளில் 4 பவுண்டரி, 3 சிக்சர்கள் என 56 ரன்களைச் சேர்த்தார். 

இதன்மூலம் டெஸர்ட் வைப்பர்ஸ் அணி 16.3 ஓவர்கள் முடிவில் இலக்கை எட்டியதுடன் 7 விக்கெட் வித்தியாசத்தில் எம்ஐ எமிரேட்ஸ் அணியை வீழ்த்தி வெற்றிபெற்றது. இதில் அதிரடியாக விளையாடிய ருதர்ஃபோர்ட் ஆட்டநாயகனாகத் தேர்வுசெய்யபட்டார்.

Win Big, Make Your Cricket Tales Now