டி20 உலகக்கோப்பை: அஸ்வின் அபாரம்; ஜிம்பாப்வேவை வீழ்த்தியது இந்தியா!

டி20 உலகக்கோப்பை: ஜிம்பாப்வேவுக்கு எதிரான சூப்பர் 12 ஆட்டத்தில் இந்திய அணி 71 ரன்கள் வித்தியாசத்தில் வெற்றிபெற்று அசத்தியது.

India Beat Zimbabwe By 71 Runs; Set Up Clash Against England In T20 World Cup 2022 Semi-Finals (Image Source: Google)

ஆஸ்திரேலியாவில் நடைபெற்று வரும் டி20 உலகக் கோப்பை கிரிக்கெட் தொடரின் சூப்பர் 12 சுற்று ஆட்டங்கள் இன்றுடன் நிறைவு பெறுகின்றன. இதில் குரூப் 1இல் இருந்து நியூசிலாந்து மற்றும் இங்கிலாந்து அணிகளும், குரூப் 2இல் இருந்து இந்தியா மற்றும் பாகிஸ்தான் அணிகளும் அரையிறுதி சுற்றுக்கு முன்னேறி உள்ளன. 

இந்நிலையில், இன்று மெல்போர்ன் கிரிக்கெட் மைதானத்தில் நடைபெற்ற சூப்பர் சுற்று கடைசி லீக் ஆட்டத்தில் இந்தியா ஜிம்பாப்வே அணிகள் விளையாடின. இதில் டாஸ் வென்ற இந்திய அணி முதலில் பேட்டிங் செய்தது. தொடக்க ஆட்டக்காரராக களம் இறங்கிய கேப்டன் ரோகித் சர்மா 15 ரன் எடுத்த நிலையில் ஆட்டமிழந்தார். மற்றொரு வீரர் கேஎல் ராகுல் 35 பந்துகளில் 51 ரன் குவித்த நிலையில் பெவிலியன் திரும்பினார். கோலி 26 ரன் அடித்தார்.

வழக்கம் போல் அதிரடி காட்டிய சூரியகுமார் யாதவ் 25 பந்துகளில் 6 பவுண்டரிகள் மற்றும் 4 சிக்சர்களுடன் 61 ரன்கள் குவித்து களத்தில் இருந்தார். தினேஷ் கார்த்திக்கிற்கு பதிலாக களம் இறங்கிய ரிஷப் பண்ட் 3 ரன்னுக்கு விக்கெட்டை பறிகொடுத்தார். ஹர்திக் பாண்ட்யா 18 ரன் அடித்தார். இந்திய அணி 20 ஓவர்கள் முடிவில் 5 விக்கெட் இழப்பிற்கு 186 ரன்கள் எடுத்தது. 

இதையடுத்து 187 ரன்கள் என்ற இலக்கை நோக்கி களமிறங்கிய ஜிம்பாப்வே அணியின் வெஸ்லி மதவெரே, புவனேஷ்வர் குமார் வீசிய முதல் பந்திலேயே ஆட்டமிழந்தார். அதனைத் தொடர்ந்து ரேஜிஸ் சகாப்வாவும் ரன் ஏதுமின்றி விக்கெட்டை இழந்தார். 

அவர்களைத் தொடர்ந்து கிரேய்க் எர்வின் 13, சீன் வில்லியம்ஸ் 11, முன்யங்கா 4 என அடுத்தடுத்து விக்கெட்டுகளை இழந்தனர். அதன்பின் ஜோடி சேர்ந்த சிக்கந்தர் ரஸா - ரியான் பர்ல் இணை அதிரடியாக விளையாடி அணியின் ஸ்கோரை உயர்த்தினர். 

பின் 34 ரன்களில் சிக்கந்தர் ரஸாவும், 35 ரன்களில் ரியான் பர்லும் விக்கெட்டை இழக்க, அடுத்து களமிறங்கிய வீரர்களும் சொற்ப ரன்களுக்கு நடையைக் கட்டினர். இதனால் 17.2 ஓவர்களில் ஜிம்பாப்வே அணி அனைத்து விக்கெட்டுகளையும் இழந்து 115 ரன்களை மட்டுமே எடுத்தது. இந்திய அணி தரப்பில் ரவிச்சந்திரன் அஸ்வின் 3 விக்கெட்டுகளைக் கைப்பற்றினார். 

இதன்மூலம் இந்திய அணி 71 ரன்கள் வித்தியாசத்தில் ஜிம்பாப்வே அணியை வீழ்த்தி அசத்தல் வெற்றியைப் பெற்றது. இதையடுத்து இந்திய அணி அரையிறுதி போட்டியில் இங்கிலாந்து அணியையும், பாகிஸ்தான் அணியும் நியூசிலாந்து அணியையும் எதிர்கொள்ளவுள்ளது குறிப்பிடத்தக்கது.

Win Big, Make Your Cricket Tales Now