‘என்னங்க சார் உங்க சட்டம்’ ஆதங்கத்தை வெளிப்படுத்தும் வருண் ஆரோன்!

எந்த நாட்டு கிரிக்கெட் அணியிலும் இல்லாத பழக்கம் இந்திய அணியில் உள்ளதாக வருண் ஆரோன் தனது ஆதங்கத்தை வெளிப்படுத்தியுள்ளார்.

இந்திய கிரிக்கெட் அணியை பொறுத்தவரை ஒரு வீரருக்கு 30 வயதுக்கு மேல் ஆகிவிட்டால், அவருக்கு அவ்வளவாக அணியில் இடம் கிடைப்பதில்லை என குற்றச்சாட்டு கடந்த சில ஆண்டுகளாக முன்வைக்கப்படுகிறது. உள்ளூர் கிரிக்கெட் போட்டிகளில் சிறப்பான ஆட்டத்தை வெளிப்படுத்தினாலும், வயதை காரணம் காட்டி தேர்வு குழு புறக்கணிப்பதாக வீரர்கள் சிலர் தங்களது ஆதங்கத்தை வெளிப்படுத்தி வருகின்றனர்.

இந்த நிலையில் இந்திய அணியில் விளையாடிய வருண் ஆரோன் இந்திய கிரிக்கெட் தேர்வு குழுவை விமர்சனம் செய்துள்ளார். 

இதுகுறித்து பேசிய அவர், ‘உலகிலேயே இந்திய அணி மட்டும் தான் 30 வயதுக்கு மேல் ஆன வீரர்களால் சிறப்பாக விளையாட முடியாது என்று நினைக்கிறது. மற்ற எந்த நாட்டிலும் இதுபோல் இல்லை. ஆஸ்திரேலிய அணி வீரர் மைக் ஹசி 30 வயதுக்கு மேல் ஆகிவிட்ட போதிலும், அந்நாட்டு அணியில் இடம்பெற்று விளையாடினார். அதேபோல் 38 வயது நிரம்பிய இங்கிலாந்து வீரரான ஜேம்ஸ் ஆண்டர்சன் இன்னமும் அந்த அணிக்காக விளையாடி வருகிறார். ஆனால் இதைப் பற்றியெல்லாம் அங்கு யாரும் கேள்விகளை எழுப்ப வில்லை. நன்றாக பயிற்சி பெற்ற ஒரு வீரரால் 30 வயதுக்கு மேல் சிறப்பாக விளையாட முடியாது என்று யாராலும் கூற முடியாது.

என்னுடைய வாழ்க்கையில் 3-4 வருடங்களை காயம் காரணமாக விளையாட முடியாமல் போனது. எனக்கு இப்போது 31 வயதாகிறது. ஆனால் என்னால் அதை ஏற்றுக் கொள்ள முடியவில்லை. நான் கடினமாக உழைத்து உடலைப் ஃபிட்டாக வைத்திருப்பதால் எனக்கு 26 அல்லது 27 வயதுதான் ஆகிறது என எனக்கு தோன்றுகிறது.

அதனால் டெஸ்ட் போட்டிகளில் என்னால் சிறப்பாக பந்து வீச முடியும். டெஸ்ட் போட்டியில் ஒரு வேகப்பந்து வீச்சாளர், தொடர்ந்து 140 கிலோ மீட்டருக்கு மேல் பந்து வீச வேண்டும் என்றுதான் அனைவரும் எதிர்பார்ப்பார்கள். என்னால் 145 கிலோ மீட்டர் வேகத்தில் பந்து வீச முடியும் என்று” தனது ஆதங்கத்தை வெளிப்படுத்தியுள்ளார். 

தற்போது 31 வயதாகும் வருண் ஆரோன் இந்திய அணியில் வேகப்பந்து வீச்சாளராக இடம் பிடித்து விளையாடி வந்தார். ஆனால் தொடர்ந்து காயங்களினால் அவதிப்பட்டு வந்த அவருக்கு, 2015ஆம் ஆண்டுக்கு பின் இந்திய அணயில் இடம் கிடைக்கவில்லை என்பது குறிப்பிடத்தக்கது.