வெஸ்ட் இண்டீஸூக்கு எதிராக வரலாற்று சாதனை நிகழ்த்திய இந்தியா!

வெஸ் இண்டீஸ் அணியுடனான 3ஆவது ஒருநாள் போட்டியில் வெற்றி பெற்றதன் மூலம் இந்திய அணி பிரமாண்ட சாதனையை படைத்துள்ளது.

India set a new world record for most bilateral ODI series wins against a team (Image Source: Google)

இரு அணிகளும் மோதிய இந்த போட்டியில் இந்திய அணி 119 ரன்கள் வித்தியாசத்தில் அபார வெற்றி பெற்றது. மழை குறுக்கிட்டதால் 36 ஓவர்களாக குறைக்கப்பட்ட இந்த போட்டியில் முதலில் பேட்டிங் செய்த இந்திய அணி 225/3 ரன்களை குவித்தது. 

இந்திய அணித்தரப்பில் ஓப்பனிங் வீரர் ஷிகர் தவான் 74 பந்துகளில் 58 ரன்களை விளாசினார். மற்றொரு தொடக்க வீரரான சுப்மன் கில் 98 ரன்களை சேர்த்து அணியின் வெற்றிக்கு வித்திட்டார். மிடில் ஆர்டரை பொறுத்தவரையில் சூர்யகுமார் யாதவ் 8 ரன்களுக்கு வெளியேறி சொதப்ப, ஸ்ரேயாஸ் ஐயர் 44 ரன்களை குவித்தார்.

கடின இலக்கை விரட்டிய வெஸ்ட் இண்டீஸ் அணி இந்திய பந்துவீச்சை சமாளிக்க முடியாமல் அடுத்தடுத்து வெளியேறியது. அந்த அணியில் 4 வீரர்கள் டக் அவுட்டும் 3 பேர் ஒற்றை இலக்க ரன்களிலும் வெளியேறினர். கேப்டன் நிகோலஸ் பூரண் (42) - பிராண்டன் கிங் (42) ரன்கள் அமைத்து போராடியபோதும் அணியை காப்பாற்ற முடியவில்லை. இறுதியில் 26 ஓவர்களிலெல்லாம் அந்த அணி 137 ரன்கள் மட்டுமே எடுத்து ஆட்டமிழந்தது.

இந்நிலையில் இந்த  ஒயிட்வாஷ் மூலம் இந்திய அணி பெரும் சாதனையை தனதாக்கியுள்ளது. இந்திய அணி கடந்த 1983ஆம் ஆண்டு முதல் வெஸ்ட் இண்டீஸ் அணிக்கு எதிராக 50 ஓவர் கிரிக்கெட் போட்டிகளில் மோதி வருகிறது. இந்த 39 ஆண்டுகளில் இந்திய மண்ணில் வைட் வாஷ் செய்திருந்தாலும், ஒரு முறை கூட வெஸ்ட் இண்டீஸ் மண்ணில் இந்தியா வைட் வாஷ் செய்ததில்லை. முதல் முறையாக அந்த பெருமையை தற்போது பெற்றுள்ளது.

ஒருநாள் கிரிக்கெட் வரலாற்றில் இந்திய அணியின் 13வது வைட் வாஷ் இதுவாகும். குறிப்பாக அயல்நாட்டு மண்ணில் செய்யும் 5வது வைட் வாஷாகும். இதற்கு முன்பாக விராட் கோலி (2013), ரகானே (2015), தோனி (2016) ஆகியோர் ஜிம்பாவே மண்ணிலும், இலங்கையில் விராட் கோலி (2017) தலைமையில் ஒரு முறையும் இந்தியா ஒயிட்வாஷ் செய்துள்ளது.

நடப்பாண்டு தொடக்கத்தில் வெஸ்ட் இண்டீஸ் அணியை சொந்த மண்ணில் வைத்து இந்தியா ஒயிட்வாஷ் செய்திருந்தது. தற்போது இதே ஆண்டில் அவர்கள் மண்ணில் சாய்த்துள்ளது. இதன் மூலம் ஒரு அணிக்கு எதிராக ஒரே ஆண்டில் 2 ஒயிட்வாஷ்களை செய்த 3ஆவது அணியாக இந்தியா பெருமை பெற்றுள்ளது.

இதற்கு முன்பாக வங்கதேசத்திற்கு எதிராக ஜிம்பாவே அணியும், கென்யாவுக்கு எதிராக வங்கதேசமும் செய்திருந்தது.

Win Big, Make Your Cricket Tales Now