ஐபிஎல் 2022: டி காக் அரைசதம்; டெல்லியை வீழ்த்தியது லக்னோ!
ஐபிஎல் 2022: டெல்லி கேப்பிட்டல்ஸுக்கு எதிரான லீக் ஆட்டத்தில் லக்னோ சூப்பர் ஜெயண்ட்ஸ் அணி 6 விக்கெட் வித்தியாசத்தில் வெற்றிபெற்றது.
அதன்படி டெல்லி அணிக்கு பிரித்வி ஷாவும் டேவிட் வார்னரும் தொடக்க வீரர்களாக இறங்கினர். தொடக்கம் முதலே வழக்கம்போல அடித்து ஆடிய பிரித்வி ஷா, பவுண்டரிகளாக விளாசினார். அடித்து அனைவருக்கும் ஷோ காட்டும் டேவிட் வார்னரை மறுமுனையில் நிற்க வைத்து ஷோ காட்டினார் பிரித்வி ஷா. பவர்ப்ளேவை பயன்படுத்தி அதிரடியாக ஆடி அரைசதம் அடித்த பிரித்வி ஷா, 34 பந்தில் 61 ரன்கள் அடித்து ஆட்டமிழந்தார். அவர் ஆட்டமிழக்கும்போது டெல்லி அணியின் ஸ்கோரே 67 தான். அதில் 61 ரன்கள் பிரித்வி ஷா அடித்தது.
Trending
அதன்பின்னர் வார்னரை வெறும் 4 ரன்களுக்கு வீழ்த்திய ரவி பிஷ்னோய், ரோவ்மன் பவலை 3 ரன்களுக்கு அனுப்பிவைத்தார். அதன்பின்னர் ரிஷப் பந்த் - சர்ஃபராஸ் கானும் இணைந்து அடித்து ஆட முயற்சித்தனர். ஆனால் லக்னோ அணி பவுலர்கள் அதற்கு அனுமதிக்கவில்லை. வழக்கத்திற்கு மாறாக மிகவும் மந்தமாக ஆடிய ரிஷப் பந்த், ஆண்ட்ரூ டையின் பவுலிங்கில் மட்டும் சில பெரிய ஷாட்டுகளை ஆடினார். ஆனால் ரவி பிஷ்னோய், கிருஷ்ணப்பா கௌதம், ஆவேஷ் கான் ஆகியோரின் பவுலிங்கில் ரிஷப் - சர்ஃபராஸ் கானால் ஒன்றுமே செய்ய முடியவில்லை.
ரிஷப் பந்த் 36 பந்தில் 39 ரன்களும், சர்ஃபராஸ் கான் 28 பந்தில் 36 ரன்களும் அடிக்க, 20 ஓவரில் 149 ரன்கள் மட்டுமே அடித்து டெல்லி கேபிடள்ஸ் அணி, 150 ரன்களை இலக்காக நிர்ணயித்தது.
இதையடுத்து இலக்கை துரத்திய லக்னோ அணிக்கு கேப்டன் கேஎல் ராகுல் - குயின்டன் டி காக் இணை சிறப்பான தொடக்கத்தைக் கொடுத்தனர். இதில் ராகுல் 24 ரன்களில் ஆட்டமிழக்க, மறுமுனையில் அதிரடியில் மிரட்டிய டி காக் அரைசதம் கடந்தார்.
பின்னர் களமிறங்கிய எவின் லூயிஸ் 5 ரன்களில் ஆட்டமிழக்க, சதமடிப்பார் என எதிர்பார்க்கப்பட்ட டி காக்கும் 80 ரன்களில் விக்கெட்டை இழந்தார். இதனால் இப்போட்டியில் யார் வெற்றிபெறுவார் என்ற எதிர்பார்ப்பு ரசிகர்களை இருக்கையின் நுனிக்கு அழைத்து வந்தது.
இருப்பினும் குர்னால் பாண்டியா - தீபக் ஹூடா இணை பொறுப்பாக விளையாடி அணியை வெற்றிக்கு அழைத்துச் சென்றனர். இதன்மூலம் 19.4 ஓவர்களில் லக்னோ சூப்பர் ஜெயண்ட்ஸ் அணி இலக்கை எட்டி 6 விக்கெட் வித்தியாசத்தில் டெல்லி கேப்பிட்டல்ஸை வீழ்த்தியது.
Win Big, Make Your Cricket Tales Now
