ஐபிஎல் தொடரில் இன்று நடைபெறும் 16ஆவது லீக் ஆட்டத்தில் டேவிட் வார்னர் தலைமையிலான டெல்லி கேப்பிட்டல்ஸ் அணியும், ரோஹித் சர்மா தலைமையிலான மும்பை இந்தியன்ஸ் அணிகளும் பலப்பரீட்சை நடத்துகின்றன. டெல்லி அருண் ஜெட்லி மைதானத்தில் நடைபெற்று வரும் இப்போட்டியில் டாஸ் வென்ற மும்பை இந்தியன்ஸ் அணி முதலில் பந்துவீச தீர்மானித்தது.
அதன்படி டெல்லி அணியின் தொடக்க வீரர்களாக கேப்டன் டேவிட் வார்னர் - பிரித்வி ஷா இணை தொடக்கம் கொடுத்தனர். இதில் அதிரடியாக விளையாட முயன்ற பிரித்வி ஷா 15 ரன்களை மட்டுமே எடுத்த நிலையில் ஆட்டமிழந்து பெவிலியன் திரும்பினார். பின்னர் வர்னருடன் இணைந்த மணீஷ் பாண்டே பொறுப்பான ஆட்டத்தை வெளிப்படுத்தி ஸ்கோரை உயர்த்தினார்.
அதன்பின் 26 ரன்களில் மனீஷ் பாண்டே விக்கெட்டை இழக்க, அடுத்து வந்த யாஷ் துல், ரோவ்மன் பாவெல், லலித் யாதவ் ஆகியோர் அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினர். இதையடுத்து வந்த அக்ஸர் படேல் தொடக்கம் முதலே அதிராடியாக விளையாட அணியின் ஸ்கோரும் உயர்ந்தது.
