ஐபிஎல் 2023: பிரப்சிம்ரன் அசத்தல் சதம்; டெல்லிக்கு 168 டார்கெட்!
டெல்லி கேப்பிட்டல்ஸுக்கு எதிரான ஐபிஎல் லீக் ஆட்டத்தில் பஞ்சாப் கிங்ஸ் வீரர் பிரப்சிம்ரன் சிங் சதமடித்து அசத்தினார்.
16ஆவது சீசன் ஐபிஎல் தொடர் பிளே ஆஃப் சுற்றை நெருங்கி வருகிறது. ஆனாலும், இதுவரை ஒரு அணி கூட அதிகாரப்பூர்வமாக பிளே-ஆஃப் சுற்றுக்கு முன்னேறவில்லை. குஜராத் மற்றும் சென்னை அணிகள் மட்டுமே ஓரளவிற்கு வலுவாக முதல் இரண்டு இடங்களில் நீடிக்கின்றன. மீதமுள்ள இரண்டு இடங்களுக்காக டெல்லியை தவிர மற்ற 7 அணிகளும் முட்டி மோதி வருகின்றன.
இதில் இன்று நடைபெறும் 59ஆவது லீக் ஆட்டத்தில் டெல்லி கேப்பிட்டல்ஸ் - பஞ்சாப் கிங்ஸ் அணிகள் பலப்பரீட்சை நடத்துகின்றன. டெல்லி அருண் ஜெட்லி மைதானத்தில் நடைபெறும் இப்போட்டியில் டாஸ் வென்றுள்ள டெல்லி கேப்பிட்டல்ஸ் அணி முதலில் பந்துவீசுவதாக தீர்மானித்தது.
Trending
அதன்படி களமிறங்கிய பஞ்சாப் அணிக்கு கேப்டன் ஷிகர் தவான் - பிரப்ஷிம்ரன் சிங் இணை களமிறங்கினர். இதில் தவான் 7 ரன்களிலும், லியாம் லிவிங்ஸ்டோன் 4 ரன்களிலும், ஜித்தேஷ் சர்மா 5 ரன்களிலும் என அடுத்தது விக்கெட்டுகளை இழந்து ஏமாற்றமளித்தனர்.
இருப்பினும் மறுமுனையில் சிறப்பான ஆட்டத்தை வெளிப்படுத்திய பிரப்ஷிம்ரன் சிங் அரைசதம் கடந்து அணிக்கு நம்பிக்கையளித்தார். அதேசமயம் மறுமுனையில் களமிறங்கிய சாம் கரண் 20 ரன்களிலும், ஹர்ப்ரீத் பிரார் 2 ரன்களிலும் தங்களது விக்கெட்டுகளை இழந்து பெவிலியனுக்கு நடையைக் கட்டினர்.
ஆனாலும் தனது அதிரடியைக் கைவிடாத பிரப்ஷிம்ரான் சிங் 61 பந்துகளில் தனது முதல் ஐபிஎல் சதத்தைப் பதிவுசெய்து அசத்தினார். பின் 10 பவுண்டரி, 6 சிக்சர்கள் என 103 ரன்களை எடுத்திருந்த பிரப்ஷிம்ரன் சிங் ஆட்டமிழந்தார்.
இறுதியில் பஞ்சாப் கிங்ஸ் அணி நிர்ணயிக்கப்பட்ட 20 ஓவர்கள் முடிவில் 7 விக்கெட்டுகளை இழந்து 167 ரன்களைச் சேர்த்தது. டெல்லி கேப்பிட்டல்ஸ் அணி தரப்பில் இஷாந்த் சர்மா 2 விக்கெட்டுகளைக் கைப்பற்றினார்.
Win Big, Make Your Cricket Tales Now
