இந்திய தொடரிலிருந்து விலகிய லுங்கி இங்கிடி; மாற்று வீரர் அறிவிப்பு!

இந்திய அணிக் எதிரான டி20 தொடரில் இருந்து தென் ஆப்பிரிக்கா அணியின் முன்னணி வேகப் பந்துவீச்சாளர் லுங்கி இங்கிடி விலகியுள்ளார்.

இந்திய தொடரிலிருந்து விலகிய லுங்கி இங்கிடி; மாற்று வீரர் அறிவிப்பு! (Image Source: Google)

இந்திய அணி தென் ஆப்பிரிக்காவில் சுற்றுப்பயணம் செய்து 3 போட்டிகள் கொண்ட ஒருநாள், டி20 மற்றும் 2 போட்டிகள் கொண்ட டெஸ்ட் தொடரில் விளையாடவுள்ளது. இத்தொடருக்காக இரு அணிகளும் தீவிரமாக தயாராகி வருகிறது. இந்நிலையில் கணுக்கால் காயம் காரணமாக டி20 தொடரிலிருந்து லுங்கி இங்கிடி விலகியுள்ளார். 

முன்னதாக அவர் இந்திய அணிக்கு எதிரான முதல் இரண்டு டி20 போட்டிகளிலும், அதன் பின் டெஸ்ட் போட்டிக்கான பயிற்சியாக இந்தியா ஏ அணிக்கு எதிரான போட்டியிலும் விளையாட இருந்தார். அதன் பின் டெஸ்ட் தொடரில் தென் ஆப்பிரிக்க அணியின் முக்கிய பந்துவீச்சாளராக இருப்பார் என கருதப்பட்ட நிலையில், அவர் தற்போது டெஸ்ட் தொடரை தவிர்த்து டி20 தொடர் மற்றும் பயிற்சிப் போட்டியில் இருந்து விலகியுள்ளார்.

அவருக்கு பதிலாக டி20 அணியில் பியூரன் ஹென்ரிக்ஸ் சேர்க்கப்பட்டுள்ளார். அவர் இதுவரை தென் ஆப்பிரிக்கா அணிக்காக 19 டி20 போட்டிகளில் விளையாடி உள்ளார். ஆனால், 2021 ஜூலைக்கு பின் அவர் தென் ஆப்பிரிக்க டி20 அணியில் இடம் பெறவில்லை. லுங்கி இங்கிடி இல்லாத நிலையில், தென் ஆப்பிரிக்க டி20 அணியில் மூன்று முதன்மை வேகப் பந்துவீச்சாளர்களும் இல்லாதா நிலை ஏற்பட்டுள்ளது.

முன்னதாக மூத்த வேகப் பந்துவீச்சாளர் ககிசோ ரபாடாவுக்கு டி20 தொடரில் ஓய்வு அளிக்கப்பட்டு இருந்தது. மற்றொரு முக்கிய வேகப் பந்துவீச்சாளர் அன்ரிச் நோர்ட்ஜே காயம் காரணமாக அணியில் இருந்து நீக்கப்பட்டு இருக்கிறார். முன்னணி வேகப் பந்துவீச்சாளர்கள் இல்லாத நிலையில் அணியில் ஏற்கனவே இடம் பெற்று இருக்கும் மார்கோ ஜான்சென், ஜெரால்ட் கோட்ஸி, லிசாட் வில்லியம்ஸ் போன்ற அடுத்தகட்ட வேகப் பந்துவீச்சாளர்களுக்கு வாய்ப்பு கிடைக்கும் என எதிர்பார்க்கப்படுகிறது.

Win Big, Make Your Cricket Tales Now