CT 2025: முன்னணி வீரர்கள் விலகல்; ஆஸ்திரேலிய அணியின் கேப்டனாக ஸ்டீவ் ஸ்மித் நியமனம்!

சாம்பியன்ஸ் கோப்பை தொடருக்கான இறுதிசெய்யப்பட்ட ஆஸ்திரேலிய அணியின் கேப்டனாக ஸ்டீவ் ஸ்மித் நியமிக்கப்பட்டுள்ளார்.

CT 2025: முன்னணி வீரர்கள் விலகல்; ஆஸ்திரேலிய அணியின் கேப்டனாக ஸ்டீவ் ஸ்மித் நியமனம்! (Image Source: Google)

பாகிஸ்தான் மற்றும் ஐக்கிய அரபு அமீரகத்தில் நடைபெற இருக்கும் சாம்பியன்ஸ் கோப்பை தொடருக்கான இறுதிசெய்யப்பட்ட 15 பேர் கொண்ட ஆஸ்திரேலிய அணி இன்று அறிவிக்கப்பட்டுள்ளது. முன்னதாக அறிவிக்கப்பட்ட அணியில் பாட் கம்மின்ஸ் கேப்டனாக நியமிக்கப்பட்டதுடன், மிட்செல் மார்ஷ், ஜோஷ் ஹேசில்வுட், மிட்செல் ஸ்டார்க், மார்கஸ் ஸ்டொய்னிஸ் உள்ளிட்டோர் இடம்பிடித்திருந்தனர். 

இதில் அணியின் கேப்டன் பாட் கம்மின்ஸ், ஜொஷ் ஹேசில்வுட், மிட்செல் மார்ஷ் ஆகியோர் காயம் காரணமாக இந்த தொடரில் இருந்து விலகிய நிலையில், ஆல் ரவுண்டர் மார்கஸ் ஸ்டொய்னிஸ் சர்வதேச ஒருநாள் கிரிக்கெட்டில் இருந்து ஓய்வு பெறுவதாக அறிவித்து இத்தொடரில் இருந்து விலகினார். இந்நிலையில் இலங்கை சுற்றுப்பயணத்தில் விளையாடி வந்த மிட்செல் ஸ்டார்க்கும் தனிப்பட்ட காரணங்களால் இத்தொடரில் இருந்து விலகுவதாக இன்று அறிவிக்கப்பட்டுள்ளது. 

அணியின் முன்னணி வீரர்கள் அடுத்தடுத்து விலகியுள்ளது அந்த அணிக்கு பெரும் பின்னடைவை ஏற்படுத்தியுள்ளது. இந்நிலையில் தான் இறுதிசெய்யப்பட்ட அணியை ஆஸ்திரேலிய கிரிக்கெட் வாரியம் இன்று அறிவித்துள்ளது. அந்தவகையில் எதிர்வரும் சாம்பியன்ஸ் கோப்பை தொடருக்கான ஆஸ்திரேலிய அணியின் கேப்டனாக ஸ்டீவ் ஸ்மித் நியமிக்கப்பட்டுள்ளார். மேற்கொண்டு துணைக்கேப்டனாக டிராவிஸ் ஹெட் நியமிக்கப்பட்டுள்ளார். 

அதேசமயம் தொடரில் இருந்து விலகியுள்ள பாட் கம்மின்ஸ், ஜோஷ் ஹேசில்வுட், மிட்செல் ஸ்டார்க், மிட்செல் மார்ஷ் மற்றும் மார்க்கஸ் ஸ்டொய்னிஸ் ஆகியோருக்கு பதிலாக பென் துவார்ஷூயிஸ், ஜேக் ஃபிரேசர்-மெக்குர்க், ஸ்பென்சர் ஜான்சன், தன்வீர் சங்கா மற்றும் சீன் அபோட் ஆகியோர் சாம்பியன்ஸ் கோப்பை தொடருக்கான ஆஸ்திரேலிய அணியில் சேர்க்கப்பட்டுள்ளனர். அதேசமயம் கூப்பர் கன்னொலி ரிஸர்வ் வீரராக அணியில் சேர்க்கப்பட்டுள்ளார். 

Australia's Updated Squad For Champions Trophy! #Australia #ChampionsTrophy pic.twitter.com/EiB0GwI2f7

— CRICKETNMORE (@cricketnmore) February 12, 2025

இந்நிலையில் மிட்செல் ஸ்டார்க் தொடரில் இருந்து விலகியது குறித்து பேசிய ஆஸ்திரேலிய தேர்வுக்குழு தலைவர் ஜார்ஜ் பெய்லி, "மிட்செல் ஸ்டார்க்கின் முடிவை நாங்கள் புரிந்துகொண்டு மதிக்கிறோம்.சர்வதேச கிரிக்கெட்டிற்கான அவரது அர்ப்பணிப்பு மற்றும் ஆஸ்திரேலியாவுக்காக சிறப்பாக செயல்படுவதற்கான அவரது முன்னுரிமைக்காக அவர் பெரிதும் மதிக்கப்படுகிறார். அவர் இல்லாதது அணிக்கு பின்னடைவை ஏற்படுத்தினாலும், வேறு வீரருக்கு அந்த வாய்ப்பு கிடைக்கும்” என்று தெரிவித்துள்ளார்.

சாம்பியன்ஸ் கோப்பை தொடருக்கான ஆஸ்திரேலிய அணி: ஸ்டீவ் ஸ்மித் (கேப்டன்), சீன் அபோட், அலெக்ஸ் கேரி, பென் துவார்ஷூயிஸ், நாதன் எல்லிஸ், ஜேக் ஃபிரேசர்-மெக்குர்க், ஆரோன் ஹார்டி, டிராவிஸ் ஹெட், ஜோஷ் இங்கிலிஸ், ஸ்பென்ஸர் ஜான்சன், மார்னஸ் லபுஷாக்னே, கிளென் மேக்ஸ்வெல், தன்வீர் சங்கா, மேத்யூ ஷார்ட், ஆடம் ஸாம்பா, கூப்பர் கன்னோலி(ரிஸர்வ் வீரர்)