நியூசிலாந்து ஒப்பந்தத்தில் சேர்க்கப்பட்ட நாதன் ஸ்மித், ஜோஷ் கிளார்க்சன்!

நியூசிலாந்து கிரிக்கெட் வாரியத்தின் மத்திய ஒப்பந்தத்தில் நாதன் ஸ்மித் மற்றும் ஜோஷ் கிளார்க்சன் ஆகியோர் சேர்க்கப்பட்டுள்ளதாக அந்நாட்டு கிரிக்கெட் வாரியம் அறிவித்துள்ளது.

நியூசிலாந்து ஒப்பந்தத்தில் சேர்க்கப்பட்ட நாதன் ஸ்மித், ஜோஷ் கிளார்க்சன்! (Image Source: Google)

சமீபகாலங்களில் டி20 கிரிக்கெட் மீதான ஆர்வமும், எதிர்பார்ப்புகளும் ரசிகர்கள் மத்தியில் பெரும் உச்சத்தை எட்டியுள்ளது. இதனால் கிரிக்கெட் வீரர்களும் உலகளவில் நடைபெறும் டி20 பிரான்சைஸ் கிரிக்கெட் தொடர்களில் விளையாட அதிகம் ஆர்வம் காட்டுகின்றன. முன்பெல்லாம் வீரர்கள் தங்களுக்கு எந்தவொரு சர்வதேச போட்டிகளும் இல்லாத சமயத்தில் தான் இதுபோன்ற டி20 பிரான்சைஸ் லீக் தொடரில் விளையாடி வந்தனர்.

ஆனால் சமீப காலங்களில் பிரான்சைஸ் கிரிக்கெட் போட்டிகளில் விளையாடுவதன் மூலம் அதிக பணம் ஈட்டமுடியும் என்ற காரணத்தால் பெரும்பாலான வீரர்கள் தங்கள் சொந்த நாட்டிற்காக விளையாடாமல் லீக் போட்டிகளில் விளையாடுவதை வாடிக்கையாக கொண்டுள்ளனர். அந்தவகையில் நியூசிலாந்தின் நட்சத்திர வீரர் டிரென்ட் போல்ட் அணியின் மத்திய ஒப்பந்தத்தில் இருந்து வெளியேறியதுடன், தேவைப்படும் நேரங்களில் மட்டும் தேசிய அணிக்காக விளையாடிவிட்டு, மீதமிருக்கும் நேரங்களில் டி20 லீக் போட்டிகளில் பங்கேற்று வருகிறார்.

மேற்கொண்டு நடந்து முடிந்த ஐசிசி ஆடவர் டி20 உலகக்கோப்பை கிரிக்கெட் தொடரின் படுதோல்விக்கு பிறகு அணியின் கேப்டன் பதவியில் இருந்து விலகிய கேன் வில்லியம்சன், தனது ஓபந்தத்தையும் ரத்து செய்வதாக அறிவித்தார்.  இந்நிலையில் அவர்களது வரிசையில் நியூசிலாந்து அணியின் நட்சத்திர வீரர்கள் டெவான் கான்வே, ஃபின் ஆலனும் இணைந்துள்ளனர். 

இருவரும் சர்வதேச அளவிலான பிரான்சைஸ் டி20 லீக் தொடர்களில் விளையாடிவரும் சூழலில், அவர்கள் நியூசிலாந்தின் ஒப்பந்தத்தில் இருந்து வெளியேறுவதாக அறிவித்தனர். இருப்பினும் இருவரும் சர்வதேச போட்டிகளில் நியூசிலாந்து அணிக்காகவும் விளையாடவுள்ளனர். ஆனால் அவர்கள் தேவைப்படும் நேரங்களில் அணியில் இருந்து விலகி பிறநாட்டு டி20 லீக் தொடர்களில் பங்கேற்கும் வகையில் தங்கள் மத்திய ஒப்பந்தங்களை ரத்து செய்துள்ளனர். 

இந்நிலையில் இவர்களுக்கு பதிலாக புதுமுக வீரர்களான நாதன் ஸ்மித் மற்றும் ஜோஷ் கிளார்க்சன் ஆகியோருக்கு நியூசிலாந்து கிர்க்கெட் வாரியத்தின் ஒப்பந்தத்தில் சேர்க்கப்பட்டுள்ளனர். இதன்மூலம், 2024 - 2025 வரையிலான நியூசிலாந்து கிரிக்கெட் வாரியத்தின் மத்திய ஒப்பந்த பட்டியலில் அவர்கள் இருவரும் இடம்பிடித்துள்ளனர். இதன்மூலம் நியூசிலாந்தின் ஒப்பந்தம் பெற்ற வீரர்களின் எண்ணிக்கை 20ஆக உயர்ந்துள்ளது குறிப்பிடத்தக்கது. 

நியூசிலாந்து ஒப்பந்த பட்டியலில் இடம்பிடித்துள்ள வீரர்கள்: டாம் பிளன்டெல், மைக்கேல் பிரேஸ்வெல், மார்க் சாப்மேன், ஜோஷ் கிளார்க்சன், ஜேக்கப் டஃபி, மேட் ஹென்றி, கைல் ஜேமிசன், டாம் லேதம், டேரில் மிட்செல், ஹென்றி நிக்கோலஸ், வில் ஓ'ரூர்க், அஜாஸ் படேல், கிளென் பிலீப்ஸ், ரச்சின் ரவீந்திரா, மிட்செல் சான்ட்னர், பென் சியர்ஸ், நாதன் ஸ்மித், இஷ் சோதி, டிம் சௌதி, வில் யங்.