ரஞ்சி கோப்பை 2022/23: அபிஷேக், ரிக்கி பூய் அபாரம்; வலிமையான நிலையில் ஆந்திரா!

தமிழ்நாடு அணிக்கெதிரான ரஞ்சி கோப்பை போட்டியின் முதல்நாள் ஆட்டநேர மிடிவில் ஆந்திர பிரதேச அணி 5 விக்கெட் இழப்பிற்கு 277 ரன்களைச் சேர்த்துள்ளது.

Ranji Trohpy 2022 -23:Ricky Bhui & Karan Shinde's partnership helps Andhra take good position! (Image Source: Google)

இந்தியாவின் பாரம்பரியமிக்க கிரிக்கெட் தொடரான ரஞ்சி கோப்பை தொடரின் நடப்பாண்டு சீசன் விறுவிறுப்பாக நடைபெற்று வருகிறது. இதில் ஹைதராபாத் அணிக்கு எதிரான முதல் ஆட்டத்தை டிரா செய்த தமிழ்நாடு அணி, 3 புள்ளிகளைப் பெற்றது. இதையடுத்து 2ஆவது ஆட்டத்தில் ஆந்திராவை எதிர்கொள்கிறது.

தமிழ்நாடு - ஆந்திரா அணிகளுக்கு இடையிலான ரஞ்சி ஆட்டம் கோயம்புத்தூர் எஸ்என்ஆர் கல்லூரி மைதானத்தில் நடைபெற்று வருகிறது. இப்போட்டியில் டாஸ் வென்ற ஆந்திர அணி பேட்டிங்கைத் தேர்வு செய்து விளையாடி வருகிறது. தமிழக அணியில் வாஷிங்டன் சுந்தர் இடம்பெற்றுள்ளார்.

அதன்படி களமிறங்கிய ஆந்திர அணியின் தொடக்க வீரர் உபாரா கிரிநாத் 3 ரன்களில் ஆட்டமிழந்து ஏமாற்றமளித்தார். பின்னர் ஜோடி சேர்ந்த அபிஷேக் ரெட்டி - ஷிக் ரஷீத் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் அபார ஆட்டத்தை வெளிப்படுத்திய அபிஷேக் அரைசதம் கடந்தார்.

பின்னர் மறுமுனையில் அரைசதம் நோக்கி நர்ந்த் கொண்டிருந்த ரஷீத் 37 ரன்களில் ஆட்டமிழக்க, அடுத்து வந்த கேப்டன் ஹனுமா விஹாரியும் 21 ரன்களில் நடையைக் கட்டினார். இருப்பினும் சதமடித்து அசத்துவார் என எதிர்பார்க்கப்பட்ட அபிஷேக் ரெட்டி 8 பவுண்டரி, 2 சிக்சர்கள் என மொத்தம் 85 ரன்களைச் சேர்த்து விக்கெட்டை இழந்தார்.

இதையடுத்து ஜோடி சேர்ந்த ரிக்கி பூய் - கரண் சிண்டே இணை சிறப்பான ஆட்டத்தை வெளிப்படுத்தி அரைசதம் கடந்துடன் அணியின் ஸ்கோரையும் உயர்த்தினர். இதில் ரிக்கி பூய் 68 ரன்களில் ஆட்டமிழக்க, கரண் சிண்டே 55 ரன்களுடன் களத்தில் உள்ளார்.

இதன்மூலம் முதல்நாள் ஆட்டநேர முடிவில் ஆந்திர பிரதேச அணி 5 விக்கெட் இழப்பிற்கு 277 ரன்களைச் சேர்த்துள்ளது. தமிழ்நாடு தரப்பில் சாய் கிஷோர் 2 விக்கெட்டுகளைக் கைப்பற்றியுள்ளார்.