எஸ்ஏ20 2025: கான்வே, சிபம்லா அசத்தல்; சன்ரைசர்ஸை வீழ்த்தி சூப்பர் கிங்ஸ் அபார வெற்றி!
சன்ரைசர்ஸ் ஈஸ்டர்ன் கேப் அணிக்கு எதிரான லீக் போட்டியில் ஜோபர்க் சூப்பர் கிங்ஸ் அணி 9 விக்கெட் வித்தியாசத்தில் வெற்றிபெற்று அசத்தியது.
தென் ஆப்பிரிக்காவில் நடைபெற்று வரும் எஸ்ஏ20 லீக் தொடரின் மூன்றாவது சீசன் இறுதிக்கட்டத்தை நெருங்கி வருகிறது. இதில் இன்று நடைபெற்ற 22ஆவது லீக் ஆட்டத்தில் ஜோபர்க் சூப்பர் கிங்ஸ் மற்றும் சன்ரைசர்ஸ் ஈஸ்டர்ன் கேப் அணிகள் பலப்பரீட்சை நடத்தின. ஜொஹன்னஸ்பர்க் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற சன்ரைசர்ஸ் ஈஸ்டர்ன் கேப் அணி முதலில் பேட்டிங் செய்வதாக அறிவித்தது.
இதையடுத்து களமிறங்கிய சன்ரைசர்ஸ் அணிக்கு ஸாக் கிரௌலி மற்றும் டேவிட் பெட்டிங்ஹாம் இனை தொடக்கம் கொடுத்தனர். இதில் ஸாக் கிரௌலி இன்னிங்ஸின் முதல் பந்திலேயே விக்கெட்டை இழக்க, அடுத்து களமிறங்கிய டாம் அபெலும் முதல் ஓவரிலேயே ரன்கள் ஏதுமின்றி ஆட்டமிழந்தார். ஒருபக்கம் பெடிங்ஹாம் சிறப்பாக விளையாடி ஸ்கோரை உயர்த்திய நிலையில், மறுபக்கம் களமிறங்கிய ஜோர்டன் ஹார்மன் மற்றும் கேப்டன் ஐடன் மார்க்ரம் ஆகியோரும் அடுத்தடுத்து ரன்கள் ஏதுமின்றி விக்கெட்டுகளை இழந்து ஏமாற்றமளித்தனர்.
Trending
இதனால் அந்த அணி 17 ரன்களில் 4 விக்கெட்டுகளை இழந்து தடுமாறியது. பின்னர் இணைந்த பெடிங்ஹாம் மற்றும் டிரிஸ்டன் ஸ்டப்ஸ் பொறுப்புடன் விளையாடி விக்கெட் இழப்பை தடுத்ததுடன் அணியின் ஸ்கோரையும் உயர்த்தினர். இருவரும் இணைந்து ஐந்தாவது விக்கெட்டிற்கு 50 ரன்களுக்கு மேல் பார்ட்னர்ஷிப் அமைத்த நிலையில், பெடிங்ஹாம் 40 ரன்களில் விக்கெட்டை இழந்து அரைசதம் அடிக்கும் வாய்ப்பை தவறவிட்டார். அவரைத்தொடர்ந்து களமிறங்கிய மார்கோ ஜான்சன் 22 ரன்களிலும், டிரிஸ்டன் ஸ்டப்ஸ் 37 ரன்களிலும் என தங்கள் விக்கெட்டுகளை இழந்தானர்.
அவர்களைத் தொடர்ந்து களமிறங்கிய வீரர்களும் எதிரணி பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர். இதனால் சன்ரைசர்ஸ் ஈஸ்டர்ன் கேப் அணி 19 ஓவர்களிலேயே அனைத்து விக்கெட்டுகளையும் இழந்து 118 ரன்களுக்கு ஆல் அவுட்டானது. சூப்பர் கிங்ஸ் தரப்பில் அபாரமான பந்துவீச்சை வெளிப்படுத்திய ஹார்டுஸ் வில்ஜோன் 4 விக்கெட்டுகளையும், லுதோ சிபம்லா 3 விக்கெட்டுகளையும் கைப்பற்றினர்.
இதனையடுத்து இலக்கை நோக்கி விளையாடிய சூப்பர் கிங்ஸ் அணிக்கு கேப்டன் ஃபாஃப் டூ பிளெசிஸ் - டெவான் கான்வே இணை தொடக்கம் கொடுத்தனர். இதில் கான்வே ஒருபக்கம் அதிரடியாக விளையாடி வந்த நிலையில், கேப்டன் ஃபாஃப் டூ பிளெசிஸ் 15 ரன்களில் தனது விக்கெட்டை இழந்து பெவிலியன் திரும்பினார். பின்னர் கான்வேவுடன் இணைந்த விஹான் லூபேவும் சிறப்பான ஆட்டத்தை வெளிப்படுத்த அணியின் வெற்றியும் உறுதியானது. இப்போட்டியில் அபாரமான ஆட்டத்தை வெளிப்படுத்திய டெவான் கான்வே அரைசதம் கடந்து அசத்தினார்.
Also Read: Funding To Save Test Cricket
இப்போட்டியில் இறுதிவரை ஆட்டமிழக்காமல் இருந்த டெவான் கான்வே 11 பவுண்டரி, 3 சிக்சர்கள் என 76 ரன்களையும், விஹான் லூபே 3 பவுண்டரி, ஒரு சிக்ஸர் என 25 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் ஜோபர்க் சூப்பர் கிங்ஸ் அணி 14 ஓவர்களிலேயே இலக்கை எட்டியதுடன் 9 விக்கெட் வித்தியாசத்தில் சன்ரைசர்ஸ் ஈஸ்டர்ன் கேப் அணியை வீழ்த்தி அபார வெற்றியைப் பதிவுசெய்து அசத்தியது. இப்போட்டியில் அபார பந்துவீச்சை வெளிப்படுத்திய லுதோ சிபம்லா ஆட்டநாயகன் விருதை வென்றார்.
Win Big, Make Your Cricket Tales Now
