நெதர்லாந்து அணியை புகழ்ந்துதள்ளிய சச்சின் டெண்டுல்கர்!

களத்தில் நெதர்லாந்து அணியிடம் எனக்கு மிகவும் மகிழ்ச்சியாக இருந்தது என்னவென்றால், அவர்கள் எப்படி தென் ஆப்பிரிக்க பேட்ஸ்மேன்களுக்கு சிங்கிள் ரன் எடுக்க விடாமல் தடுத்தார்கள் என்பதுதான் என சச்சின் டெண்டுல்கர் தெரிவித்துள்ளார்.

நெதர்லாந்து அணியை புகழ்ந்துதள்ளிய சச்சின் டெண்டுல்கர்! (Image Source: Google)

இந்தியாவில் நடைபெற்று வரும் ஒருநாள் கிரிக்கெட் உலகக்கோப்பை தொடரில் இந்த வாரம் அப்செட் வாரமாக அமைந்து ரசிகர்களுக்கு எக்கச்சக்க உற்சாகத்தை அளித்திருக்கிறது. இரு நாட்களுக்கு முன்பாக டெல்லியில் நடைபெற்ற போட்டியில் ஆப்கானிஸ்தான் அணி இங்கிலாந்து அணியை வீழ்த்தி எல்லோருக்கும் ஆச்சரியத்தையும் அதிர்ச்சியையும் கொடுத்தது.

நடப்பு இங்கிலாந்து அணி வெள்ளைப் பந்து கிரிக்கெட்டில் அசுர பலம் கொண்ட அணியாக இருக்கிறது. அவர்களுடைய பிளேயிங் லெவனில் 11 பேரும் பேட்டிங் செய்ய முடியும். அப்படிப்பட்ட ஒரு அணியை ஆப்கானிஸ்தான் வீழ்த்தியது பேராச்சரியத்தை உண்டாக்கியது. இதன் காரணமாகவே இதுவரை நடைபெற்ற ஒருநாள் கிரிக்கெட் உலகக்கோப்பை தொடரில் அப்செட் போட்டிகளில், இந்தப் போட்டிதான் முதலிடத்தில் இருக்கிறது என்று பல முன்னாள் வீரர்களும் கூறுகிறார்கள்.

இதன் பரபரப்பு அடங்கும் முன்பாகவே நேற்று தரம்சாலா மைதானத்தில் வைத்து நெதர்லாந்து அணி தென் ஆப்பிரிக்க அணியை மிக எளிதாக வென்று, ரசிகர்களின் உற்சாகத்தை இன்னும் அதிகரித்து இருக்கிறது. இதன் காரணமாக நடப்பு ஒருநாள் கிரிக்கெட் உலகக் கோப்பை தொடரில் அரை இறுதி வாய்ப்புக்கு யாருக்கும் எந்த கதவுகளும் சாத்தப்படாமல் இருக்கிறது. இதன் காரணமாக யார் வேண்டுமானாலும் வெளியேறலாம் என்பது, ரசிகர்களுக்கு சுவாரசியத்தை கூட்டுகிறது.

 

This World Cup is throwing up interesting results!
Was nice to see the Netherlands Captain Scott Edwards lead from the front with a fighting knock after they were 140/7 at one stage.

What pleased me the most about them in the field was how they put the SA batters under pressure… pic.twitter.com/5YeQCyvJqo

— Sachin Tendulkar (@sachin_rt) October 17, 2023

நேற்றைய போட்டியில் தென் ஆப்பிரிக்க அணியை நெதர்லாந்து வீழ்த்தியது குறித்து ட்விட் செய்த சச்சின் “இந்த உலகக் கோப்பை சுவாரசியமான முடிவுகளை தந்து கொண்டிருக்கிறது. ஒரு கட்டத்தில் 140 ரன்கள் 7 விக்கெட் என்று இருந்து, பின்பு கேப்டன் எட்வர்ட்ஸ் செய்த சண்டையின் மூலமாக நெதர்லாந்து முன்னிலைக்கு வந்ததை பார்க்க மகிழ்ச்சியாக இருந்தது. களத்தில் அவர்களிடம் எனக்கு மிகவும் மகிழ்ச்சியாக இருந்தது என்னவென்றால், அவர்கள் எப்படி தென் ஆப்பிரிக்க பேட்ஸ்மேன்களுக்கு சிங்கிள் ரன் எடுக்க விடாமல் தடுத்தார்கள் என்பதுதான். அவர்களுடைய இந்த வெற்றி எப்பொழுதும் நினைவில் இருக்கும்” என்று கூறியுள்ளார்.