SCO vs ZIM: வில்லியம்ஸ் அதிரடியில் ஸ்காட்லாந்தை வீழ்த்தியது ஜிம்பாப்வே!

ஸ்காட்லாந்து அணிக்கெதிரான இரண்டாவது டி20 போட்டியில் ஜிம்பாப்வே அணி 10 ரன்கள் வித்தியாசத்தில் வெற்றிபெற்றது.

ஸ்காட்லாந்து - ஜிம்பாப்வே அணிகளுக்கு இடையேயான இரண்டாவது நேற்று நடைபெற்றது. இப்போட்டியில் டாஸ் வென்ற ஜிம்பாப்வே அணி முதலில் பேட்டிங் செய்யத்தீர்மானித்தது. 

அதன்படி களமிறங்கிய ஜிம்பாப்வே அணிக்கு தொடக்க வீரர்கள் சொற்ப ரன்களில் ஆட்டமிழந்து ஏமாற்றமளித்தனர். பின்னர் ஜோடி சேர்ந்த கேப்டன் எர்வின் - வில்லியம்ஸ் இணை அதிரடியாக விளையாடி அணியின் ஸ்கோரை உயர்த்தியது. 

இதில் எர்வின் 30 ரன்களில் ஆட்டமிழக்க, வில்லியம்ஸ் அரைசதம் கடந்து அசத்தினார். இதனால் 20 ஓவர்கள் முடிவில் ஜிம்பாப்வே அணி 5 விக்கெட்டுகளை இழந்து 136 ரன்களைச் சேர்த்தது. 

பின் வெற்றி இலக்கை நோக்கி களமிறங்கிய ஸ்காட்லாந்து அணி வீரர்கள் ஆரம்பம் முதலே எதிரணி பந்துவீச்சை சமாளிக்க முடியாமல் தடுமாறினர். இருப்பினும் பெர்ரிங்டன் - மேத்யூ கிராஸ் இணை நிதானமாக விளையாடி ரன்குவிப்பில் ஈடுபட்டது. 

இருப்பினும் அந்த அணி 19.4 ஓவர்களில் அனைத்து விக்கெட்டுகளையும் இழந்து 126 ரன்களை மட்டுமே எடுத்தது. இதன் மூலம் ஜிம்பாபே அணி 10 ரன்கள் வித்தியாசத்தில் ஸ்காட்லாந்தை வீழ்த்தி, டி20 தொடரில் 1-1 என்ற கணக்கில் சமநிலை பெற்றுள்ளது.