SL vs BAN, 2nd T20I: இலங்கையை பந்தாடி தொடரை சமன்செய்த வங்கதேசம்!
இலங்கை அணிக்கு எதிரான இரண்டாவது டி20 போட்டியில் வங்கதேச அணி 83 ரன்கள் வித்தியாசத்தில் அபார வெற்றியைப் பதிவுசெய்து அசத்தியுள்ளது.
இலங்கையில் சுற்றுப்பயணம் செய்து வரும் வங்கதேச அணி தற்சமயம் மூன்று போட்டிகள் கொண்ட டி20 தொடரில் விளையாடி வருகிறது. இதில் நடந்து முடிந்த முதல் டி20 போட்டியில் இலங்கை அணி வெற்றிபெற்று 1-0 என்ற கணக்கில் தொடரில் முன்னிலை வகிக்கிறது. இதனையடுத்து இலங்கை - வங்கதேச அணிகளுக்கு இடையேயான இரண்டாவது டி20 போட்டி நாளை தம்புளாவில் உள்ள ரங்கிரி தம்புளா சர்வதேச கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற இலங்கை அணி முதலில் பந்துவீசுவதாக அறிவித்து வங்கதேசத்தை பேட்டிங் செய்ய அழைத்தது.
அதன்படி களமிறங்கிய வங்கதேச அணிக்கு தொடக்கம் சிறப்பானதாக அமையவில்லை. அணியின் தொடக்கம் வீரர்கள் பர்வேஸ் ஹொசைன் எமான் ரன்கள் ஏதுமின்றியும், தன்ஸித் ஹச்ன் தமிம் 5 ரன்னிலும் என விக்கெட்டுகளை இழந்தனர். அதன்பின் ஜோடி சேர்ந்த கேப்டன் லிட்டன் தாஸ் மற்றும் தாவ்ஹித் ஹிரிடோய் இணை பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் இருவரும் இணைந்து 69 ரன்கள் பார்ட்னர்ஷிப் அமைத்திருந்த நிலையில் தாவ்ஹித் ஹிரிடோய் 2 பவுண்டரி, ஒரு சிக்ஸர் என 31 ரன்களில் தனது விக்கெட்டை இழந்தார்.
அவரைத்தொடர்ந்து களமிறங்கிய மெஹிதி ஹசன் மிராஸும் ஒரு ரன் மட்டுமே எடுத்த கையோடு விக்கெட்டை இழந்தார். இருப்பினும் மறுமுனையில் சிறப்பான ஆட்டத்தை வெளிப்படுத்தி வந்த கேப்டன் லிட்டன் தாஸ் தனது அரைசதத்தைப் பதிவுசெய்தார். அவருடன் இணைந்த ஷமிம் ஹொசைனும் அதிரடியாக விளையாடிய நிலையில் அணியின் ஸ்கோரும் மளமளவென உயரத்தொடங்கியது. இதில் இருவரும் சேர்ந்து 5ஆவது விக்கெட்டிற்கு 70 ரன்களுக்கு மேல் பார்ட்னர்ஷிப் அமைத்திருந்த நிலையில் ஒரு பவுண்டரி, 5 சிக்ஸர்கள் என 76 ரன்களைச் சேர்த்து விக்கெட்டை இழந்தார்.
இறுதியில் அரைசதத்தை நெருங்கிய ஷமிம் ஹொசைனும் 5 பவுண்டரிகள், 2 சிக்ஸர்களுடன் 48 ரன்களில் ஆட்டமிழந்து அரைசதம் கடக்கும் வாய்ப்பை தவறவிட்டனர். இதன் காரணமாக வங்கதேச அணி 20 ஓவர்கள் முடிவில் 7 விக்கெட்டுகள் இழப்பிற்கு 177 ரன்களைச் சேர்த்தது. இலங்கை அணி தரப்பில் பினுரா ஃபெர்னாண்டோ 3 விக்கெட்டுகளையும், மஹீஷ் தீக்ஷனா, நுவான் துஷாரா ஆகியோர் தலா ஒரு விக்கெட்டையும் கைப்பற்றினர். அதன்பின் இலக்கை நோக்கி விளையாடிய இலங்கை அணிக்கு பதும் நிஷங்கா - குசால் மெண்டிஸ் இணை தொடக்கம் கொடுத்தனர்.
இதில் குசால் மெண்டிஸ் 8 ரன்களில் விக்கெட்டை இழக்க, அடுத்து களமிறங்கிய குசால் பெரேரா ரன்கள் ஏதுமின்றியும், அவிஷ்கா ஃபெர்னாண்டோ 2 ரன்னிலும், கேப்டன் சரித் அசலங்கா 5 ரன்னிலும் என அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினர். அதன்பின் அணியின் மற்றொரு தொடக்க வீரரான பதும் நிஷங்கா 2 பவுண்டரி, ஒரு சிக்ஸர் என 32 ரன்களில் ஆட்டமிழக்க, அதன்பின் களமிறங்கிய சமிகா கருணரத்னே ரன்கள் ஏதுமின்றியும், தசுன் ஷனகா 20 ரன்னிலும் என அடுத்தடுத்து ஆட்டமிழக்க இலங்கை அணியின் தோல்வியும் உறுதியானது.
Also Read: LIVE Cricket Score
பின்ன்ர் களமிறங்கிய வீரர்களாலும் எதிரணி பந்துவீச்சுக்கு ஈடுகொடுக்க முடியாமல் அடுத்தடுத்து ஆட்டமிழந்து ஏமாற்றமளித்தனர். இதனால் இலங்கை அணி 15.2 ஓவர்களில் அனைத்து விக்கெட்டுகளையும் இழந்து வெறும் 94 ரன்களிலேயே ஆல் அவுட்டானது. வங்கதேச அணி தரப்பில் ரிஷாத் ஹொசைன் 3 விக்கெட்டுகளையும், ஷொரிஃபுல் இஸ்லாம், முகமது சைஃபுதின் ஆகியோர் தலா 2 விக்கெட்டுகளையும் கைப்பற்றினர். இதன்மூலம் வங்கதேச அணி 83 ரன்கள் வித்தியாசத்தில் இலங்கை அணியை வீழ்த்தி வெற்றிபெற்றதுடன் 1-1 என்ற கணக்கில் டி20 தொடரையும் சமன்செய்துள்ளது.
Win Big, Make Your Cricket Tales Now
