சையத் முஷ்டாக் அலி: ஜெகதீசன், விஜய் சங்கர் அதிரடியில் தமிழ்நாடு அபார வெற்றி!

சையத் முஷ்டாக் அலி தொடரில் இன்று நடைபெற்ற லீக் ஆட்டத்தில் பஞ்சாப் அணியை 7 விக்கெட் வித்தியாசத்தில் தமிழ்நாடு அணி வீழ்த்தியது..

இந்தியாவின் உள்ளூர் டி20 தொடரான சையத் முஷ்டாக் அலி தொடர் விறுவிறுப்பாக நடைபெற்றுவருகிறது. இதில் இன்று நடைபெற்ற லீக் ஆட்டத்தில் தமிழ்நாடு அணி, பஞ்சாப் அணியை எதிகொண்டது. 

இப்போட்டியில் டாஸ் வென்று முதலில் பேட்டிங் செய்த பஞ்சாப் அணி, தமிழ்நாடு அணி பந்துவீச்சை எதிர்கொள்ள முடியாமல் அடுத்தடுத்து விக்கெட்டுகளை இழந்தது. இதனால் 20 ஓவர்கள் முடிவில் பஞ்சாப் அணி 6 விக்கெட்டுகளை இழந்து 146 ரன்களை மட்டுமே சேர்த்தது. 

இதில் அதிகபட்சமாக குர்கிராட் சிங் 43 ரன்களையும், ஷுப்மன் கில் 34 ரன்களையும் சேர்த்தனர். தமிழ்நாடு அணி தரப்பில் சந்தீப் வாரியர் 2 விக்கெட்டுகளைக் கைப்பற்றினார். 

இதையடுத்து இலக்கை நோக்கி களமிறங்கிய தமிழ்நாடு அணியில் ஹரி நிஷாங்த், பாபா அபரஜித் ஆகியோர் சொற்ப ரன்களில் ஆட்டமிழந்து வெளியேறினர். 

இதையடுத்து ஜோடி சேர்ந்த ஜெகதீஷன் - விஜய் சங்கர் இணை அதிரடியாக விளையாடி அணியின் ஸ்கோரை மளமளவென உயர்த்தினர். மேலும் இதில் இருவரும் அரைசதம் கடந்தும் அசத்தினர். 

அதன்பின் 67 ரன்களில் ஜெகதீசன் ஆட்டமிழக்க, இறுதிவரை ஆட்டமிழக்காமல் விளையாடிய விஜய் சங்கர் 59 ரன்களைச் சேர்த்து அணிக்கு வெற்றியைத் தேடித்தந்தார். 

இதன்மூலம் தமிழ்நாடு அணி 17.1 ஓவர்களிலேயே இலக்கை எட்டி, 7 விக்கெட் வித்தியாசத்தில் பஞ்சாப் கிங்ஸ் அணியை வீழ்த்தியது.