OMN vs SL: தொடரை வென்றது இலங்கை!

ஓமனுக்கு எதிரான இரண்டாவது டி20 போட்டியில் இலங்கை அணி 5 விக்கெட் வித்தியாசத்தில் வெற்றிபெற்றது.

டி20 உலகக்கோப்பை தொடருக்கு முன்னதாக இலங்கை அணி ஓமனில் சுற்றுப்பயணம் செய்து 2 போட்டிகள் கொண்ட டி20 தொடரில் விளையாடியது. 

இதில் நேற்று நடைபெற்ற இரண்டாவது டி20 போட்டியில் டாஸ் வென்ற இலங்கை அணி முதலில் பந்துவீச தீர்மானித்தது. அதன்படி களமிறங்கிய ஓமன் அணியில் ஜடிந்தர் சிங் 5 ரன்னில் ஆட்டமிழந்தார். 

பின்னர் ஜோடி சேர்ந்த காஷ்யப் - அகிப் இலியாஸ் இணை அதிரடியாக விளையாடி அணியின் ஸ்கோரை உயர்த்தினர். இதில் இலியாஸ் அரைசதம் அடித்தார். இதன் மூலம் 20 ஓவர்கள் முடிவில் ஓமன் அணி 8 விக்கெட் இழப்பிற்கு 158 ரன்களைச் சேர்த்தது. 

இதில் அதிகபட்சமாக அகிப் இலியாஸ் 60 ரன்களை எடுத்தார். இலங்கை தரப்பில் லஹிரு குமாரா, கருணர்த்னே ஆகியோர் தலா 2 விக்கெட்டுகளைக் கைப்பற்றினர். 

அதன்பின் இலக்கை துரத்திய இலங்கை அணி தொடக்கத்திலேயே நிஷங்கா 26, சண்டிமல் 18, சரித் அசலங்கா 5 ஆகியோரது விக்கெட்டுகளை இழந்து தடுமாறியது. அதன்பின் அவிஷ்கா ஃபெர்னாண்டோ - ராஜபக்க்ஷ இணை அதிரடியாக விளையாடி ஸ்கோரை உயர்த்தியது.. 

இறுதியில் சமிகா கருணரத்னே தனது பங்கிற்கு 3 சிக்சர்களை விளாசி அணிக்கு வெற்றியை தேடித்தந்தார். இதன் மூலம் 17.3 ஓவர்களிலேயே இலங்கை அணி இலக்கை எட்டி 5 விக்கெட் வித்தியாசத்தில் ஓமன் அணியை வீழ்த்தியது. இந்த வெற்றியின் மூலம் 2 போட்டிகள் கொண்ட டி20 தொடரையும் இலங்கை அணி 2-0 என்ற கணக்கில் கைப்பற்றியது.