SA20 League: ஜான்சென் ருத்ரதாண்டவம்; சன்ரைசர்ஸ் ஈஸ்டர்ன் கேப் த்ரில் வெற்றி!
எம்ஐ கேப்டவுன் அணிக்கெதிரான எஸ் ஏ20 லீக் ஆட்டத்தில் சன்ரைசர்ஸ் ஈஸ்டர்ன் கேப் அணி 2 விக்கெட்டுகள் வித்தியாசத்தில் த்ரில் வெற்றிபெற்றது.
தென் ஆப்பிரிக்காவில் நடைபெற்றுவரும் எஸ்ஏ20 லீக் தொடர் விறுவிறுப்பாக நடைபெற்றுவருகிறது. இதில் இன்று நடைபெற்ற லீக் ஆட்டத்தில் எம்ஐ கேப்டவுன் - சன்ரைசர்ஸ் ஈஸ்டர்ன் கேப் அணிகள் பலப்பரீட்சை நடத்தின. இதில் டாஸ் வென்ற சன்ரைசர்ஸ் அணி முதலில் பந்துவீச தீர்மானித்தது.
அதன்படி களமிறங்கிய கேப்டவுன் அணியின் தொடக்க வீரர் டெவால்ட் பிரீவிஸ் 6 ரன்களில் ஆட்டமிழந்து பெவிலியனுக்கு நடையைக் கட்டினர். அதன்பின் ஜோடி சேர்ந்த ரிக்லெடன் - ரோலோஃப்சென் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர்.
Trending
பின் 46 ரன்களில் ரிக்லெடன் ஆட்டமிழந்து அரைசதத்தை தவறவிட, மறுமுனையிலிருந்த ரோலோஃப்சன் அரைசதம் கடந்த கையோடு 56 ரன்களில் ஆட்டமிழந்தார். இறுதியில் ஓடியன் ஸ்மித் தனது பங்கிற்கு 13 பந்துகளில் 25 ரன்களை விளாசினார். இதன்மூலம் 20 ஓவர்கள் முடிவில் கேப்டவுன் அணி 6 விக்கெட் இழப்பிற்கு 171 ரன்களை எடுத்தது.
இதையடுத்து இலக்கை துரத்திய சன்ரைசர்ஸ் அணியில் ஜேஜே ஸ்மட்ஸ், ஆடம் ரோஸிங்டன், சரேல் எர்வி, கேப்டன் ஐடன் மார்க்ரம் ஆகியோர் சொற்ப ரன்களுக்கு ஆட்டமிழந்து பெவிலியன் திரும்பினர். பின்னர் களமிறங்கிய டிரிஸ்டன் ஸ்டப்ஸ் ரஷித் கான் வீசிய ஒரே ஓவரில் அடுத்தடுத்து 3 சிக்சர்களை விளாசி 28 ரன்களுடன் விக்கெட்டை இழந்தார்.
அதன்பின் களமிறங்கிய மார்கோ ஜான்சென் யாரும் எதிர்பார்க்காத ஆட்டத்தை வெளிப்படுத்தி மிரட்டினார். அதிலும் ஜோஃப்ரா ஆர்ச்சர், ரஷித் கான், காகிசோ ரபாடா ஆகியோரது பந்துவீச்சை சிக்சர்களும் பவுண்டரிகளுக்கும் பறக்கவிட்டு அணியின் 20 பந்துகளில் அரைசதத்தை பதிவுசெய்து அசத்தினார்.
தொடர்ந்து அதிரடியாக விளையாடிய ஜான்சென் 27 பந்துகளில் 7 சிக்சர், 3 பவுண்டரிகள் என 66 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் சன்ரைசர்ஸ் ஈஸ்டர்ன் கேப் அணி 19.3 ஓவர்களில் இலக்கை எட்டி, 2 விக்கெட் வித்தியாசத்தில் எம் ஐ கேப்டவு அணியை வீழ்த்தி த்ரில் வெற்றிபெற்றது. இப்போட்டியின் வெற்றிக்கு முக்கிய காரணமாக அமைந்த மார்கோ ஜான்சென் ஆட்டநாயகனாகத் தேர்வு செய்யப்பட்டார்.
Win Big, Make Your Cricket Tales Now
Cricket Scorecard
