டி10 லீக்: ஸஸாய் அதிரடியில் பங்களா டைகர்ஸ் அசத்தல் வெற்றி!

டெக்கான் கிளாடியேட்டர்ஸ் அணிக்கெதிரான டி10 லீக் ஆட்டத்தில் பங்களா டைகர்ஸ் அணி 9 விக்கெட் வித்தியாசத்தில் வெற்றிபெற்றது.

டி10 கிரிக்கெட் லீக் தொடரில் இன்று நடைபெற்ற 15ஆவது லீக் ஆட்டத்தில் பங்களா டைகர்ஸ் - டெக்கான் கிளாடியேட்டர்ஸ் அணிகள் பலப்பரீட்சை நடத்தின. 

இப்போட்டியில் டாஸ் வென்ற பங்களா டைகர்ஸ் அணி முதலில் பந்துவீச தீர்மானித்தது. அதன்படி களமிறங்கிய டெக்கான் அணி 10 ஓவர்கள் முடிவில் 5 விக்கெட்டுகளை இழந்து 115 ரன்களைச் சேர்த்தது. 

இதில் அதிகபட்சமாக டாம் பாண்டன் 30 ரன்களைச் சேர்த்தார். பங்களா டைகர்ஸ் அணி தரப்பில் பென்னி ஹௌல் 2 விக்கெட்டுகளைக் கைப்பற்றினார். 

இதையடுத்து இலக்கைத் துரத்திய பங்களா டைகர்ஸ் அணிக்கு ஜான்சன் சார்லஸ் - ஹஸ்ரதுல்லா ஸஸாய் இணை அதிரடியான தொடக்கத்தைக் கொடுத்தது. 

இதில் சார்லஸ் 22 ரன்களில் ஆட்டமிழக்க, மறுமுனையிலிருந்த ஸஸாய் அரைசதம் அடித்து அணிக்கு வெற்றியைத் தேடித்தந்தார். 

இதன்மூலம் பங்களா டைகர்ஸ் அணி 8.1 ஓவர்களிலேயே இலக்கை எட்டி 9 விக்கெட் வித்தியாசத்தில் டெக்கான் கிளாடியேட்டர்ஸ் அணியை வீழ்த்தியது.