டி20 உலகக்கோப்பை அரையிறுதி: மொயின் அதிரடி, நியூசிலாந்துக்கு 167 இலக்கு!

டி20 உலகக்கோப்பை: நியூசிலாந்து அணிக்கெதிரான முதல் அரையிறுதி போட்டியில் இங்கிலாந்து அணி 167 ரன்களை இலக்காக நிர்ணயித்துள்ளது.

டி20 உலகக்கோப்பை தொடரின் முதல் அரையிறுதிப் போட்டி அபுதாபியில் இன்று நடைபெற்று வருகிறது. இதில் இங்கிலாந்து - நியூசிலாந்து அணிகள் விளையாடி வருகின்றன. 

இதில் டாஸ் வென்ற நியூசிலாந்து அணி முதாலில் பந்துவீச தீர்மானித்தது. அதன்படி களமிறங்கிய இங்கிலாந்து அணிக்கு ஜோஸ் பட்லர் - ஜானி பேர்ஸ்டோவ் இணை தொடக்கம் தந்தது. 

இதில் பேர்ஸ்டோவ் 13 ரன்னில் ஆட்டமிழக்க, அவரைத் தொடர்ந்து 29 ரன்னில் ஜோஸ் பட்லரும் ஆட்டமிழந்தார். இதையடுத்து ஜோடி சேர்ந்த டேவிட் மாலன் - மொயின் அலி இணை அதிரடியாக விளையாடி அணியின் ஸ்கோரை உயர்த்தினர். 

இதில் அரைசதம் அடிப்பார் என்று எதிர்பார்க்கப்பட்ட டேவிட் மாலன் 42 ரன்னில் ஆட்டமிழந்தார். இருப்பினும் மறுமுனையில் அதிரடியாக விளையாடிய மொயின் அலி அரைசதம் அடித்து அசத்தினார். 

இதன்மூலம் 20 ஓவர்கள் முடிவில் இங்கிலாந்து அணி 4 விக்கெட்டுகளை மட்டும் இழந்து 166 ரன்களைச் சேர்த்தது. இதில் அதிகபட்சமாக மொயின் அலி 51 ரன்களைச் சேர்த்தார்.