டி20 உலகக்கோப்பை: அரையிறுதி வாய்ப்பை தக்கவைத்தது இங்கிலாந்து!

டி20 உலகக்கோப்பை: நியூசிலாந்துக்கு எதிரான சூப்பர் 12 ஆட்டத்தில் இங்கிலாந்து அணி 15 ரன்கள் வித்தியாசத்தில் வெற்றிபெற்று அசத்தியது.

T20 World Cup 2022: England stays alive in the T20 World Cup 2022! (Image Source: Google)

டி20 உலக கோப்பை கிரிக்கெட் போட்டி ஆஸ்திரேலியாவின் பல்வேறு நகரங்களில் நடந்து வருகிறது. இதில் பிரிஸ்பேனில் இன்று சூப்பர் 12 சுற்று ஆட்டத்தில் குரூப் 1இல் அங்கம் வகிக்கும் முன்னாள் சாம்பியன் இங்கிலாந்து அணி, நியூசிலாந்தை எதிர்கொள்கிறது. 

இப்போட்டியில் டாஸ் வென்ற இங்கிலாந்து கேப்டன் ஜோஸ் பட்லர் முதலில் பேட்டிங்கை தேர்வு செய்தார். அதன்படி அந்த அணியின் தொடக்க வீரர்களாக ஜோஸ் பட்லர் , அலெக்ஸ் ஹேல்ஸ் களமிறங்கினர். தொடக்கம் முதல் அதிரடியாக விளையாடினார். குறிப்பாக அலெக்ஸ் ஹாலெஸ் பந்துகளை நாலாபுறமும் பவுண்டரிக்கு பறக்க விட்டார்.

சிறப்பாக விளையாடிய அவர் அரைசதம் அடித்தார். தொடர்ந்து விளையாடிய அவர் சான்ட்னர் பந்துவீச்சில் 52 ரன்களில் வெளியேறினார். பின்னர் ஜோஸ் பட்லர் அதிரடியை தொடர்ந்தார். நியூசிலாந்து அணியின் பந்துவீச்சை பவுண்டரி , சிக்சருக்கு பறக்க விட்ட பட்லர் அரைசதம் கடந்து அசத்தினார்.

மறுபுறம் மொயீன் அலி (5) ரன்கள் , லியாம் லிவிங்ஸ்டன் (20) ,ஹார்ரி புரூக்( 7 ) ரன்கள் எடுத்து ஆட்டமிழந்தனர். சிறப்பாக விளையாடிய பட்லர் 47 பந்துகளில் 73 ரன்களில் வெளியேறினார். இறுதியில் 20 ஓவர்கள் முடிவில் 6 விக்கெட் இழப்பிற்கு இங்கிலாந்து அணி 179 ரன்கள் எடுத்தது. நியூசிலாந்து தரப்பில் லோக்கி ஃபர்குசன் 2 விக்கெட்டுகளைக் கைப்பற்றினார். 

இதையடுத்து இலக்கை துரத்திய நியூசிலாந்து அணிக்கும் ஆரம்பமே அதிர்ச்சியளிக்கும் வகையில் டெவான் கான்வே 3 ரன்களிலும், ஃபின் ஆலன் 16 ரன்களிலும் ஆட்டமிழந்து பெவிலியனுக்கு நடையைக் கட்டினர். 

அதன்பின் ஜொடி சேர்ந்த கேன் வில்லியம்சன் - கிளென் பிலீப்ஸ் இணை சிறப்பான ஆட்டத்தை வெளிப்படுத்தி விக்கெட் இழப்பை தடுத்தனர். இதில் ஒரு பக்கம் கேன் வில்லியம்சன் நிதான ஆட்டத்தை வெளிப்படுத்த, மறுமுனையில் அதிரடியில் மிரட்டிய கிளென் பிலீப்ஸ் 25 பந்துகளில் அரைசதம் கடந்தார். 

பின்னர் 40 பந்துகளில் 40 ரன்களை மட்டுமே எடுத்திருந்த கேன் வில்லியம்சன் ஆட்டமிழக்க, அடுத்து களமிறங்கிய ஜேம்ஸ் நீஷமும் 6 ரன்களோடு நடையைக் கட்டினார். அதைத்தொடர்ந்து அதிரடி ஆட்டத்தை வெளிப்படுத்தி வந்த கிளென் பிலீப்ஸ் 62 ரன்களுக்கு விக்கெட்டை இழந்தார். 

அதன்பின் களமிறங்கிய வீரர்களாலும் இலக்கை எட்ட முடியவில்லை. இதனால் 20 ஓவர்கள் முடிவில் நியூசிலாந்து அணி 6 விக்கெட்டுகளை இழந்து 159 ரன்களை மட்டுமே எடுத்தது. இங்கிலாந்து தரப்பில் சாம் கரண், கிறிஸ் வோக்ஸ் தலா 2 விக்கெட்டுகளைக் கைப்பற்றினர். 

இதன்மூலம் இங்கிலாந்து அணி 20 ரன்கள் வித்தியாசத்தில் நியூசிலாந்தை வீழ்த்தியதுடன், அரையிறுதிச்சுற்றுக்கான வாய்ப்பையும் பிரகாசப்படுத்தியுள்ளது. 

Win Big, Make Your Cricket Tales Now