டி20 உலகக்கோப்பை: பால்பிர்னி அரைசதம்; இங்கிலாந்துக்கு 158 டார்கெட்!

டி20 உலகக்கோப்பை: இங்கிலாந்துக்கு எதிரான சூப்பர் 12 போட்டியில் அயர்லாந்து அணி 158 ரன்களை இலக்காக நிர்ணயித்துள்ளது.

T20 World Cup 2022: Outstanding bowling comeback helps England restrict Ireland to 157! (Image Source: Google)

எட்டாவது டி20 உலகக்கோப்பை தொடரின் சூப்பர் 12 சுற்று போட்டிகள் விறுவிறுப்பாக நடைபெற்று வருகின்றன. இதில் மெல்போர்னில் இன்று நடைபெற்றுவரும் போட்டியில் இங்கிலாந்து - அயர்லாந்து அணிகள் பலப்பரீட்சை நடத்தி வருகின்றன. 

இப்போட்டியில் டாஸ் வென்ற இங்கிலாந்து அணி பந்துவீச தீர்மானித்தது. அதன்படி களமிறங்கிய அயர்லாந்து அணிக்கு பால் ஸ்டிர்லிங் - ஆண்டி பால்பிர்னி இணை அதிரடியான தொடக்கத்தைக் கொடுத்தனர். 

பின்னர் 16 ரன்களில் ஸ்டிர்லிங் ஆட்டமிழந்து வெளியேறினார். அதன்பின் ஜோடி சேர்ந்த ஆண்டி பால்பிர்னி - லோர்கன் டக்கர் இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர்.

பின் அரைசதம் அடிப்பார் என எதிர்பார்க்கப்பட்ட டக்கர் 34 ரன்களில் ஆட்டமிழந்து வெளியேற, மறுமுனையில் சிறப்பான ஆட்டத்தை வெளிப்படுத்திய ஆண்டி பால்பிர்னி அரைசதம் கடந்த அசத்தினார். 

அதன்பின் அவரும் 62 ரன்களில் ஆட்டமிழக்க, அடுத்து களமிறங்கிய அயர்லாந்து வீரர்களால் எதிரணி பந்துவீச்சுக்கு ஈடுகொடுக்க முடியாமல் விக்கெட்டை இழந்தனர். இதனால் 19.2 ஓவர்களில் அயர்லாந்து அணி அனைத்து விக்கெட்டுகளையும் இழந்து 157 ரன்களை மட்டுமே எடுத்தது.

இங்கிலாந்து அணி தரப்பில் மார்க் வுட், லியாம் லிவிங்ஸ்டோன் தலா 3 விக்கெட்டுகளையும், சாம் கரண் 2 விக்கெட்டுகளையும் கைப்பற்றினார்.