மகளிர் டி20 தரவரிசை: நியூசிலாந்து, தென் ஆப்பிரிக்க வீராங்கனைகள் முன்னேற்றம்!

மகளிருக்கான புதுபிக்கப்பட்ட டி20 தரவரிசைப் பட்டியலில், உலகக்கோப்பை இறுதிப்போட்டியில் விளையாடிய நியூசிலாந்து, தென் ஆப்பிரிக்க அணி வீரர்கள் முன்னேற்றம் கண்டுள்ளனர்.

மகளிர் டி20 தரவரிசை: நியூசிலாந்து, தென் ஆப்பிரிக்க வீராங்கனைகள் முன்னேற்றம்! (Image Source: Google)

ஐக்கிய அரபு அமீரகத்தில் நடைபெற்று முடிந்த நடப்பு சீசன் மகளிர் டி20 உலகக் கோப்பை கிரிக்கெட் தொடரில் லாரா வோல்வார்ட் தலைமையிலான தென் ஆப்பிரிக்காவை வீழ்த்தி சோஃபி டிவைன் தலைமையிலான நியூசிலாந்து அணியானது முதல் முறையாக சாம்பியன் பட்டத்தை வென்று சாதனை படைத்துள்ளது. 

இந்நிலையில் சர்வதேச கிரிக்கெட் கவுன்சிலானது மகளிருக்கான புதுப்பிக்கப்பட்ட டி20 தரவரிசைப் பட்டியலை வெளியிட்டுள்ளது. அதன்படி பேட்டர்களுக்கான தரவரிசையில் ஆஸ்திரேலியாவின் பெத் மூனி முதலிடத்திலும், தஹ்லியா மெக்ராத் இரண்டாம் இடத்திலும், தென் ஆப்பிரிக்காவின் லாரா வோல்வார்ட் 3 ஆம் இடத்திலும் தொடர்கின்றனர். இந்த பட்டியலில் இந்திய வீராங்கனை ஸ்மிருதி மந்தனா 5ஆம் இடத்தில் தொடர்கிறார். 

அதேசமயம் நியூசிலாந்து அணியின் சூஸி பேட்ஸ் ஒரு இடம் முன்னேறி 7ஆம் இடத்தைப் பிடித்துள்ளார். மேலும் இத்தொடரில் சிறப்பான ஆட்டத்தை வெளிப்படுத்திய தென் ஆப்பிரிக்க அணியின் அன்னேக் போஷ் 7 இடங்கள் முன்னேறி 13ஆம் இடத்திற்கு முன்னேறியுள்ளார். இந்த பட்டியலில் இந்திய வீராங்கனைகள் ஹர்மன்ப்ரீத் கவுர் 11ஆம் இடத்திலும், ஷஃபாலி வர்மா 12ஆம் இடத்திலும் தொடர்வது குறிப்பிடத்தக்கது. 

இதுதவிர்த்து பந்துவீச்சாளர்களுக்கான தரவரிசைப் பட்டியலில் இங்கிலாந்தின் சோஃபி எக்லெஸ்டோன் முதலிடத்திலும், பாகிஸ்தானின் சதியா இக்பால் 2ஆம் இடத்திலும், இந்திய அணியின் தீப்தி சர்மா, ரேனுகா சிங் ஆகியோர் மூன்றாம் இடத்திலும் தொடர்கின்றனர். நடப்பு உலகக்கோக்கை கிரிக்கெட் தொடரில் அபாரமாக செயல்பட்ட அமெலியா கெர் 4 இடங்கள் முன்னேறி 06ஆம் இடத்தைப் பிடித்து அசத்தியுள்ளார். 

அதேபோல் ஆஸ்திரேலிய அணியின் அனபெல் சதர்லேண்ட் 4 இடங்கள் முன்னேறி 8ஆம் இடத்தையும், பாகிஸ்தானின் நஷ்ரா சந்து ஒரு இடம் முன்னேறி 9ஆம் இடத்தையும் பிடித்துள்ளனர். மேற்கொண்டு நியூசிலந்தின் ஈடன் கார்சன் இரண்டு இடங்கலும், வெஸ்ட் இண்டீஸின் அஃபி ஃபிளெட்சர் 4 இடங்கலும், ஆஸ்திரேலியாவின் சோஃபி மொலினக்ஸ் 3 இடங்கலும், நியூசிலாந்தின் ரோஸ்மேரி மெய்ர் 10 இடங்கலும் முன்னேற்றம் கண்டுள்ளனர். 

ஆல்ரவுண்டர்களுக்கான தரவரிசைப் பட்டியலில் முதல் 10 இடங்களில் எந்த மாற்றமும் நிகழவில்லை. அந்தவகையில் வெஸ்ட் இண்டீஸின் ஹீலி மேத்யூஸ் தொடர்ந்து முதலிடத்தில் நீடிக்கும் நிலையில், நியூசிலாந்தின் அமெலியா கெர் இரண்டாம் இடத்திலும், ஆஸ்திரேலியாவின் ஆஷ்லே கார்ட்னர் மூன்றாம் இடத்திலும் தொடர்கின்றனர். இந்த பட்டியலில் இந்திய வீராங்கனை தீப்தி சர்மா நான்காம் இடத்தில் தொடர்கிறார்.  

Win Big, Make Your Cricket Tales Now