MLC 2024: யூனிகார்ன்ஸை பந்தாடி சூப்பர் கிங்ஸ் அபார வெற்றி!
Major League Cricket 2024: சான் பிரான்சிஸ்கோ யூனிகார்ன்ஸ் அணிக்கு எதிரான எம்எல்சி லீக் போட்டியில் டெக்சாஸ் சூப்பர் கிங்ஸ் அணி 7 விக்கெட் வித்தியாசத்தில் அபார வெற்றியைப் பதிவுசெய்து அசத்தியது.
அமெரிக்காவில் நடைபெற்றுவரும் இரண்டாவது சீசன் மேஜர் லீக் கிரிக்கெட் தொடரானது ரசிகர்களின் எதிர்பார்ப்புகளை நாளுக்கு நாள் அதிகரித்து வருகிறது. இதில் இன்று நடைபெற்ற 7ஆவது லீக் ஆட்டத்தில் சான் பிரான்சிஸ்கோ யூனிகார்ன்ஸ் மற்றும் டெக்சாஸ் சூப்பர் கிங்ஸ் அணிகள் பலப்பரீட்சை நடத்தின. மொரிஸ்வில்லேவில் நடைபெற்ற இப்போட்டியில் டாஸ் வென்ற சூப்பர் கிங்ஸ் அணி முதலில் பந்துவீசுவதாக அறிவித்தது. அதன்படி களமிறங்கிய யூனிகார்ன்ஸ் அணியின் தொடக்க வீரர்கள் ஃபின் ஆலன் 10 ரன்களிலும், ஜேக் ஃபிரேசர் மெக்குர்க் 11 ரன்களிலும் என விக்கெட்டை இழந்தனர்.
அதன்பின் களமிறங்கி அதிரடி காட்டிய மேத்யூ ஷார்ட் 33 ரன்களைச் சேர்த்த நிலையில் விக்கெட்டை இழக்க, பின்னர் களமிறங்கிய கிருஷ்ணமூர்த்தி 17, ஜோஷ் இங்கிலிஸ், கோரி ஆண்டர்சன், ஹசன் கான் 19, ஹாரிஸ் ராவுஃப் 13 ரன்களில் என அடுத்தடுத்து விக்கெட்டுகளை இழக்க, அந்த அணி 17.5 ஓவர்களிலேயே அனைத்து விக்கெட்டுகளையும் இழந்து 127 ரன்களுக்கு ஆல் அவுட்டானது. சூப்பர் கிங்ஸ் அணி தரப்பில் அபாரமான பந்துவீச்சை வெளிப்படுத்திய முகமது மொஹ்சின் 4 விக்கெட்டுகளையும், டுவைன் பிராவோ, ஸியா உல் ஹக் ஆகியோர் தலா 2 விக்கெட்டுகளையும் கைப்பற்றினர்.
Trending
இதனையடுத்து எளிய இலக்கை நோக்கி விளையாடிய சூப்பர் கிங்ஸ் அணிக்கு கேப்டன் ஃபாஃப் டூ பிளெசிஸ் - டெவான் கான்வே இணை அதிரடியான தொடக்கத்தைக் கொடுத்ததுடன் முதல் விக்கெட்டிற்கு 61 ரன்கள் பார்ட்னர்ஷிப் அமைத்து அணிக்கு தேவையான அடித்தளத்தையும் அமைத்துக்கொடுத்தனர். இதில் அபாரமாக விளையாடி வந்த கேப்டன் ஃபாஃப் டூ பிளெசிஸ் ஒரு பவுண்டரி, 4 சிக்ஸர்கள் என 34 ரன்களைச் சேர்த்து விக்கெட்டை இழக்க, 5 பவுண்டரிகளுடன் 32 ரன்களைச் சேர்த்த நிலையில் டெவான் கான்வேவும் காயம் காரணமாக பாதியிலேயே பெவிலியன் திரும்பினார்.
Also Read: Akram ‘hopes’ Indian Team Will Travel To Pakistan For 2025 Champions Trophy
இதையடுத்து களமிறங்கிய ஆரோன் ஹார்டி பொறுப்புடன் விளையாடி 3 பவுண்டரி, 2 சிக்ஸர்கள் என 34 ரன்களுக்கு ஆட்டமிழந்தார். பின்னர் களமிறங்கிய ஜோஷுவா 9 ரன்களில் விக்கெட்டை இழந்தாலும், இறுதிவரை ஆட்டமிழக்காமல் இருந்த மிலிந்த் குமார் 4 ரன்களையும், மிட்செல் சாண்ட்னர் 9 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் டெக்சாஸ் சூப்பர் கிங்ஸ் அணி 12.5 ஓவர்களில் இலக்கை எட்டியதுடன் 7 விக்கெட் வித்தியாசத்தில் சான் பிரான்சிஸ்கோ யூனிகார்ன்ஸ் அணியை வீழ்த்தி அபார வெற்றியைப் பதிவுசெய்து அசத்தியது.
Win Big, Make Your Cricket Tales Now
