இவர்கள் தரும் நம்பிக்கை தான் என்னை சிறப்பாக விளையாட வைக்கிறது - தினேஷ் கார்த்திக்!

அணியின் கேப்டன் ரோஹித் சர்மாவும், பயிற்சியாளர் டிராவிடும் என்மீது வைத்துள்ள நம்பிக்கை என்னை சிறப்பாக விளையாட வைக்கிறது என தினேஷ் கார்த்திக் தெரிவித்துள்ளார்.

The role that I play, I always need the backing of captain and coach: Dinesh Karthik (Image Source: Google)

வெஸ்ட் இண்டீஸ் - இந்திய அணிகளுக்கு  இடையில் 5 போட்டிகள் கொண்ட டி20 தொடர் நடைபெற்று வருகிறது. இதில் முதல் போட்டியில் டாஸ் வென்ற வெஸ்ட் இண்டீஸ் அணி முதலில் பந்துவீச்சைத் தேர்வு செய்தது.

அதன்படி களமிறங்கிய இந்திய அணியில் தொடக்க வீரர்கள் ரோஹித் ஷர்மா 64 (44), சூர்யகுமார் யாதவ் 24 (16) ஆகியோர் நல்ல துவக்கம் தந்த நிலையில் அடுத்து ஷ்ரேயஸ் ஐயர் 0 (4), ரிஷப் பந்த் 14 (12), ஹார்திக் பாண்டியா 1 (3) போன்றவர்கள் அடுத்தடுத்து ஆட்டமிழந்து ஷாக் கொடுத்தனர்.

இதனால் இந்திய அணி 16 ஓவர்களில் 138/6 ரன்களை மட்டும் சேர்த்திருந்த நிலையில், இறுதிக் கட்டத்தில் தினேஷ் கார்த்திக் அபாரமாக விளையாடி 19 பந்துகளில் 4 பவுண்டரி, 2 சிக்ஸர்கள் உட்பட 41 ரன்களை குவித்து அசத்தினார். இதனால், இந்தியா 20 ஓவர்களில் 190/6 ரன்களை குவித்து அசத்தியது.

இதையடுத்து இலக்கை துரத்திக் களமிறங்கிய வெஸ்ட் இண்டீஸ் அணியில் தொடக்க வீரர் ஷமாரா ப்ரூக்ஸ் 20 (15) அடித்ததுதான் பெரிய ஸ்கோர். மேய்ர்ஸ் 15 (6), பூரன் 18 (15), ஹோல்டர் 0 (4), ஹெட்மையர் 14 (15), ரௌமேன் பௌல் 14 (17) போன்ற அதிரடி வீரர்கள் பெரிய அளவில் சோபிக்கவில்லை.

இறுதியில் வெஸ்ட் இண்டீஸ் அணி 20 ஓவர்களில் 122/8 ரன்களை மட்டும் சேர்த்து, 68 ரன்கள் வித்தியாசத்தில் படுதோல்வியை சந்தித்தது. இப்போட்டியில் அதிரடியாக விளையாடிய தினேஷ் கார்த்திக் ஆட்டநாயகனாகத் தேர்வு செய்யப்பட்டார். 

இப்போட்டி குறித்து பேசிய தினேஷ் கார்த்திக், “இந்த மைதானத்தில் பந்து சற்று நின்று வந்ததால் பேட்டிங் செய்ய கடினமாகவே இருந்தது. ஆனாலும் பந்தை கணித்து விளையாடியதால் என்னால் ரன்களை குவிக்க முடிந்தது. இந்திய அணியில் தற்போது எனக்கு கிடைத்திருக்கும் ரோல் எனக்கு மிகவும் பிடித்திருக்கிறது. 

அணியின் கேப்டன் ரோஹித் சர்மாவும், பயிற்சியாளர் டிராவிடும் என்மீது வைத்துள்ள நம்பிக்கை என்னை சிறப்பாக விளையாட வைக்கிறது. எப்போதுமே மைதானத்தின் தன்மைக்கு ஏற்ப கிரிக்கெட் ஷாட்களை விளையாடினால் நிச்சயம் ரன்கள் வரும். அந்த வகையில் நான் வலைப்பயிற்சியின் போதும் கடினமான பயிற்சியை செய்தது வருகிறேன்” என கூறியுள்ளார்.

Win Big, Make Your Cricket Tales Now