ஆசிய கோப்பை தொடரில் புதிய மைல் கல்லை எட்டும் விராட் கோலி!
ஆசிய கோப்பை தொடரில் பாகிஸ்தானுக்கு எதிரான லீக் ஆட்டத்தில் விராட் கோலி விளையாடும் பட்சத்தில் தனது 100ஆவது சர்வதேச டி20 போட்டியில் விளையாடிய இரண்டாவது இந்திய வீரர் எனும் சாதனையை படைக்கவுள்ளார்.
வரலாற்றுச் சிறப்புமிக்க ஆசிய கோப்பை 2022 தொடர் வரும் ஆகஸ்ட் 27 முதல் ஐக்கிய அரபு நாடுகளில் நடைபெற உள்ளது. இந்தியா, பாகிஸ்தான் உள்ளிட்ட ஆசியாவின் டாப் 6 அணிகள் பலப்பரீட்சை நடத்தும் இந்த தொடருக்கான முழு அட்டவணை சமீபத்தில் வெளியிடப்பட்ட நிலையில் இதில் பங்கேற்கும் இந்திய அணி நேற்று அறிவிக்கப்பட்டுள்ளது. ரோகித் சர்மா இந்தியாவை வழிநடத்தும் அந்த அணியில் காயத்திலிருந்து குணமடைந்துள்ள கேஎல் ராகுல் துணை கேப்டனாக அறிவிக்கப்பட்டுள்ளார்.
அவர்களுடன் சமீபத்திய வெஸ்ட் இண்டீஸ் தொடரில் அசத்திய சூரியகுமர் யாதவ், புவனேஸ்வர் குமார், தினேஷ் கார்த்திக், ரவீந்திர ஜடேஜா, ரவிச்சந்திரன் அஸ்வின் போன்ற சீனியர் வீரர்களும் தீபக் ஹூடா, ரவி பிஷ்னோய், அரஷ்தீப் சிங் போன்ற இளம் வீரர்களும் தேர்வு செய்யப்பட்டுள்ளார்கள். இருப்பினும் நம்பிக்கை நட்சத்திரம் ஜஸ்பிரித் பும்ரா மற்றும் ஹர்ஷல் படேல் ஆகியோர் காயத்தால் விலகியது பின்னடைவாக பார்க்கப்படுகிறது. அதே சமயம் சமீப காலங்களில் சிறப்பாக செயல்பட்ட சஞ்சு சாம்சன், இஷான் கிசான் ஆகியோருக்கு வாய்ப்பு கிடைக்காதது ரசிகர்களுக்கு ஏமாற்றமாக அமைந்துள்ளது.
Trending
அவை அனைத்தையும் விட இந்த தொடரில் இந்தியாவின் நம்பிக்கை நட்சத்திரம் மற்றும் முன்னாள் கேப்டன் விராட் கோலி மீண்டும் அணிக்கு திரும்பியுள்ளது ரசிகர்களை மகிழ்ச்சியடைய வைத்துள்ளது. ஏனெனில் கடந்த 2019-க்குப்பின் சதமடிக்க முடியாமல் தவித்து வரும் கடுமையான விமர்சனங்களை சந்தித்து வரும் அவர் இத்தொடரில் ஃபார்முக்கு திரும்பி கம்பேக் கொடுக்க வேண்டிய கட்டாயம் ஏற்பட்டுள்ளது.
இருப்பினும் விராட் கோலியை விமர்சிக்கும் நபர்களால் 70 சதங்களை கனவில் கூட நினைத்துப் பார்க்க முடியாது என்ற கருத்துடன் கெவின் பீட்டர்சன், ரிக்கி பாண்டிங், பிரைன் லாரா உட்பட ஏராளமான வெளிநாட்டு ஜாம்பவான்கள் அவருக்கு விமர்சனத்தை மிஞ்சிய ஆதரவு கொடுத்து வருகின்றனர். மேலும் பென் ஸ்டோக்ஸ் போன்ற வீரர்கள் பணிச்சுமையால் திடீரென்று ஓய்வு பெறும் இந்த நவீன கிரிக்கெட்டில் தொடர்ச்சியாக விளையாடும் அவருக்கும் ஓய்வு தேவை என்ற வகையில் ஆதரவும் பெருகி வருகிறது.
அப்படி ரசிகர்கள் மற்றும் முன்னாள் வீரர்களின் ஆதரவை பெற்றுள்ள விராட் கோலி 2022 ஆசிய கோப்பை மற்றும் டி20 உலகக் கோப்பையை இந்தியாவுக்கு வென்று கொடுப்பதே தமது லட்சியம் என்று ஏற்கனவே அறிவித்துள்ளார். அப்படிப்பட்ட நிலைமையில் நல்ல ஓய்வெடுத்து புத்துணர்ச்சியை பெற்றுள்ள அவர் இந்த ஆசிய கோப்பையில் பார்முக்கு திரும்பி அசத்தலாக செயல்படுவார் என்ற நம்பிக்கையில் அனைத்து ரசிகர்களும் ஆவலுடன் காத்திருப்பதாக தெரிவிக்கின்றனர்.
மேலும் ஆரம்ப காலங்களில் அபாரமாக செயல்பட்டுள்ள அவர் இப்போதெல்லாம் விளையாடினாலே சாதனை என்ற வகையில் இந்த ஆசிய கோப்பையில் பாகிஸ்தானுக்கு எதிராக வரும் ஆகஸ்ட் 28ஆம் தேதி நடைபெறும் லீக் போட்டியில் களமிறங்கும் போது சர்வதேச டி20 கிரிக்கெட்டில் 100 போட்டிகளில் விளையாடும் 2ஆவது இந்திய வீரர் என்ற வரலாற்றுச் சாதனை படைக்க உள்ளார்.
இதுவரை கேப்டன் ரோஹித் சர்மா மட்டுமே 100 போட்டிகளுக்கு மேல் விளையாடி வரும் நிலையில் அவருக்கு அடுத்தபடியாக பாகிஸ்தானுக்கு எதிரான கம்பேக் போட்டியில் இந்த சாதனையை விராட் கோலி படைக்க உள்ளது அவரது ரசிகர்களை மகிழ்ச்சியடைய வைத்துள்ளது.
- ரோஹித் சர்மா : 132
- விராட் கோலி : 99
- எம்எஸ் தோனி : 98
- சுரேஷ் ரெய்னா : 78
- புவனேஸ்வர் குமார் : 72
Win Big, Make Your Cricket Tales Now
