ஒருங்கிணைந்த இந்தியா - பாகிஸ்தான் பிளேயிங் லெவனை அறிவித்த வாசிம் அக்ரம்!

இந்தியா - பாகிஸ்தான் அணி வீரர்களை சேர்த்து தனது சிறந்த ஒருநாள் கிரிக்கெட் உலகக் கோப்பை அணியை பாகிஸ்தான் அணியின் முன்னாள் ஜாம்பவான் வாசிம் அக்ரம் தேர்வு செய்துள்ளார்.

ஒருங்கிணைந்த இந்தியா - பாகிஸ்தான் பிளேயிங் லெவனை அறிவித்த வாசிம் அக்ரம்! (Image Source: Google)

உலகக்கோப்பை என்று எடுத்துக் கொண்டால் இந்திய அணிதான் மிக அதிகபட்சமாக பாகிஸ்தான் அணி மீது ஆதிக்கம் செலுத்திய அணியாக இருந்து வருகிறது. இதுவரை பாகிஸ்தான் அணி ஒரே ஒரு முறை மட்டுமே உலகக் கோப்பை தொடரில் இந்திய அணியை வீழ்த்தி இருக்கிறது. அதுவும் டி20 உலகக் கோப்பையில் 2021 ஆம் ஆண்டுதான் நடந்தது. அதை பாபர் அசாம் தலைமையிலான பாகிஸ்தான் அணி செய்தது.

இதுவரை ஏழு முறை ஒருநாள் கிரிக்கெட் உலகக் கோப்பை தொடர்களில் மோதி ஏழுமுறையும் இந்திய அணியை வெற்றி பெற்று இருக்கிறது. எட்டாவது முறையாக வருகின்ற அக்டோபர் 14ஆம் தேதி ஒருநாள் கிரிக்கெட் உலகக் கோப்பை தொடரில் இரு அணிகளும் குஜராத் அகமதாபாத் மைதானத்தில் மோத இருக்கின்றன.

இதன் பொருட்டு பாகிஸ்தான் அணியின் லெஜெண்ட் வேகப்பந்துவீச்சாளர் வாசிம் அக்ரம் இரு அணி வீரர்களையும் சேர்த்து தனது சிறந்த ஒருநாள் கிரிக்கெட் உலகக் கோப்பை அணியை தேர்வு செய்து வெளியிட்டு இருக்கிறார். இந்த அணியில் அவர் தொடக்க வீரர்களாக சையத் அன்வர் மற்றும் முதல் பந்தில் இருந்தே அடித்து நொறுக்கும் பிளாஸ்டர் வீரேந்திர சேவாக் இருவரை வைத்திருக்கிறார்.

மூன்றாவது இடத்தில் மாஸ்டர் சச்சின் டெண்டுல்கர், நான்காவது இடத்தில் பாகிஸ்தான் லெஜெண்ட் மியான்ட்தத் இருவரும் இருக்கிறார்கள். இந்த இடத்தில் அவர் இன்சமாம் உல் ஹக்கை கொண்டு வரவில்லை என்பது குறிப்பிடத்தக்கது. ஐந்தாவது இடத்திற்கு ஒருநாள் கிரிக்கெட்டின் அரசனாக தற்போது இருந்து வரும் விராட் கோலியையும், ஆறாவது இடத்திற்கு பாகிஸ்தானுக்கு ஒருநாள் கிரிக்கெட் உலகக் கோப்பை பெற்று தந்த கேப்டன் வேகப்பந்துவீச்சு ஆல்ரவுண்டர் இம்ரான் கானையும் வைத்திருக்கிறார். இவரையே கேப்டனாகவும் கூறியிருக்கிறார்.

இதே அணியில் மூன்று ஐசிசி தொடர்களை வென்ற ஒரே கேப்டனாக இருக்கும் மகேந்திர சிங் தோனியை விக்கெட் கீப்பராக வாசிம் அக்ரம் கொண்டு வந்திருக்கிறார். மேலும் எட்டாவது இடத்தில் இந்திய அணிக்காக முதல் முதலில் உலகக் கோப்பையை பெற்றுத்தந்த வேகப்பந்துவீச்சு ஆல்ரவுண்டர் கபில்தேவ் இருக்கிறார். ஒன்பதாவது இடத்தில் சுழற்பந்துவீச்சாளராக இந்தியாவின் அனில் கும்ப்ளேவை இவர் தேர்ந்தெடுக்கவில்லை. மாறாக சக்லைன் முஸ்டாக்கை வைத்திருக்கிறார்.

அதன்பின் 10ஆவது மற்றும் 11ஆவது இடத்திற்கு இந்தியாவின் பும்ரா மற்றும் பாகிஸ்தானின் வக்கார் யூனிஸ் இருவரும் கொண்டு வரப்பட்டிருக்கிறார்கள். இந்த இடத்தில் வேகப்பந்துவீச்சு லெஜெண்டான வாசிம் அக்ரம் பும்ராவுக்கும், தனது பந்துவீச்சு கூட்டாளியான வக்கார் யூனிஸ்க்கும் இடம் தந்து, தன்னைப் பெருந்தன்மையாக இணைத்துக் கொள்ளவில்லை.

வாசிம் அக்ரம் தேர்ந்தெடுத்த இந்தியா - பாகிஸ்தான் வீரர்கள் இணைந்த சிறந்த அணி :

சையத் அன்வர், வீரேந்திர சேவாக், சச்சின் டெண்டுல்கர், ஜாவித் மியான்ட்தத், விராட் கோலி, இம்ரான் கான், மகேந்திர சிங் தோனி, கபில் தேவ் சக்லைன் முஸ்டாக், ஜஸ்பிரித் பும்ரா, வக்கார் யூனிஸ்.

Win Big, Make Your Cricket Tales Now