கம்பேக் போட்டியின் மூலம் வரலாற்று சாதனை நிகழ்த்திய உனாத்கட்!

Watch – Jaydev Unadkat’s First Wicket In Test As He Dismisses Zakir Hasan (Image Source: Google)

இந்தியா- வங்கதேசம் அணிகளுக்கு இடையேயான இரண்டு போட்டிகள் கொண்ட டெஸ்ட் தொடர் நடைபெற்று வருகிறது. இதில் முதல் போட்டியில் பேட்டிங், பந்துவீச்சு இரண்டிலும் சிறப்பாக செயல்பட்ட இந்திய அணி, 188 ரன்கள் வித்தியாசத்தில் அபார வெற்றியைப்பெற்றது. இந்நிலையில் தற்போது, இரண்டாவது டெஸ்ட் போட்டி தொடங்கி நடைபெற்று வருகிறது. 

இப்போட்டிக்கான டாஸை வென்ற வங்கேதச அணி முதலில் பேட்டிங்கை தேர்வு செய்தது. போட்டி நடைபெறவுள்ள டாக்கா மைதானத்தில் ஓரளவுக்கு பவுன்ஸ் இருக்கும் என்பதால், வேகப்பந்து வீச்சாளர்களால் இங்கு தாக்கத்தை ஏற்படுத்த முடியும். மேலும், பந்துகளும் சிறப்பாக சுழலும் என்பதால், இப்போட்டியில் ரன்களை குவிப்பது எளிதான காரியமாக இருக்காது எனக் கணிக்கப்பட்டிருந்தது. இறுதியில் அதேபோல்தான் நடந்தது.

முதலில் களமிறங்கிய வங்கதேச அணியில் தொடக்க வீரர்கள் ஷான்டோ, ஜகிர் ஹாசன் இருவரும், முதல் ஒரு மணி நேரத்தில் தடுப்பாட்டத்தில் ஈடுபட்டனர். இதனால், இவர்களது விக்கெட்டை வீழ்த்த முடியவில்லை. இதனைத் தொடர்ந்து ஜெய்தேவ் உனாத்கட், அஸ்வின் இருவரும் பார்ட்னர்ஷிப் அமைத்து பந்துவீசி, நெருக்கடியை ஏற்படுத்த ஆரம்பித்தார்கள்.

குறிப்பாக, உனாத்கட் வீசிய பந்துகள் அதிகளவில் பவுன்ஸ் ஆக ஆரம்பித்தது. இதனை எதிர்கொள்ள ஜகிர் ஹாசன் திணறி வந்த நிலையில், இறுதியில் அவரது பந்துவீச்சிலேயே ஜகிர் 15 (34) கே.எல்.ராகுலிடம் கேட்ச் கொடுத்து ஆட்டமிழந்தார். தொடர்ந்து ஷான்டோ 24 (57) விக்கெட்டை அஸ்வின் எல்பிடபிள்யூ மூலம் எடுத்துக் கொடுத்தார்.

இதனால், வங்கதேச அணி, அடுத்தடுத்த ஓவர்களில் ஓபனர்களை இழந்து தடுமாறியது. அடுத்து மோமினுல் ஹக் 23 (39), கேப்டன் ஷாகிப் அல் ஹசன் 16 (38) இருவரும் பார்ட்னர்ஷிப் அமைத்து ரன்களை சேர்த்து வருகிறார்கள். வங்கதேச அணி 82/2 ரன்களை எடுத்துள்ள நிலையில் தற்போது முதல்நாள், முதல் செஷன் ஆட்டம் நிறைவு பெற்றது.

 

pic.twitter.com/DQIp0xrRMH

— Guess Karo (@KuchNahiUkhada) December 22, 2022

ஜெய்தேவ் உனாத்கட் தனது 19 வயதில், 2010ஆம் ஆண்டு தென் ஆப்பிரிக்க அணிக்கு எதிரான டெஸ்ட் தொடரின்போது இந்திய அணிக்கு அறிமுகமானார். ஒரு போட்டியில் மட்டுமே களமிறங்க வாய்ப்பு கிடைத்தது. மொத்தம் 26 ஓவர்கள் அதாவது 156 பந்துகள் வீசி விக்கெட்கள் எதுவும் வீழ்த்தவில்லை. 

அதன்பிறகு, இவருக்கு டெஸ்ட் அணியில் இடம் கிடைக்கவில்லை. தற்போது, 12 வருடங்களுக்கு பிறகு வாய்ப்பினை பெற்று விக்கெட்டை வீழ்த்தியுள்ளார். இதன்மூலம், ஒரு அணிக்கு அறிமுகமாகி 10+ வருடங்களுக்கு பிறகு விக்கெட் வீழ்த்திய பந்துவீச்சாளர் என்ற சாதனையை உனாத்கட் படைத்துள்ளார்.

Win Big, Make Your Cricket Tales Now