WBBL: மந்தனா சதம் வீண்; ஹர்மன்ப்ரீத் அதிரடியில் மெல்போர்ன் ரினிகேட்ஸ் அபார வெற்றி!

மகளிர் பிக் பேஷ் லீக் தொடரில் இன்று நடைபெற்ற லீக் ஆட்டத்தில் மெல்போர்ன் ரெனிகேட்ஸ் அணி 4 ரன்கள் வித்தியாசத்தில் சிட்னி தண்டரை வீழ்த்தி த்ரில் வெற்றிபெற்றது.

ஆஸ்திரேலியாவின் உள்ளூர் டி20 தொடரான மகளிர் பிக் பேஷ் லீக் தொடர் விறுவிறுப்பாக நடைபெற்று வருகிறது. இதில் இன்று நடைபெற்ற 48ஆவது லீக் ஆட்டத்தில் மெல்போர்ன் ரினிகேட்ஸ் அணி, சிட்னி தண்டர் அணியை எதிர்கொண்டது. 

இதில் டாஸ் வென்ற சிட்னி தண்டர் அணி முதலில் பந்துவீசியது. அதன்படி களமிறங்கிய மெல்போர்ன் ரினிகேட்ஸ் அணி ஹர்மன்ப்ரீத் கவுரின் அதிரடியினால் 20 ஓவர்கள் முடிவில் 4 விக்கெட்டுகளை மட்டும் இழந்து 175 ரன்களைச் சேர்த்தது. 

இதில் இறுதிவரை ஆட்டமிழக்காமல் இருந்த ஹர்மன்ப்ரீத் கவுர் 81 ரன்களைச் சேர்த்தார். சிட்னி அணியில் சமந்தா பேட்ஸ் 2 விக்கெட்டுகளைக் கைப்பற்றினார். 

இதையடுத்து கடின இலக்கை நோக்கி களமிறங்கிய சிட்னி தண்டர் அணிக்கு ஸ்மிருதி மந்தனா அபாரமான தொடக்கத்தை வழங்கினார். ஆனால் அவருடன் இணைந்து விளையாடிய வீராங்கனையில் சரிவர சோபிக்க வில்லை. 

இருப்பினும் அதிரடியில் மிரட்டிய மந்தனா சதமடித்து அசத்தினார். இதன்மூலம் மகளிர் பிக் பேஷ் தொடரில் சதமடித்த முதல் இந்திய வீராங்கனை எனும் சிறப்பையும் பெற்றார். 

ஆனாலும் 20 ஓவர்கள் முடிவில் அந்த அணியால் 2 விக்கெட் இழப்பிற்கு 171 ரன்களை மட்டுமே சேர்க்க முடிந்தது. இதில் இறுதிவரை ஆட்டமிழக்காமல் இருந்த ஸ்மிருதி மந்தனா 114 ரன்களைக் குவித்தார். 

இதன்மூலம் மெல்போர்ன் ரெனிகேட்ஸ் அணி 4 ரன்கள் வித்தியாசத்தில் சிட்னி தண்டரை வீழ்த்தி த்ரில் வெற்றிபெற்றது.