WCL 2025: தென் ஆப்பிரிக்காவை வீழ்த்தி பாகிஸ்தான் அபார வெற்றி!
தென் ஆப்பிரிக்க சாம்பியன்ஸுக்கு எதிரான லீக் போட்டியில் பாகிஸ்தான் சாம்பியன்ஸ் அணி 31 ரன்கள் வித்தியாசத்தில் வெற்றிபெற்று அசத்தியது.
இப்போட்டியில் டாஸை இழந்து முதலில் பேட்டிங் செய்த பாகிஸ்தான் அணிக்கு ஷர்ஜீல் கான் மற்றும் காம்ரன் அக்மல் இணை தொடக்கம் கொடுத்தனர். இதில் ஷர்ஜீல் கான் 19 ரன்களில் ஆட்டமிழக்க, அவரைத்தொடர்ந்து 17 ரன்களில் காம்ரன் அக்மலும் விக்கெட்டை இழந்தனர். மேற்கொண்டு கேப்டன் முகமது ஹஃபீசூம் 8 ரன்களுக்கு நடையைக் கட்டினார். பின்னர் ஜோடி சேர்ந்த உமர் அமீன் மற்றும் சோயப் மாலிக் இணை சிறப்பான ஆட்டத்தை வெளிப்படுத்தி ஸ்கோரை உயர்த்தினர்.
இதில் உமர் அமீன் அரைசதம் கடந்தார். பின் இருவரும் இணைந்த 4ஆவது விக்கெட்டிற்கு 80 ரன்களுக்கு மேல் பார்ட்னர்ஷிப் அமைத்திருந்த நிலையில் உமர் அமீன் 4 பவுண்டரி, 3 சிக்ஸர்களுடன் 58 ரன்களில் ஆட்டமிழந்தார். அடுத்து களமிறங்கிய ஆசிஃப் அலியும் அதிரடியாக விளையாடி 2 பவுண்டரி, 2 சிக்ஸர்கள் என 23 ரன்களைச் சேர்த்து விக்கெட்டை இழக்க, இறுதிவரை ஆட்டமிழக்காமல் இருந்த சோயப் மாலிக் 46 ரன்களைச் சேர்த்து அணிக்குத் தேவையான ஃபினிஷிங்கைக் கொடுத்தார்.
இதன்மூலம் பாகிஸ்தான் சாம்பியன்ஸ் அணி 20 ஓவர்கள் முடிவில் 5 விக்கெட்டுகளை மட்டுமே இழந்து 198 ரன்களைக் குவித்தது. தென் ஆப்பிரிக்க சாம்பியன்ஸ் தரப்பில் டூன் ஒலிவியர் 2 விக்கெட்டுகளையும், வில்ஜோன் மற்றும் வெய்ன் பார்னெல் தலா ஒரு விக்கெட்டை கைப்பற்றினர். பின்னர் இலக்கை நோக்கி விளையாடிய தென் ஆப்பிரிக்க அணியின் டாப் ஆர்டர் வீரர்கள் ரன்களைச் சேர்க்க முடியாமல் அடுத்தடுத்து சொற்ப ரன்களுக்கு நடையைக் கட்டினர்.
இதில் ஜேஜே ஸ்மட்ஸ் 10 ரன்களுக்கும், ஹென்றி டேவிட்ஸ் 6 ரன்களுக்கும், ஹாஷிம் அம்லா 12 ரன்களுக்கும், சாரல் எர்வீ 12 ரன்களுக்கும், ருடால்ஃபின் 10 ரன்களுக்கும், ஜேபி டுமினி 11 ரன்களுக்கும் என விக்கெட்டுகளை இழந்து ஏமாற்றமளித்தனர். பின்னர் களமிறங்கிய மேர்னே வேன் வைக் இருதிவரை ஆட்டமிழக்காமல் 5 பவுண்டரிகள், 2 சிக்ஸர்கள் என 44 ரன்களைச் சேர்த்ததைத் தவிர்த்து மற்ற வீரர்கள் யாரும் பெரிதளவில் ரன்களைச் சேர்க்க தவறினர்.
Also Read: LIVE Cricket Score
இதனால் தென் ஆப்பிரிக்க சாம்பியான்ஸ் அணி 20 ஓவர்களில் 9 விக்கெட்டுகளை இழந்து 167 ரன்களை மட்டுமே சேர்த்தது. பாகிஸ்தான் சாம்பியன்ஸ் தரப்பில் சோஹைல் தன்விர் மற்றும் கேப்டன் முகமது ஹபீஸ் தலா 2 விக்கெட்டுகளை கைப்பற்றினர். இதன்மூலம் பாகிஸ்தான் சாம்பியன்ஸ் அணி 31 ரன்கள் வித்தியாசத்தில் தென் ஆப்பிரிக்க சாம்பியன்ஸ் அணியை வீழ்த்தி வெற்றி பெற்றது. மேலும் இப்போட்டியின் ஆட்டநாயகன் விருதை உமர் அமின் கைப்பற்றினார்.
Win Big, Make Your Cricket Tales Now
