WI vs BAN, 3rd ODI: பூரன் அரைசதம்; 178 ரன்களில் சுருண்டது விண்டீஸ்!

வங்கதேச அணிக்கெதிரான மூன்றாவது ஒருநாள் போட்டியில் முதலில் பேட்டிங் செய்த வெஸ்ட் இண்டீஸ் அணி 178 ரன்களில் ஆல் அவுட்டானது.

WI vs BAN, 3rd ODI: West Indies have been bowled out for 178! (Image Source: Google)

வெஸ்ட் இண்டீஸில் சுற்றுப்பயணம் செய்துவரும் வங்கதேச அணி தற்போது 3 போட்டிகள் கொண்ட ஒருநாள் தொடரில் விளையாடிவருகிறது. இதில் முதலிரண்டு போட்டிகளிலும் வங்கதேச அணி வெற்றிபெற்று தொடரை வென்றது.

இந்நிலையில் இரு அணிகளுக்கும் இடையேயான மூன்றாவது மற்றும் கடைசி ஒருநாள் போட்டி இன்று கயானாவில் நடைபெற்று வருகிறது. இப்போட்டியில் டாஸ் வென்ற வங்கதேச அணி முதலில் பந்துவீச தீர்மானித்தது.

அதன்படி களமிறங்கிய வெஸ்ட் இண்டீஸ் அணியில் ஷாய் ஹோப், பிராண்டன் கிங், ஷமாரா ப்ரூக்ஸ் ஆகியோர் ஒற்றையிலக்க ரன்களுடன் பெவிலியனுக்கு நடையைக் கட்டி ஏமாற்றமளித்தார்.

அதன்பின் ஜோடி சேர்ந்த கேசி கார்ட்டி - நிக்கோலஸ் பூரன் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் தொடர்ந்து சிறப்பாக விளையாடிய பூரன் அரைசதம் அடித்தார்.

பின் 33 ரன்களில் கார்ட்டி ஆட்டமிழக்க, 73 ரன்களில் நிக்கோலஸ் பூரனும் விக்கெட்டை இழந்தார். இதையடுத்து களமிறங்கிய வெஸ்ட் இண்டீஸ் வீரர்கள் அடுத்தடுத்து சொற்ப ரன்களுக்கு ஆட்டமிழந்து பெவிலியனுக்கு நடையைக் கட்டினர்.

இதனால் 48.4 ஓவர்களில் வெஸ்ட் இண்டீஸ் அணி அனைத்து விக்கெட்டுகளையும் இழந்து 178 ரன்களை மட்டுமே சேர்த்தது. வங்கதேச அணி தரப்பில் தஜுல் இஸ்லாம் 5 விக்கெட்டுகளைக் கைப்பற்றினார்.