வெஸ்ட் இண்டீஸை வீழ்த்தி தொடரை சமன் செய்த பாகிஸ்தான்!

வெஸ்ட் இண்டீசுக்கு எதிரான இரண்டாவது டெஸ்ட் போட்டியில் பாகிஸ்தான் அணி 109 ரன்கள் வித்தியாசத்தில் வெற்றிபெற்று, இரண்டு போட்டிகள் கொண்ட தொடரை 1-1 என்ற கணக்கில் சமன் செய்துள்ளது.

பாகிஸ்தான் - வெஸ்ட் இண்டீஸ் அணிகளுக்கு இடையேயான இரண்டாவது டெஸ்ட் போட்டி ஜமைக்காவிலுள்ள சபீனா பார்க் மைதானத்தில் ஆகஸ்ட் 20ஆம் தேதி தொடங்கியது. இப்போட்டியில் டாஸ் வென்ற வெஸ்ட் இண்டீஸ் அணி முதலில் பந்துவீச தீர்மானித்தது. 

அதன்படி களமிறங்கிய பாகிஸ்தான் அணி ஃபாவத் ஆலமின் அதிரடியான சதத்தால் 302 ரன்களில் முதல் இன்னிங்ஸை டிக்ளர் செய்தது. இதில் அதிகபட்சமாக ஃபாவத் ஆலம் 124 ரன்களைச் சேர்த்தார்.

இதையடுத்து களமிறங்கிய வெஸ்ட் இண்டீஸ் அணி ஆரம்பம் முதலே பாகிஸ்தான் பந்துவீச்சை தாக்குப்பிடிக்க முடியால் தடுமாறியது. இதனால்150 ரன்கள் எடுத்திருந்த நிலையிலேயே அந்த அணி அனைத்து விக்கெட்டுகளையும் இழந்து இன்னிங்ஸை முடித்தது. பாகிஸ்தான் அணி தரப்பில் ஷாஹீன் அஃப்ரிடி 6 விக்கெட்டுகளைக் கைப்பற்றினார்.

அதன்பின் 152 ரன்கள் முன்னிலையுடன் இரண்டாவது இன்னிங்ஸைத் தொடங்கிய பாகிஸ்தான் அணி அதிரடியாக விளையாடி 27 ஓவர்களிலேயே 176 ரன்களைச் சேர்த்து டிக்ளர் செய்தது. இதனால் வெஸ்ட் இண்டீஸ் அணிக்கு 329 ரன்கள் வெற்றி இலக்காகவும் நிர்ணயிக்கப்பட்டது. 

பின்னர் கடின இலக்கை நோக்கி களமிறங்கிய வெஸ்ட் இண்டீஸ் அணி மீண்டும் விக்கெட்டுகளை இழந்து தடுமாற்றத்தை சந்தித்தது. இதனால் அந்த அணியால் அனைத்து விக்கெட்டுகளையும் இழந்து 219 ரன்களை மட்டுமே சேர்க்க முடிந்தது. 

இதன்மூலம் பாகிஸ்தான் அணி 109 ரன்கள் வித்தியாசத்தில் வெஸ்ட் இண்டீஸை வீழ்த்தி, இரண்டு போட்டிகள் கொண்ட டெஸ்ட் தொடரை 1-1 என்ற கணக்கில் சமன்செய்தது. மேலும் இப்போட்டியில் சிறப்பாக பந்துவீசிய பாகிஸ்தானின் ஷாஹீன் அஃப்ரிடி, தொடர் நாயாகன் மற்றும் ஆட்டநாயகனாகவும் தேர்வு செய்யப்பட்டார்.