மகளிர் ஆஷஸ் 2023: சதத்தை தவறவிட்ட எல்லீஸ் பெர்ரி; ஆஸ்திரேலிய அணி ரன்குவிப்பு!
இங்கிலாந்து மகளிர் அணிக்கெதிரான ஆஷஸ் டெஸ்ட் போட்டியில் முதலில் பேட்டிங் செய்துவரும் ஆஸ்திரேலிய மகளிர் அணி முதல்நாள் ஆட்டநேர முடிவில் 328 ரன்களைச் சேர்த்துள்ளது.
ஆஸ்திரேலிய மகளிர் அணி இங்கிலாந்தில் சுற்றுப்பயணம் மேற்கொண்டு ஒரு டெஸ்ட், 3 ஒருநாள் மற்றும் டி20 போட்டிகள் கொண்ட ஆஷஸ் தொடரில் விளையாடிவருகிறது. இதில் இரு அணிகளுக்கும் இடையேயான ஆஷஸ் டெஸ்ட் போட்டி நேற்று நாட்டிங்ஹாமில் தொடங்கியது. இப்போட்டியில் டாஸ் வென்ற ஆஸ்திரேலிய அணி முதலில் பேட்டிங்கைத் தேர்வுசெய்வதாக அறிவித்தது.
அதன்படி களமிறங்கிய ஆஸ்திரேலிய அணிக்கு பெத் மூனி - லிட்ச்ஃபீல்ட் இணை நிதானமான தொடக்கத்தைக் கொடுத்தனர். இதில் லிட்ச்ஃபீல்ட் 23 ரன்களில் ஆட்டமிழக்க, பெத் மூனியும் 33 ரன்களைச் சேர்த்த நிலையில் விக்கெட்டை இழந்தார். அதன்பின் இணைந்த எல்லீஸ் பெர்ரி - தஹிலா மெக்ராத் இணை அதிரடியாக விளையாடி அணியின் ஸ்கோரை மளமளவென உயர்த்தினர்.
Trending
தொடர்ந்து அபார ஆட்டத்தை வெளிப்படுத்திய இருவரும் அரைசதம் கடந்துடன் 100 ரன்கள் பார்ட்னர்ஷிப்பும் அமைத்தனர். பின் 61 ரன்களை எடுத்திருந்த மெக்ரத் விகெட்டை இழக்க, அடுத்து களமிறங்கிய ஜெஸ் ஜொனசென், கேப்டன் அலீசா ஹீலி ஆகியோரும் அடுத்தடுத்து சொற்ப ரன்களுக்கு ஆட்டமிழந்து பெவிலியன் திரும்பினர்.
இதையடுத்து சதத்தை நெருங்கிய எல்லீஸ் பெர்ரி 99 ரன்களை எடுத்த நிலையில் ஆட்டமிழந்து ஒரு ரன்னில் சதமடிக்கும் வாய்ப்பை தவறவிட்டு ரசிகர்களுக்கு அதிர்ச்சிகொடுத்தார். அதன்பின் அதிரடியாக விளையாடி வந்த ஆஷ்லே கார்ட்னரும் 40 ரன்களை எடுத்த நிலையில் விக்கெட்டை இழந்து நடையைக் கட்டினார்.
இதனால் முதல்நாள் ஆட்டநேர முடிவில் ஆஸ்திரேலிய மகளிர் அணி 7 விக்கெட்டுகளை இழந்து 328 ரன்களைச் சேர்த்துள்ளது. இதில் சதர்லேண்ட் 39 ரன்களுடனும், அலனா கிங் 7 ரன்களுடனும் களத்தில் உள்ளனர். இங்கிலாந்து தரப்பில் சோபி எக்லெஸ்டோன் 3 விக்கெட்டுகளையும், லௌரன் ஃபிலெர் 2 விக்கெட்டுகளையும் கைப்பற்றியுள்ளனர்.
Win Big, Make Your Cricket Tales Now
