மகளிர் உலகக்கோப்பை 2022: விண்டீஸை வீழ்த்தி அபார வெற்றிபெற்ற இந்தியா!

மகளிர் உலகக்கோப்பை 2022: வெஸ்ட் இண்டீஸுக்கு எதிரான லீக் ஆட்டத்தில் இந்திய அணி 155 ரன்கள் வித்தியாசத்தில் வெற்றிபெற்று அசத்தியது.

மகளிர் உலகக்கோப்பை தொடரில் இன்று நடைபெற்ற லீக் ஆட்டத்தில் இந்தியா - வெஸ்ட் இண்டீஸ் அணிகள் பலப்பரீட்சை நடத்தின. 

இப்போட்டியில் டாஸ் வென்று முதலில் பேட்டிங் செய்த இந்திய அணி ஸ்மிருதி மந்தனா, ஹர்மன்ப்ரீத் கவுர் ஆகியோரின் சிறப்பான சதங்கள் மூலம் 50 ஓவர்கள் முடிவில் 317 ரன்களைச் சேர்த்தது. 

இந்திய அணி தரப்பில் அதிகபட்சமாக ஸ்மிருதி மந்தனா 123 ரன்களையும், ஹர்மன்ப்ரீத் கவுர் 109 ரன்களையும் சேர்த்தனர். 

இதையடுத்து இமாலய இலக்கை துரத்திய வெஸ்ட் இண்டீஸ் அணிக்கு டெண்ட்ரா டோட்டின் - ஹேலி மேத்யூஸ் அணி அதிரடியான தொடக்கத்தைக் கொடுத்தனர். 

இந்த இணை 12 ஓவர்களில் 100 ரன்களைச் சேர்த்து அசத்தியது. இதில் டோட்டின் அரைசதம் கடந்தார். அதன்பின் ஹேலி மேத்யூஸ் 43 ரன்களில் ஆட்டமிழக்க, டோட்டின் 62 ரன்களில் விக்கெட்டை இழந்தார். 

பின்னர் களமிறங்கிய வீராங்கனைகள் அனைவரும் இந்திய அணியின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்தனர். 

இதனால் 40.3 ஓவர்களில் வெஸ்ட் இண்டீஸ் அணி அனைத்து விக்கெட்டுகளையும் இழந்து 162 ரன்களை மட்டுமே சேர்த்தது. இந்திய அணி தரப்பில் ஸ்நே ராணா 3 விக்கெட்டுகளைக் கைப்பற்றினார். 

இதன்மூலம் இந்திய மகளிர் அணி 155 ரன்கள் வித்தியாசத்தில் விண்டீஸை வீழ்த்தி இமாலய வெற்றியைப் பெற்றதுடன், இரண்டாவது வெற்றியையும் பதிவுசெய்தது.