ZIM vs BAN, 2nd ODI: ரஸா, சகாப்வா அபார சதம்; வங்கதேசத்தை வீழ்த்தி தொடரை வென்றது ஜிம்பாப்வே!

வங்கதேச அணிக்கெதிரான இரண்டாவது டி20 போட்டியிலும் ஜிம்பாப்வே அணி 5 விக்கெட் வித்தியாசத்தில் வெற்றிபெற்று, ஒருநாள் தொடரை 2-0 என்ற கணக்கில் கைப்பற்றி அசத்தியது.

ZIM vs BAN, 2nd ODI: Zimbabwe take an unassailable 2-0 lead in the ODI series (Image Source: Google)

ஜிம்பாப்வேவில் சுற்றுப்பயணம் மேற்கொண்டுள்ள வங்கதேச அணி 3 போட்டிகள் கொண்ட டி20 மற்றும் ஒருநாள் தொடரில் விளையாடி வருகிறது. இதில் இரு அணிகளுக்கும் இடையேயான டி20 தொடரை ஜிம்பாப்வே அணி 2-1 என்ற கணக்கில் கைப்பற்றி அசத்தியது. 

இதையடுத்து நடைபெற்ற முதல் ஒருநாள் போட்டியிலும் ஜிம்பாப்வே அணி வெற்றிபெற்று 1-0 என்ற கணக்கில் தொடரில் முன்னிலைப் பெற்றுள்ளது. இந்நிலையில் இரு அணிகளுக்கு இடையேயான இரண்டாவது ஒருநாள் போட்டி இன்று ஹராரேவில் நடைபெற்றது. இப்போட்டியில் டாஸ் வென்ற ஜிம்பாப்வே அணி முதலில் பந்துவீச தீர்மானித்து களமிறங்கியது.

அதன்படி முதலில் ஆடிய வங்கதேச அணிக்கு கேப்டன் தமிம் இக்பால் அதிரடியான தொடக்கத்தைக் கொடுத்தார். ஆனால் மறுமுனையிலிருந்த அனமுல் ஹக் 20 ரன்களில் நடையைக் கட்ட, தமிம் இக்பால் தனது அரைசதத்தைப் பதிவுசெய்த கையோடு விக்கெட்டை இழந்தார். அதன்பின் வந்த நஜ்முல் ஹொசைன் 38 ரன்களிலும், முஷ்பிக்கூர் ரஹிம் 25 ரன்களிலும் ஆட்டமிழந்தனர். 

பின்னர் ஜோடி சேர்ந்த மஹ்முதுல்லா -ஆஃபிஃப் ஹொசைன் இணை சிறப்பான ஆட்டத்தை வெளிப்படுத்தி ஸ்கோரை உயர்த்தினர். இதில் அஃபிஃப் ஹொசைன் 41 ரன்களில் ஆட்டமிழக்க, மறுமுனையிலிருந்த மஹ்முதுல்ல அரைசதம் கடந்ததுடன், இறுதிவரை ஆட்டமிழக்காமல் இருந்து 80 ரன்களைச் சேர்த்தார். 

இதன்மூலம் 50 ஓவர்கள் முடிவில் வங்கதேச அணி 9 விக்கெட்டுகள் இழப்பிற்கு 290 ரன்களைச் சேர்த்துள்ளது. ஜிம்பாப்வே அணி தரப்பில் சிக்கந்தர் ரஸா 3 விக்கெட்டுகளைக் கைப்பற்றினார். 

இதையடுத்து இலக்கை துரத்திய ஜிம்பாப்வே அணியில் கைடானோ, இன்னெசண்ட் கையா, வெஸ்லி மதவெரே, மருமணி (25) என அடுத்தடுத்து விக்கெட்டுகளை இழந்து தடுமாறினர்.

அதன்பின் ஜோடி சேர்ந்த சிக்கந்தர் ரஸா - ரெஜிஸ் சகாப்வா இணை சிறப்பான ஆட்டத்தை வெளிப்படுத்தி விக்கெட் இழப்பை தடுத்ததுடன், அணியின் ஸ்கோரையும் மளமளவென உயர்த்தினர். தொடர்ந்து அபாரமாக விளையாடிய இருவரும் சதமடிக்க அணியின் வெற்றியும் உறுதியானது. 

பின் 102 ரன்களில் சகாப்வா ஆட்டமிழந்து வெளியேற, இறுதிவரை களத்தில் இருந்த சிக்கந்தர் ரஸா 117 ரன்களைச் சேர்த்து அணியை வெற்றிபெற செய்தார். இதன்மூலம் ஜிம்பாப்வே அணி 47.3 ஓவர்களில் இலக்கை எட்டியதுடன், 5 விக்கெட் வித்தியாசத்தில் வங்கதேச அணியை வீழ்த்தி அபார வெற்றியைப் பெற்றது.

இந்த வெற்றியின் மூலம் மூன்று போட்டிகள் கொண்ட ஒருநாள் தொடரை ஜிம்பாப்வே அணி 2-0 என்ற கணக்கிலும் கைப்பற்றி சாதனைப் படைத்துள்ளது. இப்போட்டியில் பேட்டிங், பந்துவீச்சு என அணியின் வெற்றிக்கு உதவிய சிக்கந்தர் ரஸா ஆட்டநாயகனாகத் தேர்வு செய்யப்பட்டார்.

Win Big, Make Your Cricket Tales Now