ZIM vs IRe, 2nd ODI: ஜிம்பாப்வேவை வீழ்த்தி அயர்லாந்து அணி வெற்றி!

ஜிம்பாப்வே அணிக்கெதிரான இரண்டாவது ஒருநாள் போட்டியில் அயர்லாந்து அணி 4 விக்கெட் வித்தியாசத்தில் வெற்றிபெற்று அசத்தியது.

ZIM vs IRe, 2nd ODI: ஜிம்பாப்வேவை வீழ்த்தி அயர்லாந்து அணி வெற்றி! (Image Source: Google)

ஜிம்பாப்வேவில் சுற்றுப்பயணம் செய்துவரும் அயர்லாந்து அணி தற்போது ஒருநாள் தொடரில் விளையாடி வருகிறது. இதில் இரு அணிகளுக்கும் இடையேயான முதலாவது ஒருநாள் போட்டி மழை காரணமாக கைவிடப்பட்டது. இந்நிலையில் இரு அணிகளுக்கும் இடையேயான இரண்டாவது ஒருநாள் போட்டி ஹராரேவில் இன்று நடைபெற்றது. இப்போட்டியில் டாஸ் வென்ற ஜிம்பாப்வே அணி முதலில் பேட்டிங் செய்வதாக அறிவித்தது. 

அதன்படி களமிறங்கிய ஜிம்பாப்வே அணிக்கு எதிர்பார்த்த தொடக்கம் கிடைக்கவில்லை. அந்த அணியின் டாப் ஆர்டர் வீரர்கள் கும்பி 5 ரன்களிலும், கமுன்ஹுகம்வே 8 ரன்களிலும், மில்டன் ஷும்பா ரன்கள் ஏதுமின்றியும், சிக்கந்தர் ரஸா 2 ரன்களுக்கும் என அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினார். பின்னர் ஜோடி சேர்ந்த ரியான் பார்ல் - கிளைவ் மடாண்டே இணை ஓரளவு தாக்குப்பிடித்து ஸ்கோரை உயர்த்தினர். 

பின் 38 ரன்களில் ரியான் பார்லும், 33 ரன்களுக்கும் மடாண்டேவும் விக்கெட்டை இழக்க, இறுதியில் மஸகட்ஸா அதிரடியாக விளையாடி 40 ரன்களைச் சேர்த்தார். இதனால் ஜிம்பாப்வே அணி 42.5 ஓவர்களில் அனைத்து விக்கெட்டுகளையும் இழந்து 166 ரன்களுக்கு ஆல் அவுட்டானது. அயர்லாந்து அணி தரப்பில் அபாரமாக பந்துவீசிய ஜோஷுவா லிட்டில் 6 விக்கெட்டுகளைக் கைப்பற்றி அசத்தினார். 

இதையடுத்து இலக்கை நோக்கி களமிறங்கிய அயர்லாந்து அணிக்கு மிகப்பெரும் அதிர்ச்சி காத்திருந்தது. அணியின் தொடக்க வீரர்கள் ஆண்ட்ரூ பால்பிர்னி ரன்கள் ஏதுமின்றியும், கேப்டன் பால் ஸ்டிர்லிங் 14 ரன்களிலும் என விக்கெட்டை இழந்தார். பின்னர் களமிறங்கிய கர்டிஸ் காம்பேர் - ஹாரி டெக்டர் இணை சிறப்பான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். 

பின் டெக்டர் 21 ரன்களிலும், அடுத்து களமிறங்கிய லோர்கன் டக்கர் 28 ரன்களிலும் என விக்கெட்டை இழக்க மறுபக்கம் அதிரடியாக விளையாடி வந்த கர்டிஸ் காம்பேர் அரைசதம் கடந்து அசத்தியதுடன் 10 பவுண்டரிகளுடன் 66 ரன்களைச் சேர்த்து விக்கெட்டை இழந்தார். இருப்பினும் இறுதியில் அதிரடியாக விளையாடிய மார்க் அதிர் 25 ரன்களைச் சேர்த்து அணியின் வெற்றிக்கு உதவினார். 

இதன்மூலம் அயர்லாந்து அணி 40.1 ஓவர்களில் இலக்கை எட்டியதுடன் 4 விக்கெட் வித்தியாசத்தில் ஜிம்பாப்வே அணியை வீழ்த்தி வெற்றிபெற்று அசத்தியது. இதன்மூலம் மூன்று போட்டிகள் கொண்ட ஒருநாள் தொடரில் அயர்லாந்து அணி 1-0 என்ற கணக்கில் முன்னிலைப் பெற்று அசத்தியுள்ளது.

Win Big, Make Your Cricket Tales Now