ZIM vs IRE, 1st ODI: பென்னட், முஸரபானி அபாரம்; அயர்லாந்தை வீழ்த்தியது ஜிம்பாப்வே!

அயர்லாந்து அணிக்கு எதிரான முதல் ஒருநாள் போட்டியில் ஜிம்பாப்வே அணி 49 ரன்கள் வித்தியாசத்தில் வெற்றிபெற்று, 1-0 என்ற கணக்கில் தொடரில் முன்னிலைப் பெற்றுள்ளது.

ZIM vs IRE, 1st ODI: பென்னட், முஸரபானி அபாரம்; அயர்லாந்தை வீழ்த்தியது ஜிம்பாப்வே! (Image Source: Google)

அயர்லாந்து அணி தற்போது ஜிம்பாப்வேவில் சுற்றுப்பயணம் மேற்கொண்டு மூன்று வடிவிலான கிரிக்கெட் தொடரிலும் விளையாடி வருகிறது. இதில் நடந்து முடிந்த டெஸ்ட் போட்டியில் அயர்லாந்து அணியானது 63 ரன்கள் வித்தியாசத்தில் ஜிம்பாப்வேவை வீழ்த்தி வெற்றிபெற்றது. இதையடுத்து இரு அணிகளுக்கும் இடையேயான மூன்று போட்டிகள் கொண்ட ஒருநாள் தொடர் நடைபெறவுள்ளது.

அதன்படி ஜிம்பாப்வே - அயர்லாந்து அணிகளுக்கு இடையேயான முதல் ஒருநாள் போட்டி இன்று ஹராரேவில் உள்ள ஹராரே ஸ்போர்ட்ஸ் கிளப் மைதானத்தில் நடைபெற்றது. இப்போட்டியில் டாஸ் வென்ற அயர்லாந்து அணியானது முதலில் பந்துவீசுவதாக அறிவித்து ஜிம்பாப்வே அணியை பேட்டிங் செய்ய அழைத்தது. அதன்படி களமிறங்கிய ஜிம்பாப்வே அணிக்கு பிரையன் பென்னட் மற்றும் பென் கரண் இணை தொடக்கம் கொடுத்தனர். இதில் இருவரும் சிறப்பான தொடக்கத்தைக் கொடுத்ததுடன் அணிக்கு தேவையான அடித்தளத்தையும் அமைத்து கொடுத்தனர்.

இதில் பென் கரண் 28 ரன்கள் எடுத்திருந்த நிலையில் தனது விக்கெட்டை இழந்தார். பின்னர் பென்னெட்டுடன் இணைந்த கேப்டன் கிரேய்க் எர்வினும் சிறப்பாக செயல்பட அணியின் ஸ்கோரும் மளமளவென உயர்ந்தது. இப்போட்டியில் அபாரமாக விளையாடிய பிரையன் பென்னெட் சர்வதேச ஒருநாள் கிரிக்கெட்டில் தனது முதல் சதத்தை பதிவுசெய்து அசத்தினார். அவருடன் இணைந்து விளையாடிய எர்வினும் அரைசதம் கடந்தார். இதன்மூலம் இருவரின் பார்ட்னர்ஷிப்பும் 100 ரன்களைக் கடந்த நிலையில், எர்வின் 3 பவுண்டரி, 4 சிக்ஸர்கள் என 66 ரன்களில் ஆட்டமிழந்தார். 

அவரைத்தொடர்ந்து களமிறங்கிய சிகந்தர் ரஸா 8 ரன்னிலும், வெஸ்லி மதவெரே 8 ரன்னிலும் என அடுத்தடுத்து விக்கெட்டுகளை இழந்தனர். இருப்பினும் இப்போட்டியில் அபாரமான ஆட்டத்தை வெளிப்படுத்தி வந்த பிரைன் பென்னெட் 20 பவுண்டரி, 3 சிக்ஸர்களுடன் 169 ரன்களைக் குவித்தார். இதன்மூலம் ஜிம்பாப்வே அணி 50 ஓவர்கள் முடிவில் 5 விக்கெட்டுகள் இழப்பிற்கு 299 ரன்களைக் குவித்துள்ளது. அயர்லாந்து அணி தரப்பில் மார்க் அதிர் 2 விக்கெட்டுகளையும், ஜோஷுவா லிட்டில், கிரஹாம் ஹூம், ஆண்டி மெக்பிரைன் ஆகியோர் தலா ஒரு விக்கெட்டை கைப்பற்றினர். 

அதன்பின் இலக்கை நோக்கி விளையாடிய அயர்லாந்து அணியில் தொடக்க வீரர் ஆண்ட்ரூ பால்பிர்னி முதல் பந்திலேயே விக்கெட்டை இழந்து ஏமாற்றமளித்தர். அவரைத்தொடர்ந்து ஜோடி சேர்ந்த கேப்டன் பால் ஸ்டிர்லிங் - கர்டிஸ் காம்பெர் இணை பொறுப்பான ஆட்டத்தை வெளிப்படுத்தியதுடன் அணியின் ஸ்கோரையும் மளமளவென உயர்த்தினர். இருவரும் இணைந்து இரண்டாவது விக்கெட்டிற்கு 55 ரன்கள் பார்ட்னர்ஷிப் அமைத்தனர். அதன்பின் 3 பவுண்டரி, 2 சிக்ஸர்கள் என 32 ரன்களைச் சேர்த்திருந்த பால் ஸ்டிர்லிங் தனது விக்கெட்டை இழந்தார். 

பின்னர் களமிறங்கிய ஹாரி டெக்கரும் சிறப்பாக விளையாட ஸ்கோரும் தடையில்லாமல் உயர்ந்தது. இதில் அரைசதம் அடிப்பார் என எதிர்பார்க்கப்பட்ட கர்டிஸ் காம்பெர் 44 ரன்களைச் சேர்த்திருந்த நிலையில் விக்கெட்டை இழக்க, மறுபக்கம் 39 ரன்களை எடுத்திருந்த ஹாரி டெக்டரும் ஆட்டமிழந்தார். அதன்பின் களமிறங்கிய லோர்கன் டக்கர் மற்றும் ஜார்ஜ் டக்ரேலும் ஓரளவு தாக்குப்பிடித்து அணியை வெற்றியை நோக்கி அழைத்து செல்ல முயற்சித்தனர். இதில் டக்கர் 31 ரன்களிலும், டக்ரேல் 32 ரன்னிலும் ஆட்டமிழக்க, மார்க் அதிரும் 2 ரன்களுடன் நடையைக் கட்டினார். 

அதன்பின் களமிறங்கிய வீரர்களில் ஆண்டி மெக்பிரைன் 32 ரன்களை எடுத்ததை தவிர்த்து மற்ற வீரர்களும் சோபிக்க தவறினர். இதனால் அயர்லாந்து அணி 46 ஓவர்களில் அனைத்து விக்கெட்டுகளையும் இழந்து 250 ரன்களுக்கு ஆல் அவுட்டானது. ஜிம்பாப்வே அணி தரப்பில் அபாரமான பந்துவீச்சை வெளிப்படுத்திய பிளெசிங் முஸரபானி 4 விக்கெட்டுகளையும், ரிச்சர்ட் ந்ங்கரவா 3 விக்கெட்டுகளையும் கைப்பற்றினர். இதன்மூலம் ஜிம்பாப்வே அணி 49 ரன்கள் வித்தியாசத்தில் அயர்லாந்தை வீழ்த்தி வெற்றிபெற்றதுடன், 1-0 என்ற கணக்கில் தொடரிலும் முன்னிலைப் பெற்றுள்ளது. 

Win Big, Make Your Cricket Tales Now