யுஇஎஃப்ஏ சாம்பியன்ஸ் லீக்: டார்ட்மவுண்ட் செவில்லா போட்டி டிரா; ஜுவென்டஸுக்கு அதிர்ச்சியளித்தது மக்காபி ஹைஃபா!

ஜுவென்டஸுக்கு எதிரான யுஇஎஃப்ஏ சாம்பியன்ஸ் லீக் கால்பந்து போட்டியில் மக்காபி ஹைஃபா அணி 2-0 என்ற கோல் கணக்கில் அபார வெற்றியைப் பதிவுசெதது.

ஐரோப்பிய கால்பந்து சங்கங்களின் ஒன்றியம் (யுஇஎஃப்ஏ) சர்பாக ஒவ்வொரு ஆண்டும் சாம்பியன்ஸ் லீக் கால்பந்து போட்டிகள் நடைபெற்று வருகின்றன. அதன்படி நடப்பாண்டிற்கான யுஇஎஃப்ஏ சாம்பியன்ஸ் லீக் போட்டிகள் விறுவிறுப்பாக நடைபெற்று வருகிறது.

இதில் நேற்று நடைபெற்ற லீக் ஆட்டத்தில் டார்ட்மவுண்ட் - செவில்லா அணிகள் பலப்பரீட்சை நடத்தின. போட்டி தொடங்கிய சிறுது நேரத்திலேயே செவில்லா அணியின் டாங்குய் நியன்ஸூ ஆட்டத்தின் 18ஆவது நிமிடத்தில் கோலடித்து அசத்தினார். 

இதற்கு பதிலடி கொடுக்கும் விதமால ஆட்டத்தின் 35ஆவது நிமிடத்தில் டார்ட்மவுண்ட் அணியின் ஜூட் பெல்லிங்ஹாம் கோலடிக்க, முதல் பாதி ஆட்டம் சமனில் முடிந்தது. இதையடுத்து தொடர்ந்து நடைபெற்ற இரண்டாம் பாதி ஆட்டத்தில் இரு அணிகளும் கோலடிக்க கடுமையாக முயற்சித்தனர். 

ஆனால் ஆட்டநேர முடியும் வரை இரு அணிகளால் மேற்கொண்டு கோல்களைப் போட முடியவில்லை. இதனால் இரு அணிகளும் தலா ஒரு கோலுடன் போட்டிய டிராவில் முடித்தனர். 

அதேபோல் நேற்று நடைபெற்ற மற்றொரு லீக் ஆட்டத்தில் மக்காபி ஹைஃபா - ஜுவென்டஸ் அணிகள் பலப்பரீட்சை நடத்தினர். இப்போட்டியின் ஆரம்பம் முதலே மக்காபி ஹைஃபா அணி சிறப்பான ஆட்டத்தை வெளிப்படுத்தி ஜுவென்டஸுக்கு தலைவலியை ஏற்படுத்தியது.

அதன் பயனாக ஆட்டத்தின் 7ஆவது மற்றும் 42ஆவது நிமிடத்தில் மக்காபி ஹைஃபா அணியின் ஒமர் அட்ஸ்லி அடுத்தடுத்து இரண்டு கோல்களை அடித்து அணியை முன்னிலைப் படுத்தினார். இதனால் முதல் பாதி ஆட்டநேர முடிவில் மக்காபி ஹைஃபா அணி 2-0 என்ற கோல் கணக்கில் முன்னிலைப் பெற்றது.

அதன்பின் தொடங்கிய இரண்டாம் பாதி ஆட்டத்தில் தனது டிஃபென்ஸ் வலிமையை காட்டிய மக்காபி ஹைஃபா அணி ஜுவென்டஸின் கோலடிக்கும் அனைத்து யுக்திகளையும் தவிடுபொடியாக்கி அவர்களை திக்குமுக்காடச் செய்தது.

இதன்மூலம் ஆட்டம்நேர முடிவில் மக்காபி ஹைஃபா அணி 2-0 என்ற கோல் கணக்கில் ஜுவென்டஸ் அணியை வீழ்த்தி அபார வெற்றியைப் பதிவுசெய்தது. 

Win Big, Make Your Cricket Tales Now