பாரிஸ் மாஸ்டர்ஸ்: இரண்டாவது சுற்றோடு வெளியேறினார் ரஃபேல் நடால்!

பாரிஸ் மாஸ்டர்ஸ் ஓபன் டென்னிஸ் தொடரின் இரண்டாம் சுற்று ஆட்டத்தில் நட்சத்திர வீரர் ரஃபேல் நடால் தோல்வியடைந்து தொடரிலிருந்து வெளியேறினார்.

Paris Masters: Rafael Nadal loses to Tommy Paul (Image Source: Google)

பாரிஸ் மாஸ்டர்ஸ் டென்னிஸ் தொடர் பாரிஸில் கடந்த 29ஆம் தேதி தொடங்கியது. முதல் 2 நாட்கள் தகுதி சுற்று போட்டிகள் நடைபெற்ற நிலையில் கடந்த 31ஆம் தேதி முதல் சுற்று போட்டிகள் தொடங்கியது.

இந்த தொடரில் இன்று நடைபெற்ற இரண்டாவது சுற்று ஆட்டம் ஒன்றில் நட்சத்திர வீரர் ரபேல் நடால் அமெரிக்க வீரரான டாமி பாலினை எதிர்கொண்டார். 

இப்போட்டியின் முதல் செட் ஆட்டத்தில் ரஃபேல் நடால் 6-3 என்ற கணக்கில் கைப்பற்றி அசத்தினார். ஆனால் அதன்பின் அபார ஆட்டத்தை வெளிப்படுத்திய டாம் பால் 7-6 என்ற புள்ளிகள் அடிப்படையில் இரண்டாவது செட்டை கைப்பற்றி ஆச்சரியம் கொடுத்தார்.

அதன்பின் நடைபெற்ற மூன்றாவது செட் ஆட்டத்திலும் அபாரமாக செயல்பட்ட டாம் பால் 6-1 என்ற கணக்கில் அந்த செட்டையும் கைப்பற்றி ரஃபேல் நடாலுக்கு அதிர்ச்சியளித்தார். 

இதன்மூலம் டாம் பால் 3-6, 7-6, 6-1 என்ற செட் கணக்கில் ரஃபேல் நடாலை வீழ்த்தி அடுத்த சுற்றுக்கு முன்னேறினார். இதில் அதிர்ச்சி தோல்வியடைந்த ரஃபேல் நடால் பாரிஸ் மாஸ்டர் ஓபன் டென்னிஸ் தொடரின் இரண்டாம் சுற்றோடு வெளியேறினார். 

அதே போல் இன்று நடைபெற்ற காலிறுதிக்கு முந்தைய சுற்று போட்டி ஒன்றில் உலகின் முதல் நிலை வீரரான கார்லோஸ் அல்கராஸ் 6-1, 6-3 என்ற நேர் செட் கணக்கில் கிரிகோர் டிமிட்ரோவை வீழ்த்தி காலிறுதிக்கு தகுதி பெற்றார் என்பது குறிப்பிடத்தக்கது.