PKL 2023: பரபரப்பான ஆட்டத்தில் யுபி யோத்தாஸை வீழ்த்தி யு மும்பா த்ரில் வெற்றி!
யுபி யோத்தாஸ் அணிக்கெதிரான புரோ கபடி லீக் ஆட்டத்தில் யு மும்பா அணி 3 புள்ளிகள் வித்தியாசத்தில் த்ரில் வெற்றியைப் பதிவுசெய்து அசத்தியது.
புரோ கபடி லீக்கின் 10ஆவது சீசன் போட்டிகள் அஹ்மதாபாத்தில் உள்ள டிரான்ஸ் ஸ்டேடியா மைதானத்தில் நேற்று கோலாகலமாக தொடங்கியது. மொத்தம் 12 அணிகள் கலந்து கொண்டுள்ள இந்த தொடரின் தொடக்க ஆட்டத்தில் குஜராத் ஜெயண்ட்ஸ் அணி 6 புள்ளிகள் வித்தியாசத்தில் தெலுகு டைட்டன்ஸை வீழ்த்தி அசத்தல் வெற்றியைப் பெற்று அசத்தியது.
இதில் நேற்று நடைபெற்ற மற்றொரு ஆட்டத்தில் யு மும்பா - யுபி யோத்தாஸ் அணிகள் பலப்பரீட்சை நடத்தின. இந்தப் போட்டியில் தொடக்கம் முதலே சிறப்பான ஆட்டத்தை வெளிப்படுத்திய யு மும்பா அணி புள்ளிகளை பெற்று முன்னிலையில் இருந்தது. இதன்மூலம் யுபி யுத்தாஸ் அணியை முதலில் ஆல் - அவுட் செய்து கெத்து காண்பித்தது மும்பா அணி.
குறிப்பாக யு மும்பா அணியின் சுரேந்தர் கில், ரிங்கு தடுப்பாட்டத்தில் கில்லியாக இருந்தனர். இதனால் ஆட்டத்தின் முதல் பாதிநேர முடிவில் யு மும்பா அணி 19 - 14 என்ற கணக்கில் முன்னிலைப் பெற்று அசத்தியது. இதையடுத்து தொடங்கிய இரண்டாம் பாதியில் வேகம் எடுத்த யுபி யோத்தாஸ் மும்பா அணியை ஆல் - அவுட் செய்தது. அப்போதும் கூட மும்பா அணியை விட அதிக புள்ளிகள் பெற முடியவில்லை.
கடைசி வரை இந்த வித்தியாசத்தை தக்க வைத்த யு மும்பா அணி கடைசியில் 34 - 31 என்ற புள்ளிக் கணக்கில் யுபி யோத்தாஸை வீழ்த்தி வெற்றி பெற்றது. யு மும்பா அணி தரப்பில் அமிர் மொஹம்மத் 10 புள்ளிகள் பெற்று தன் அறிமுக சீசனில் அசத்தலான ஆட்டத்தை வெளிப்படுத்தினார்.
Win Big, Make Your Cricket Tales Now
