PKL 2022: வெற்றி பயணத்தை தொடரும் தமிழ் தலைவாஸ்!

புரோ கபடி லீக் தொடரில் டபாங் டெல்லி அணியை 49-39 என்ற புள்ளிக்கணக்கில் வீழ்த்தி தமிழ் தலைவாஸ் அணி வெற்றி பெற்றது.

PKL 9: Narender stars in Tamil Thalaivas' second straight victory (Image Source: Google)

ஒன்பதாவது சீசன் புரோ கபடி லீக் தொடரின் 9வது சீசன் விறுவிறுப்பாக நடந்துவருகிறது. இந்த சீசனின் தொடக்கத்தில் அபாரமாக விளையாடி புள்ளி பட்டியலில் முதலிரண்டு இடங்களில் இருந்த ஜெய்ப்பூர் பிங்க் பாந்தர்ஸ் அணி தொடர் தோல்விகளை தழுவிவருகிறது.

கடந்த போட்டியில் தமிழ் தலைவாஸிடம் தோற்ற ஜெய்ப்பூர் பிங்க் பாந்தர்ஸ் அணி, நேற்று பெங்களூரு புல்ஸை எதிர்கொண்டு விளையாடியது. இந்த போட்டியில் இரு அணிகளும் சிறப்பாக விளையாடியதால் போட்டி கடுமையாக இருந்தது. 

இறுதியில் பெங்களூரு புல்ஸ் அணி 37-31 என்ற புள்ளிக்கணக்கில் ஜெய்ப்பூரை வீழ்த்தியது. கடந்த போட்டியில் தமிழ் தலைவாஸிடம் தோற்ற ஜெய்ப்பூர்  அணி நேற்று பெங்களூருவிடமும் தோல்வியைத் தழுவியது. 

இதையடுத்து நடைபெற்ற போட்டியில் தமிழ் தலைவாஸும் - தபாங் டெல்லி அணிகளும் மோதின. இந்த சீசனின் முதல் 5 போட்டிகளிலும் வெற்றி பெற்ற தபாங் டெல்லி அணி அதன்பின்னர் தொடர் தோல்விகளை தழுவிவருகிறது. அதேவேளையில், முதலில் தொடர் தோல்விகளை தழுவிவந்த தமிழ் தலைவாஸ் அணி இப்போது தொடர்ச்சியாக வெற்றி பெற்றுவருகிறது. 

கடந்த போட்டியில் ஜெய்ப்பூர் பிங்க் பாந்தர்ஸை வீழ்த்தி வெற்றி பெற்ற தமிழ் தலைவாஸ் அணி, இன்றைய போட்டியிலும் சிறப்பான அட்டத்தை வெளிப்படுத்தி ஆரம்பம் முதலே புள்ளிகளைப் பெற்று அசத்தியது. அதற்கு இணையாக தபாங் டெல்லி அணியும் புள்ளிகளைப் பெற ஆட்டம் விறுவிறுப்பாக மாறியது. 

இதில் தமிழ் தலைவாஸ் அணியின் நரேந்தர் அபாரமான ஆட்டத்தை வெளிப்படுத்தியோடு 24 புள்ளிகளைப் பெற்று அணியின் வெற்றிக்கு வழிவகை செய்தார். இதன்மூலம் ஆட்டநேர முடிவில் தமிழ் தலைவாஸ் அணி 49-39 என்ற கணக்கில் தபாங் டெல்லி அணியை வீழ்த்தி அபார வெற்றியைப் பெற்றது. 

இந்த வெற்றியின் மூலம் தமிழ் தலைவாஸ் அணி 20 புள்ளிகளுடன் புள்ளிப்பட்டியளின் எட்டாம் இடத்திற்கு முன்னேறி அசத்தியுள்ளது. 

 டபாங் டெல்லியை 49-39 என்ற புள்ளி கணக்கில் டெல்லியை வீழ்த்தி தமிழ் தலைவாஸ் வெற்றி பெற்றது.