இந்தியா - இங்கிலாந்து அணிகளுக்கு இடையேயான 5 போட்டிகள் கொண்ட டெஸ்ட் தொடர் இறுதிக்கட்டத்தை எட்டியுள்ளது. இதில் இரு அணிகளுக்கும் இடையே நடைபெற்று முடிந்த 4 டெஸ்ட் போட்டிகளின் முடிவில் இந்திய அணி மூன்று வெற்றிகளைப் பதிவுசெய்ததுடன், டெஸ்ட் தொடரையும் கைப்பற்றி அசத்தியது. இந்நிலையில் இரு அணிகளுக்கும் இடையேயான 5ஆவது மற்றும் கடைசி டெஸ்ட் போட்டி தர்மசாலாவில் நாளை நடைபெறவுள்ளது.
இப்போட்டிக்காக இரு அணி வீரர்களும் தீவிரமாக தயாராகி வருகின்றனர். இந்நிலையில் இப்போட்டியில் பங்கேற்பதன் மூலம் நட்சத்திர சுழற்பந்து வீச்சாளர் ரவிச்சந்திரன் அஸ்வின் தனது 100ஆவது டெஸ்ட் போட்டியில் விளையாடவுள்ளார். இதன்மூலம் இந்திய அணிக்காக 100 டெஸ்ட் போட்டிகளில் விளையாடிய 14ஆவது வீரர் எனும் சாதனையை அஸ்வின் படைக்கவுள்ளார். மேலும் தமிழ்நாட்டைச் சேர்ந்த வீரர் ஒருவர் 100 டெஸ்ட் போட்டிகளில் விளையாடுவதும் இதுவே முதல் முறை என்பதும் குறிப்பிடத்தக்கது.
இந்நிலையில் தனது 100ஆவது டெஸ்ட் போட்டி குறித்து பேசிய அஸ்வின், “சர்வதேச கிரிக்கெட்டில் 100 டெஸ்ட் போட்டிகளில் விளையாடுவது என்பது நிச்சயம் மிகப்பெரிய தருணம். சென்றடையும் இடத்தை காட்டிலும் இந்த பயணம் மிகவும் சிறப்பு வாய்ந்தது. இந்த பயணத்தில் நிறைய ஏற்ற, இறக்கங்களை சந்தித்துள்ளேன். நிறைய விஷங்களை கற்றும் இருக்கிறேன். அதேசமய் இது எப்போதும் போல இதுவும் ஒரு பொட்டி தான் . அதனால் நான் தயாராகும் விதத்தில் எந்த மாற்றமுல் இல்லை. எங்களுக்கு டெஸ்டில் வெற்றி பெறுவது தான் முக்கியம்.
ஒரு கிரிக்கெட் வீரராக எனது பயணத்தை தொடங்கியபோது என்னுடைய குடும்பத்தின் ஆதரவு மிகவும் முக்கியமானதாக இருந்தது. என்னை விட எனது அம்மா, அப்பா, மனைவி, குழந்தைகளுக்கு தான் இது மிகப்பெரிய தருணமாக இருக்கும். குறிப்பாக இந்த டெஸ்ட் போட்டியை எனது மகள்கள் ஆவலுடன் எதிர்நோக்கி உள்ளனர். என்னை பொறுத்தவரை 100 என்பது வெறும் நம்பர் தான்.
மேலும் உங்கள் நாட்டிற்காக ஒரு குறிப்பிட்ட விளையாட்டை விளையாடாதது எப்போதுமே உங்களுக்கு பெரும் ஏமாற்றமாக இருக்கும். குறிப்பாக நீங்கள் சிறப்பாக விளையாடும்போது உங்களுக்கு வாய்ப்பு கிடைக்காமல் இருப்பது உங்களை சோர்வடைய செய்யும். ஆனால் நீங்கள் அதனுடன் சமாதானம் செய்து கொள்ள வேண்டும், ஏனென்றால் அது அணியின் நலனுக்காக இருக்கலாம்.
மேலும் எனது இத்தனை ஆண்டுகால கிரிக்கெட்டீல் ஜோ ரூட், ஸ்டீவ் ஸ்மித் மற்றும் கேன் வில்லியம்சன் ஆகியோருக்கு எதிராக பந்துவீசுவதை எப்போதும் விரும்புவேன். உலகின் தரமான பேட்ஸ்மேன்களான இவர்களுக்கு எதிராக பந்து வீசும் போது சிறந்த பந்துவீச்சு வெளிப்படுத்த வேண்டும் எண்ணம் எப்போதும் இருக்கும்” என்று தெரிவித்துள்ளார்.
இந்திய அணிக்காக இதுவரை இந்திய அணிக்காக 99 டெஸ்ட் போட்டிகளில் விளையாடியுள்ள ரவிச்சந்திரன் அஸ்வின் 5 சதங்கள், 14 அரைசதங்கள் என 3,309 ரன்களையும், 507 விக்கெட்டுகளையும் வீழ்த்தி அசத்தியுள்ளார். அதிலும் குறிப்பாக இதில் 35 முறை ஐந்து விக்கெட்டுகளை கைப்பற்றி அசத்தியுள்ளார் என்பது குறிப்பிடத்தக்கது.