AFG vs SA, 2nd ODI: குர்பாஸ், ஒமர்ஸாய் அதிரடி; தென் ஆப்பிரிக்காவுக்கு 312 ரன்கள் இலக்கு!

ஆஃப்கானிஸ்தான் - தென் ஆப்பிரிக்க அணிகளுக்கு இடையேயான மூன்று போட்டிகள் கொண்ட ஒருநாள் தொடர் ஐக்கிய அரபு அமீரகத்தில் நடைபெற்று வருகிறது. இத்தொடரில் நடந்து முடிந்த முதல் ஒருநாள் போட்டியில் ஆஃப்கானிஸ்தான் அணி வரலாற்று வெற்றியைப் பதிவுசெய்து அசத்தி இருந்தது.

இந்நிலையில் இவ்விரு அணிகளுக்கும் இடையேயான இரண்டாவது ஒருநாள் போட்டியானது ஷார்ஜாவில் இன்று நடைபெற்றது. இப்போட்டியில் டாஸ் வென்ற ஆஃப்கானிஸ்தான் அணி முதலில் பேட்டிங் செய்வதாக அறிவித்து தென் ஆப்பிரிக்க அணியை பந்துவீச அழைத்தது. அதன்படி களமிறங்கிய ஆஃப்கான் அணிக்கு ரஹ்மனுல்லா குர்பாஸ் - ரியாஸ் ஹசன் இணை அதிரடியான தொடக்கத்தைக் கொடுத்து அணிக்கு தேவையான அடித்தளத்தை அமைத்துக் கொடுத்தனர். பின் 29 ரன்கள் எடுத்திருந்த நிலையில் ரியாஸ் ஹசன் தனது விக்கெட்டை இழந்து பெவிலியனுக்கு திரும்பினார். 

இதனையடுத்து குர்பாஸுடன் இணைந்த ரஹ்மத் ஷாவும் பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினார். இதில் அபாரமாக விளையாடி வந்த ரஹ்மனுல்லா குர்பாஸ் சர்வதேச ஒருநாள் கிரிக்கெட்டில் தனது 7ஆவது சதத்தைப் பதிவுசெய்து அசத்தினார். அதன்பின் 10 பவுண்டரி, 3 சிக்ஸர்கள் என 105 ரன்களைச் சேர்த்திருந்த நிலையில் குர்பாஸ் தனது விக்கெட்டை இழந்தார். பின்னர் ஜோடி சேர்ந்த ரஹ்மத் ஷாவுடன் இணைந்த அஸ்மதுல்லா ஒமர்ஸாயும் அபாரமாக விளையாடி ஸ்கோரை உயர்த்தினர். சிறப்பாக விளையாடி வந்த இருவரும் அரைசதம் கடந்து அசத்தினர். 

Also Read: Funding To Save Test Cricket

பின்னர் ரஹ்மத் ஷா 50 ரன்கள் எடுத்த நிலையில் விக்கெட்டை இழந்து பெவிலியன் திரும்ப, அடுத்து களமிறக்கிய முகாது நபியும் 13 ரன்களில் விக்கெட்டை இழந்தார். இருப்பினும் இறுதிவரை ஆட்டமிழக்காமல் இருந்த அஸ்மதுல்ல ஒமர்ஸாய் 5 பவுண்டரி, 6 சிக்ஸர்கள் என 86 ரன்களையும், ரஷித் கான் 6 ரன்களையும் சேர்த்தனர். இதன்மூலம் ஆஃப்கானிஸ்தான் அணி 50 ஓவர்கள் முடிவில் 4 விக்கெட் இழப்பிற்கு 311 ரன்களைச் சேர்த்துள்ளது. தென் ஆப்பிரிக்க அணி தரப்பில் லுங்கி இங்கிடி, நந்த்ரே பர்க்கர், பீட்டர், ஐடன் மார்க்ரம் ஆகியோர் தலா ஒரு விக்கெட்டை கைப்பற்றினர்.