ஆஷஸ் 2023: மிட்செல் மார்ஷ் அதிரடி சதம்; மார்க் வுட் அபார பந்துவீச்சு!

இங்கிலாந்தில் சுற்றுப்பயணம் மேற்கொண்டுள்ள ஆஸ்திரேலிய அணி ஐந்து போட்டிகள் கொண்ட ஆஷஸ் டெஸ்ட் தொடரில் விளையாடி வருகிறது. இத்தொடரில் இதுவரை நடந்து முடிந்த முதலிரண்டு போட்டிகளிலும் ஆஸ்திரேலிய அணி வெற்றிபெற்று 2-0 என்ற கணக்கில் தொடரில் முன்னிலையைப் பெற்றுள்ளது. 

இந்நிலையில் இரு அணிகளுக்கும் இடையேயான மூன்றாவது டெஸ்ட் போட்டி இன்று ஹெட்டிங்கிலேவில் உள்ள லீட்ஸ் மைதானத்தில் இன்று தொடங்கியது. இப்போட்டியில் டாஸ் இங்கிலாந்து அணி டாஸ் வென்று முதலில் பந்துவீச்சை தேர்வு செய்தது.

அதன்படி களமிறங்கிய ஆஸ்திரேலிய அணியின் தொடக்க  வீரர் டேவிட் வார்னர்(4) போட்டியின் முதல் ஓவரிலேயே ஸ்டூடவர்ட் பிராட் பந்தில் ஆட்டம் இழந்தார். அவரைத் தொடர்ந்து உஸ்மான் கவாஜா(13) மார்க் வுட் வீசிய அதிவேக பந்தில் கிளீன் போல்ட் ஆனார். அடுத்து வந்த மார்னஸ் லபுஜானே 21 ரன்கள் மட்டுமே அடித்து இருந்தபோது கிறிஸ் வோக்ஸ் வீசிய பந்தில் ரூட் வசம் பிடிபட்டு வெளியேறினார்.

உணவு இடைவேளை வருவதற்கு கடைசி ஓவருக்கும் முந்தைய ஓவரில் துரதிஷ்டவசமாக ஸ்டீவ் ஸ்மித் தனது விக்கெட்டை பறிகொடுத்தார். இவர் 22 ரன்களுக்கு ஸ்டூவர்ட் பிராட் வீசிய பந்தில் பேர்ஸ்டோவ் வசம் பிடிபட்டு வெளியேறினார். இதனால் 85 ரன்களுக்கே 4 விக்கெட்டுகளை இழந்து ஆஸ்திரேலியா அணி தடுமாறியது.

அப்போது போது, இந்த ஆஷஸ் தொடரில் முதல்முறையாக பிளேயிங் லெவனில் சேர்க்கப்பட்ட மிட்சல் மார்ஷ் அதிரடியாக விளையாடி இங்கிலாந்து அணியை திக்குமுக்காட வைத்தார். இவர் 17 பவுண்டரிகள் நான்கு சிக்ஸர்கள் உட்பட 118 பந்துகளில் 118 ரன்கள் அடித்து வோக்ஸ் பந்தில் வெளியேறினார். மார்ஷ்-க்கு பக்கபலமாக இருந்த டிராவிஸ் ஹெட் 39 ரன்கள் அடித்து கிறிஸ் வோக்ஸ் பந்தில் வெளியேறினார்.

அடுத்து வந்த வீரர்கள் வரிசையாக மார்க் வுட் வீசிய அதிவேகத்தில் வெளியேறினார். அபாரமாக பந்து வீசிய மார்க் வுட் இந்த ஆஷஸ் தொடரில் விளையாட வைக்கப்பட்ட முதல் போட்டியிலேயே ஐந்து விக்கெட்டுகளை வீழ்த்தி மிரட்டினார். பிளேயிங் லெவனில் முதன்முறையாக விளையாட வைக்கப்பட்ட மற்றொரு வீரர் கிறிஸ் வோக்ஸ் மூன்று விக்கெட்டுகளை கைப்பற்றினார்.  இதனால் ஆஸ்திரேலிய அணி இறுதியில் 263 ரன்களுக்கு ஆல் அவுட் ஆனது.

இதையடுத்து முதல் இன்னிங்ஸைத் தொடங்கிய இங்கிலாந்து அணியும் ஆரம்பத்திலேயே விக்கெட்டுகளை இழந்தனது. தொடக்க வீரர் பென் டக்கெட் 2 ரன்களிலும், அடுத்து களமிறங்கிய ஹாரி ப்ரூக் 3 ரன்களுக்கும் ஆட்டமிழக்க மறுமுனையில் நிதான ஆட்டத்தை வெளிப்படுத்தி வந்த ஸாக் கிரௌலி 33 ரன்களுக்கு விக்கெட்டை இழந்து பெவிலியன் திரும்பினார். 

இதன்மூலம் முதல்நாள் ஆட்டநேர முடிவில் இங்கிலாந்து அணி 3 விக்கெட் இழப்பிற்கு 68 ரன்களை எடுத்தது. இங்கிலாந்து தரப்பில் ஜோ ரூட் 19 ரன்களுடனும், ஜானி பேர்ஸ்டோவ் ஒரு ரன்னுடனும் களத்தில் உள்ளனர். ஆஸ்திரேலிய தரப்பில் கேப்டன் பாட் கம்மின்ஸ் 2 விக்கெட்டுகளையும், மிட்செல் மார்ஷ் ஒரு விக்கெட்டையும் கைப்பற்றியுள்ளனர்.