AUS vs SA, 2nd T20I: டெவால்ட் பிரீவிஸ் அதிரடியில் ஆஸ்திரேலியாவை வீழ்த்தியது தென்னாப்பிரிக்கா!

AUS vs SA, 2nd T20I: ஆஸ்திரேலியாவுக்கு எதிரான இரண்டாவது டி20 போட்டியில் தென்னாப்பிரிக்க அணியின் இளம் அதிரடி வீரர் டெவால்ட் பிரீவிஸ் தனது முதல் சர்வதேச டி20 சதத்தைப் பதிவுசெய்து அசத்தினார். 

தென்னாப்பிரிக்க அணி ஆஸ்திரேலியாவில் சுற்றுப்பயணம் செய்து 3 போட்டிகள் கொண்ட டி20 தொடரில் விளையாடி வருகிறது. இதில் நடந்து முடிந்த முதல் டி20 போட்டியில் ஆஸ்திரேலிய அணி வெற்றி பெற்று தொடரில் முன்னிலையும் வகிக்கிறது. இதையடுத்து இரு அணிகளுக்கும் இடையேயான தொடரின் வெற்றியாளரைத் தீர்மானிக்கும் இரண்டாவது போட்டி இன்றுடார்வினில் நடைபெறவுள்ளது. இப்போட்டியில் டாஸ் வென்ற ஆஸ்திரேலிய அணி முதலில் பந்துவீசுவதாக அறிவித்து தென்னாப்பிரிக்க அணியை பேட்டிங் செய்ய அழைத்தது.

அதன்படி களமிறங்கிய தென் ஆப்பிரிக்க அணியில் ரியான் ரிக்கெல்டன் 14 ரன்னிலும், கேப்டன் ஐடன் மார்க்ரம் 18 ரன்னிலும், லுவான் ட்ரே பிரிட்டோரியஸ் 10 ரன்னிலும் என விக்கெட்டுகளை இழந்து ஏமாற்றமளித்தனர். பின்னர் இணைந்த டெவால்ட் பிரீவிஸ் மற்றும் டிரிஸ்டன் ஸ்டப்ஸ் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தும் முயற்சியில் இறங்கினர். இதில் அபாரமாக விளையாடி வந்த டெவால்ட் பிரீவிஸ் 41 பந்துகளில் தனது முதல் சர்வதேச டி20 சதத்தைப் பதிவுசெய்து அசத்திய நிலையில், மறுபக்கம் ஸ்டப்ஸ் 31 ரன்களில் தனது விக்கெட்டை இழந்தார். 

அதன்பின் களமிறங்கிய ரஸ்ஸி வேண்டார் டுசென், கார்பின் போஷ், காகிசோ ரபாடா ஆகியோர் சொற்ப ரன்களில் ஆட்டமிழக்க, இறுதிவரை களத்தில் இருந்த டெவால்ட் பிரீவிஸ் 12 பவுண்டரி, 8 சிக்ஸர்கள் என 125 ரன்களைக் குவித்தார். இதன் மூலம் தென்னாப்பிரிக்க அணி 20 ஓவர்கள் முடிவில் 7 விக்கெட் இழப்பிற்கு 218 ரன்களைச் சேர்த்தது. ஆஸ்திரேலியா தரப்பில் கிளென் மேக்ஸ்வெல், பென் துவார்ஷுயிஸ் தலா 2 விக்கெட்டுகளை வீழ்த்தினர். பின்னர் இலக்கை நோக்கி விளையாடிய ஆஸ்திரேலிய அணியில் டிராவிஸ் ஹெட், கேமரூன் கிரீன் சொற்ப ரன்களுக்கு ஆட்டமிழந்தனர்.

அதன்பின் களமிறங்கிய டிம் டேவிட் ஒருமுனையில் அதிரடியாக விளையாடி ஸ்கோரை உயர்த்த, மறுபக்கம் கேப்டன் மிட்செல் மார்ஷ் 22 ரன்களுக்கும், கிளென் மேக்ஸ்வெல் 16 ரன்களுக்கும், மிட்செல் ஓவன் 8 ரன்களுக்கும் என விக்கெட்டை இழந்தனர். அவர்களைத் தொடர்ந்து அரைசதம் கடந்திருந்த டிம் டேவிட்டும் 4 பவுண்டரி, 4 சிக்ஸர்கள் என 50 ரன்களுடன் நடையைக் கட்டினார். மேற்கொண்டு களமிறங்கிய வீரர்களில் அலெக்ஸ் கேரி 26 ரன்களையும், பென் துவார்ஷூயிஸ் 12 ரன்னிலும், சீன் அபோட், ஆடம் ஸாம்பா ஆகியோரும் அடுத்தடுத்து விக்கெட்டுகளை இழந்தனர். 

Also Read: LIVE Cricket Score

இதனால் ஆஸ்திரேலிய அணி 17.4 ஓவர்களில் அனைத்து விக்கெட்டுகளையும் இழந்து 165 ரன்களுக்கு ஆல் அவுட்டானது. தென்னாப்பிரிக்கா தரப்பில் குவேனா மபாகா, கார்பின் போஷ் தலா 3 விக்கெட்டுகளையும் கைப்பற்றினர். இதன்மூலம் தென்னாப்பிரிக்க அணி 53 ரன்கள் வித்தியாசத்தில் ஆஸ்திரேலியாவை வீழ்த்தி அபார வெற்றியைப் பதிவுசெய்து அசத்தியதுடன், 1-1 என்ற கணக்கில் தொடரையும் சமன்செய்து அசத்தியுள்ளது. இப்போட்டியில் சதமடித்து அசத்திய டெவால்ட் பிரீவிஸ் ஆட்டநாயகன் விருதை வென்றார்.